Read Hatam NIBOU NDIG NYA GI NICAN 24 Bible Online

NIBOU NDIG NYA GI NICAN 24 - Hatam bible

NIBOU NDIG NYA GI NICAN 24

¹ Nebukadnezar di nok nibou ndig mem mben Babel kwei bindei timek timiei Yehuda nya mem nijam di Nibou Ndig Yoyakim ninyeng tak kepti dima. Apino Yoyakim ne Nibou Ndig Nebukadnezar de awak kikau mem nijam ari bingwam ningai ri. Niabiati bu lene kiek nimig jou tut noni.

²TUHAN pinak nimpung nikon minggwen nya leu minu Babel kin Siria kin Moab kin Amon hagom mem gima ikon pran bit Yoyakim ba, ibindei timek timiei Yehuda nya. Gima dem igbit mun di TUHAN pai nipou su tug hon nide awak di nabi nya.

³Ba, ningat ne suar hukum dima cut igkep yok bit leu TUHAN nikos tutti leu binhyepo bijji yok leu minu di Noni yai biyok pima drek dip sisar nyeng hagom di Nibou Ndig Manasye bon kep nya ba,

⁴ningat-ngat rino drek dip gi noni yai nimai bak yo di ingon ngun pima yok cem bibie ug e. Bit bon TUHAN kos ser Manasye niyai munti di kinei bibor dima kan bi.

⁵Nibou Ndig mem mben Babel ninyeng tak kep minu nisurti-nipekti ei Minyei Efrat nyai kikau ug bipek kin minu Mesir niya kwas yamti bei nijjai di nibou ndig mem mben Mesir ninyeng tak kep. Hon kep nijam dima kwei bit bon nibou ndig mem mben Mesir njei sut nide tentara mem gima yuug kon pran bu kan bi. Nipas kep tut Yoyakim niyai munti nya jo ei srat Nibohon Nibou Ndig Mben Yehuda Nyati. Tirigi noni mai leu lene Yoyakhin di nipmot kui bigwam nok nibou ndig mem timiei Yehuda nya biya luei nicig nohoti.

⁸Tirigi Yoyakhin de njap ug ei ari bingwam simnaimuhwidip brimigtehiningai tu lene timiei Yehuda nya ita noni nok nibou ndig leu api ninyeng tak kep limwa nya mem bed nitindur ningai he. Yoyakhin nipmem ninyeng Nehusta lene Nehusta nicig Elnatan leu minu ndig Yerusalem.

⁹Yoyakhin yai bram nicig niyai kepti bibon sisar tut TUHAN.

¹⁰Tirigi ninyeng tak kep yok ne Nebukadnezar di nibou ndig mben Babel de nibou pran nya injei sut tentara Babel kwei bigyon ttai minu ndig Yerusalem.

¹¹Jei bi lene Nebukadnezar nonti kwei ya tut nide tentara di igyon ttai minu ndig dima,

¹² leu api Nibou Ndig Yoyakhin kin nipmem kin nimunggwom bat nya kin nide nibou pran nya kin yo di igya kui noni yahagom ikes yonti ei mben Babel indati ba, Yoyakhin sima hukum. Mun dini cut igkep yok tirigi Nebukadnezar ninyeng tak kep mben Babel mem ari bingwam muhwindaningai su.

¹³Lene Nebukadnezar cat mun nyeng gi hi di Nibou Ndig Salomo ba mas bibon leu TUHAN De Ig kin nibou ndig de ig ba, nggek tut hagom lene pwoi ndigban di nibok kui hagom bingkwei sut ug ei minu Babel. Gini hagom dem igbit TUHAN nipaisi.

¹⁴Nebukadnezar kat timiei minu ndig Yerusalem nya kin nibou ndig nipmot bat nya kin yo di inyeng jei nya yahagom ba, isima ei ingkiaisi. Lene noni kat tukan ngkimom nitu nya kin tukan nindigsi nya cem ba, isima ei ingkiaisi. Noni buwak yok bingkwei sut yok hanyen ug ei minu Babel ba, yahagom imangti ibou sribu simnai. Noro Nebukadnezar sindui sut yo di yuhui mbum bibor nya ba, yongkom ibong ser minu ndig Yerusalem kikau.

¹⁵ Nebukadnezar kat Yoyakhin bitut nipmem kin nitnem bat nya kin nide nibou pran nya kin yo di igya kui noni yahagom ba, isima ei ingkiaisi.

¹⁶Noni kat andigpoi di inyeng jei nya ibou sribu muhwindacan kin tukan ngkimom nitu nya kin tukan nindigsi nya yahagom ibou sribu gom di isindem ba, ikon pran kan cem bingkwei sut yok ug ei minu Babel.

¹⁷ Lene noni ta Matanya di Yoyakhin nipmum nok nibou ndig mem timiei Yehuda nya lene luei ninyeng Matanya ei ninyeng Zedekia bu.

¹⁸ Zedekia de njap ug ei ari bingwam nyatungwagom ba, gom tu tirigi kinyon ei ninyeng tak kep limwa timiei Yehuda nyati. Ninyeng tak kep yok ei minu ndig Yerusalem mem ari bingwam simnaibrimiggom. Nipmem ninyeng Hamutal di nicig Yeremia leu Libna.

¹⁹Noni bon sisar tut TUHAN bit leu nok Nibou Ndig Yoyakim niyai kepti nipou su pima.

²⁰ Gima rino TUHAN ningon sibui sut timiei Yehuda kin minu ndig Yerusalem nya nindig bibor bijji yok bingwig leu niyai him.