Read Hatam NIBOU NDIG NYA GI NICAN 4 Bible Online

NIBOU NDIG NYA GI NICAN 4 - Hatam bible

NIBOU NDIG NYA GI NICAN 4

¹Mpe di gom ne sop gom di nijjep ne nabi rin noro mai leu su ug ngat Elisa bipai bak “Andigpoi e, dijjep mai su! Akan kep bipia noni ne no di bit Allah nihyet ri. Noni dahat ningwam leu tungwagom ba, nogindini no dima kwei lene mikat dipmot bat cin leu da ba, ubon yok nok awak drek dip ningwam po dijjep di mai su dahat ei pimati.”

²Elisa hig ser “Midimpu na notou i? Ade mindei yo rijo ei ade ig i?” Lene kibom dima buhup “Mun nyeng hi jo bida bi. Gi jo ndia rino mini zaitun ampou mien gom ngat he.”

³Elisa pai bak “Ma aug ngat ade yo di ibong ttai na nya ba, ayai ampou ngwak nya mang-mang leu yok.

⁴Tirigi ayai hagom tu lene aya tut apmot bat cin pima ba, jicoi ug ei ig bei leu api jinggam mbou ser je. Lene ma ahug mini di jo ampou mien dimati ei ampou ngwak ngot dimati lene akon ampou di ut tu nya keyam bijo ter leu gi ngwak nya.”

⁵Sop kibom dima ngkwei hanyen lene ya tut nipmot bat cin bicoi ug ei ig bei leu lene nggam mbou cem. Leu api yai ampou mien tut mini zaitun pima buhug ei ampou ngwak di nipmot bat nya isu binoni nyati.

⁶Ampou dima yok hagom ut ser tu lene hara yok tut ampou ngwak hi kin bu noro nipmot bat cin dima gom pai bak “Ngwig su.” Lene mini dima pingge bibiam leu ampou mien pima bu bi.

⁷Leu api noni ug ngat Nabi Elisa hanyen lene Elisa pai bak “Ma atri mini dima yok ba, abipek mitiei leu binhyepo abigo ningwam pima. Lene niken di jo nya midem mem nani kin apmot bat cin jibibong kei jibigwam kei.”

⁸Mpe di gom bu ne Elisa ug ei Sunem. Lene sop timiei Sunem gom cigit noni kui ig bingei njita mem noni. Gima rino tirigi noni ngkwei-ngkwei nyen kep Sunem lene noni gwam sindam biyem njita bit noni.

⁹Lene sop dima pai bak nijjep “Dikan tut mungkun bipia no po ngkwei-ngkwei nyen biyem njita bit sa pima ne Allah de awak hi ri.

¹⁰Nnaba sitap nghim nsi gom ei ig ninjek dip hu kwei mem noni. Ma sikon nibongti kin meja kin bilen kin njeng mbrei eisi leu binhyepo tirigi noni kwei cem kep sa lene mibong ei nghim nsi dima.”

¹¹Mpe di gom lene Elisa kwei hanyen ei Sunem lene kui ug ei nghim nsi dima bibong kep ninghuisi leu su.

¹²Noni cuk Gehazi di nide awak gom bipia ug buwak sop pima kwei ngat noni. Noni kwei su lene,

¹³Elisa pai bak Gehazi “Ma ahig ser sop dima bipia diba mindei birop binoni hanyen tut mun di noni yai bisa dini hagom i? Mpaba noni joi sut gima duug pai sut nisingat tut sati bak nibou ndig e, he nibou pran e, leu binhyepo isingat tut noni e?” Lene sop dima buhup “Dibong bit dide bat nya kin ditde mbier nya ei ditimieisi dini ba, disuar mun nyeng hi bi.”

¹⁴Elia hig ser Gehazi “Dibon ndei noni notou i?” Lene Gehazi buhup “Noni yai nipmot hi bi ba, nijjep wer andig-ndau leu su.”

¹⁵Elisa pai bak Gehazi “Abuwak noni kwei bida. Gima rino sop dima kwei ya dimbou heisi.”

¹⁶ Leu api Elisa pai binoni “Ari bingwam di nidipti bu ei bed di nok gini lene mporo ahon apmot gom kin na.” Lene sop dima buhup “Andigpoi e, ma aris mun bida au! Lewo nani ne Allah de awak ri.”

¹⁷Ari bingwam nidipti bu ei bed di nok gi pima lene noni yai nipmot gom bit leu nok Elisa nipreu ei mem noti.

¹⁸Ari bingwam poi ser tirigi bed dem mem ikos gandum kwei leu beisi lene mot dima ug ngat nicig mem mpia nipriti. Nicig ya tut nide awak di ikos gandum kwei leu beisi nya.

¹⁹Tirigi noni ningat rin bit nicig lene noni ba nihyet nindig bahara kros bipai “Aye! Dibou ngwak dut nindig bibor.” Gima rino nicig cuk nide awak gom bipia usap mot dima hanyen bak nipmem ei ig bei.

²⁰Awak dima usap noni hanyen bak nipmem leu api nipmem kes bibong nimigsi kikau bipek mpia huk pijum lene mai.

²¹Gima rino nipmem kon ningut bikui sut ug ei Elisa de nghim nsi lene kes ei nibongti lene boom no leu ninsi dima leu api nggam mbou ser.

²²Lene noni ug hig nijjep kwei bipai binoni “Ma acuk ade awak gom kwei bijem keledai ningut gom cem kwei. Suar da duug ngat Nabi Elisa haninyai leu api jei bi lene midikwei hanyen.”

²³Nijjep hig ser noni “Nggon rino ambut mem njap di ammani i? Njap di ammani ne Njap Nigwam Kep Ninghuisi kin Njap Ndig Bed Jep bigyo.”[2] Noro nitnem buhup “Nok ug e. Dimbut hak ug.”

²⁴Noni cuk awak dima bipia tin ei keledai lene pai bak “Gino dipai mun nyeng hi bina kak puig sinon bi lene ma abindei ba, keledai dini dor sindem bibor kikau.”

²⁵Lene noni mbut buug ngat Elisa ei Nungug Karmel. Tirigi Elisa ngat lo, noni tau ei minu ting bibor lene pai bak nide awak Gehazi “Angat i! No di bri keledai ma kwei ne sindig timiei Sunem pima ri!

²⁶Ma abipbur ba, ahig ser noni tut nonti kin nijjep kin nipmot yahagom nok gi kei e?” Lene sop dima buhup Gehazi nihyet “Nahagom nok gi kei.”

²⁷Tirigi noni kwei ngat Elisa lene kuk no ei nimig him binggriou nimig mbuk hacem. Lene Gehazi tin ei njei noni ug ei nisai lo, Elisa pai ser “Nok ug e! Jo nibreisi bipia ningon ngguk bibor. Noro TUHAN mbot kep tut noni bida bigyo.”

²⁸Sop dima pai bak Elisa “Andigpoi e, nipou ne dahara na tut munggwom bi. Noro mpe dima lene disok kep na di Andigpoi ser nhyema abindei ba, diba dingon com ahyet dima nok mikui-kausi au.”

²⁹Elisa kiek no bitou kep Gehazi lene cuk noni “Abipbur ba, ayai ditde tom ba, ambut tut ug ei sop dini nide igya! Gino aum tungwatu nya kak puig sinon lene ma apigo yok ba, abuhup ide nipigo nati au. Tirigi aug krau ig bei lene ma asu ditde tom dima nai gau nipmot.”

³⁰Lene sop dima pai bak Elisa “Deheng bitug hon Diba dingon gom tut TUHAN di niyaijo ba, dingon gom tut nani cem bideheng tut bipia midikes nani ei bi sren!” Gima rino Elisa kiju bibit sop dima hanyen ug ei nide ig.

³¹Gehazi bie ug ei ig bei bisu tom dima gau mot dima ningut lo, ninnei hi jo mem niyai nggrop bingmai bi. Gima rino noni ngkwei hanyen buum Elisa lene pai binoni “Mot dima bit bon da niyai bikiju bi.”

³²Tirigi Elisa kwei krau ig bei lene nongkom coi ug ei nghim nsi dima bingat lo, mot dima mai su ba, ningut no jo Elisa nibongti.

³³Gima rino noni nggam mbou bingat nadi bak TUHAN.

³⁴ Lene noni kou kep nimai ningut bikes nuhui kin niyai kin ninda hammi mot dima nuhui kin niyai kin ninda. Tug hon niyai munti dima lene Elisa ningut dut pijuk mot dima ba, ningut dut.

³⁵Elisa kiju biya-ya nyen ei nghim nsi dima leu api kuk no bikou kep nimai ningut hanyen. Lene mot dima mihin mbimuhwindacan leu api da niyaia.

³⁶Lene Elisa hig Gehazi kwei bicuk noni bipia ug buwak mot dima nipmem kwei. Tirigi sop dima kwei su lene Elisa pai binoni “Gini ne apmot ri.”

³⁷Noni kuk no biba ningwak bikik dihyei ei Elisa nimig him leu lene usap nipmot behei sut noni ug ei nisai.

³⁸Mpe di gom ne ninggum di buhun kieng kep minu dima hagom. Gima rino Elisa ngkwei hanyen kwei ei Gilgal. Tirigi noni ngginau nimpung nabi nya gom lene cuk nide awak ba, ug yai yeng di nindig bingei njita mem nimpung nabi dima igyem.

³⁹Nabi gom leu nimpung dima hei leu ikieti ug ei miaisi binggok simeng leu api ngat ati sisron ningat lene ya kep bipuk nimangti nok gi dem mem yok bikwei sut lo, kan tut ati sisron dima ninyeng bi noro gwam kep bikos leu api kwen hagom ei yeng di jo humti pima.

⁴⁰Tirigi mui su lene noni ket bikwas tut nabi dima yok yahagom. Noro tirigi sindi yahap iji bigyem lene yahara Elisa “Andigpoi e, mun di pu nye di mimai sut ri!” Leu api ikou sut njita dima bigyem bi.

⁴¹Gima rino Elisa cuk biyai tepun poi mien ba, bahap njita di jo yengti dima. Leu api pai bak nabi “Akwas njita dima hanyen tut yok.” Tirigi igyem njita dima lene jo nibreisi bipia mipu yok bimai sut bi.

⁴²Mpe di gom bu lene pinai gom jo leu Baal-Salisa bittei gandum ningat di sindi ikos leu miaisi kin roti nindak nyatungwagom di iba gandum ngat di ikos nimbie him ngat ei ari bingwam dima bikwei yai bak Elisa. Lene Elisa cuk nide awak bikwas roti nindak dima hagom tut nabi dima yok.

⁴³Noro awak dima buhup “Bit bon roti nindak poi he dima dem ibou sratus gom kan bi.” Noro Elisa buhup “Akwas hak tut yok leu binhyepo igyem. Lewo TUHAN preu ei bipia yoni migyem roti dima bindei yok leu lene niken jo.”

⁴⁴Awak dima kwas roti tut yok ba, igyem. Tirigi yahagom igyem bindei yok tu lene niken jo bit leu TUHAN nipreu eisi pima.