Read Hatam NIBOU NDIG NYA GI NICAN 19 Bible Online

NIBOU NDIG NYA GI NICAN 19 - Hatam bible

NIBOU NDIG NYA GI NICAN 19

¹Tirigi ibou ningai pima ighyet tibim ei Hizkia nitingou nsi rino noni rik sinsun ei nonti him leu api juk sinsun kron lewo ningon buhun bibor. Lene noni bipbur ba, ug ei TUHAN De Ig.

²Lene noni cuk Elyakim di nok nibou mem nide ig kin Sebna di gwam nok sekertaris gi gom kin imam di iwer andig-ndau leu su nya ibou poi yahagom yuug ngat Nabi Yesaya di Amos nipmot. Yo dini cem yahagom ijuk sinsun kron noyam.

³Hizkia sok nihyet ei yok dip bak Yesaya bipai “Njap di ammani nyeni nahagom ningon buhun bibor. Nitug ndei hukum ba, tungwatu nya inim kep nye cem. Ninok sop di sindi migwam tut nimunggwom noro ninghuisi jet bisindem mem bi.

⁴Nibou ndig mben Asyur cuk nide nibou pran di sindem bibor kwei leu binhyepo nihyet wer mpiahi tut Allah di niyaijo. Handei kon ba, ade TUHAN Allah miap kep nihyet dima bikes hukum ei no di pai nok gima dip. Gima rino ma angat nadi tindei ide limwa nya di itug ndei nimai bigyo.”

⁵Yesaya miap tut Hizkia nisok ei yo dip bak noni pima lene,

⁶buhup “TUHAN pai bije mbro nok gino tentara Asyur dima ibindei ba, jingon digit tut yok drek dip gi ipai sut bipia TUHAN miteu je bijingwes ngun bi lo, ma na di Andigpoi adigit tut yok au.

⁷Lewo TUHAN mibindei ba, hou ban bei mitibim ei nibou ndig dima nitingou nsi bibindei ba, noni mingkwei hanyen ug ei nitimieisi leu api mitug midut ei sirima.”

⁸Mpe dima lene nibou tentara Asyur pima miap tut bipia nibou ndig mem mben Asyur jo leu Lakhis bikon pran bit mben Libna. Gima rino noni ug ei sirima bipi bimbrap bit noni.

⁹Noro nibou ndig mem mben Asyur sindi miap nihyet gom tut Tirhaka di nok nibou ndig mem Sudan di bie tut tentara Mesir kwei ba, ikon pran bit noni. Tirigi noni miap tu lene pas srat nimeng gom bak Hizkia di nok nibou ndig mem timiei Yehuda nya,

¹⁰bipai bak “Allah di jiba jingon com pai bije bipia mijicut bak dani ei nijam dini bi. Noro ma jingon jo kep nihyet dima au lewo Noni ris bije.

¹¹Jo nibreisi mem je bipia gino nibou ndig mem mben Asyur kon pran bit minu di tou minu di tou lene timiei minu dima yahagom icut bak noni hak ug. Ma jikan bipia mijingwes ngun au.

¹²Didigup bat-didigai bat nya ikon pran bit minu ndig Gozan kin Haran kin Rezef ba, icok tut hagom bingwig lene ihwen mben Eden di ibong ei Telasar cem. Bit bon yo dima ide kwar di ikuk yok bak nya iteu yok bingwes ngun kan bi.

¹³Nibou ndig Hamat kin Arpad kin Sefarwaim kin Hena kin Iwa yahagom ingat rin ei siritou njap di ammani i?”

¹⁴Lene Hizkia yai srat dima leu yo di ipwoi kwei leu api kwop hagom. Lene ug ei TUHAN De Ig bidis ei TUHAN Noho bei.

¹⁵ Lene noni ngat nadi bipai “TUHAN di nok Allah mem nye di mben Israel e, agwam ei Ade banggo mbrei dip nai njiriek kerub[11] nya. Nangkom ne Allah rin ba, anyeng tak kep nibou ndig nya bidem dihyeisi dini hagom. Apai tes dihyeisi dini kin mpia-bbed him cem.

¹⁶TUHAN e, ma angig ayai kep mun di cut igkep nye tu. Amiap kep Sanherib nihyet di wer mpiahi tut Na di Allah di niyaijo.

¹⁷TUHAN e, nahagom nikan tut bipia nibou ndig mem mben Asyur nya icok tut mben dihyeisi dini imang bibor binggek tut ide minu hagom sar bingwig.

¹⁸Lene indig yo dima ide kwar nya kep hum tu. Lewo kwar dima yok isindem bi. Tungwatu dihyeisi dini iba biei kin tig bibon hagom bou inda him he.

¹⁹TUHAN di nok nyende Allah e, ma ateu nye biningwes ngun leu mben Asyur inda nsi leu binhyepo jo nibreisi mem mben dihyeisi dini hagom bipia Nangkom ne Allah nijit ri.”

²⁰Lene Yesaya sok nihyet bak Nibou Ndig Hizkia bipia TUHAN buhup nide nadi tu.

²¹Bisimbot dat “Na di Sanherib e, timiei minu ndig Yerusalem ipa ndip nani ba, iba na bikek.

²²Akan tut No po aba angon di jei bibor kucang ba, ahyet wer mpiahi tut pima ninyeng bi e? Lewo angwes om kep Da di kwes-kwau di mben Israel ide Allah.

²³Aba angon di jei bitri tut biDa tug hon yo po acuk yok kwei pima bipia aba ade kroba pran hagom bipos nungug jei nya ei Libanon. Aba angon di jei bitri tut biDa bipia awim buom Libanon di jei bibor ba, dia-diau kei cem. Lene acoi kikau ug ei baham nitindurti dima cem.

²⁴Aba angon di jei bitri tut biDa bipia atig minyei bousi nya ei angkiaisi ba, ade tentara nya ico-co nyen kep Minyei Nil ningwa dip bibindei ba, hagom pingge leu su cem.

²⁵Amiap e, Da di TUHAN dikos tut ayai munti nya hagom habiei ei nimbie him tu bi e? Lene hagom dem igbit dikos tutti tu. Dibindei ba, ayai nisindemti leu binhyepo akon pran bit minu di sindem nya lene abindei ba, hagom sar bingwig.

²⁶Akon pran bit timiei minu dima yok lene isindem bi ba, ittin tut ba, idigit tut cem. Lewo inok minta bidem susti kin minta di hei ei ig bou ninjek dip di mui bingwig tirigi hou di dut bibor cut kwei leu mpia nipriti.

²⁷Dikan bidem tut ayai munti nya kin ambutti nya hagom.

²⁸Dikan tut bipia angon sibui sut Da nindig bibor. Lene dimiap tut ade ningon jeisi cem. Nogindini midiba mun koisi srou ahwap jou lene diba kuk kin ngkimom nitu buhum ahui leu binhyepo dijem na hanyen ug ei ade minu kak puig di ambut kak tirigi po akwei leu pima.”

²⁹Lene Yesaya pai bak nibou ndig Hizkia “Mun di bindo tut nipek kep mem jeti dima hagom rinok gini. Ari bingwam dini kin ari bingwam di nidipti bu mijikos gandum sisron kwei nok njita mem je. Noro hon kep ari bingwam niningai kui mijiyai miai gandum leu api mijikos gandum nitu kwei leu jide beisi nya ba, jita ba anggur kioi leu api jipuk ba anggur ningat ri.

³⁰Timiei Yehuda nya di ingwes ngun bimai bigyo mibong kei migwam kei dem kep nok biei nya di com nigau ug ei dihyei jou bingat ningat mang.

³¹Timiei minu ndig Yerusalem kin timiei Nungug Sion nya mporo ingwes ngun ba, imai bi. TUHAN kos tut mem gima mun dini yok mipek kep mem yok tu.

³²TUHAN pai sut nibou ndig mem mben Asyur bipai bipia noni micoi kwei ei minu ndig dini ba, prindei tibor gom bi sren! Tentara di ittei ide mun di ibipukep ser tibor nggwen nya midideu minu ndig dini ba, ibon dihyei nindenti kui ngug tig di bikrop ttai minu dini bi sren!

³³Nibou ndig mem mben Asyur mingkwei hanyen ug ei nide minu bimbut kak puig di noni mbut kak tirigi po kwei pima. Noni micoi kwei ei jide minu ndig dini bi sren. Dani ne TUHAN rin ba, dipai sut tu.

³⁴Midicuon ser minu dini niyaisi bidiya ser jide siceu nya cem. Tug hon nisinati dima lene tungwatu nya mikuk yok biDa. Mun po dipreu ei mem Ditde awak di Daud pima mipek kep mem je.”

³⁵Himmun dima ne TUHAN de malaikati gom kwei ya bidem tentara Asyur ide prak meng yati bihwen ibou sribu sratus ningot muhwindaningai sribu muhwi ba, imai. Njap dihyep bu lene nimbiam nya jo sinsiou bidem mpia dima hagom.

³⁶Lene Sanherib di nok nibou ndig mem mben Asyur om no leu bingkwei hanyen ug ei Niniwe.

³⁷Jei bi lene noni coi ug ei ig kwar nibousi bikuk no bak nide kwar Nisrokh lene nipmot bat cin di Adramelekh kin Sarezer iba ide simeda bitot noni bimai leu api inang ug ei minu Ararat. Apino Esarhadon di nipmot hi kin bu ya luei nohoti nok nibou ndig.