Read Hatam NIBOU NDIG NYA GI NICAN 7 Bible Online

NIBOU NDIG NYA GI NICAN 7 - Hatam bible

NIBOU NDIG NYA GI NICAN 7

¹Lene Elisa buhup “Ma angig atingou mem TUHAN nihyet! Njap di hyep bu mem mpia di nok gini lene mitiei perak nitig gom midem mem gima ibipek gandum di kei bibor kilo ningai ba, gandum-barli ningan kilo muhwindagom cem.”

²Noro nibou ndig nitom pai bak Elisa “Mbro nok gino TUHAN pinak gandum kwei leu gwamti mem nye lo, bit bon mun di apai dima mipek kep mem nye kan bi!” Lene Elisa buhup “Mbigom lene ma angat mun dima yok bou ayai him noro ayem njita dima bi sren.”

³Njap dima ne pinai nya ibou bitai di bras di buhun bibor yem yok ibong bas ei ngug tig di bikrop ttai Samaria nisai. Lene ipai cuk yam “Nggon rino ibong nyahan ei sirini kikau ba, imai kep i?

⁴Gino icoi ug ei Samaria lene mimai inggum. Gino ibong ei mpia dini lene mimai hak. Gima rino ma yuug ei tentara Siria ide prak meng yati. Gino igyai nimai binye lene nna ug. Mpaba isindui sut nye ba, igyaijo.”

⁵Gima rino tirigi mpia jinjui su lene imbut ug ei tentara Siria ide prak meng yati. Ikwei krau lene ingat lo, tentara yahagom inang leu su,

⁶lewo imiap gi TUHAN bindei ba, nibimbi dem kep nok tentara nimpung di nindig bibor gom di ibri kuda kin kroba kwei bihwen yok. Lene ikan bipia nibou ndig mem mben Israel njei siceu bit nibou ndig mem Het kin nibou ndig mem mben Mesir ba, mbigom yahagom mikwei hwen yok ug ri.

⁷Gima rino mmun dima tentara Siria yahagom inang bingwes ngun leu ba, ikes ide prak meng nya kin kuda nya kin keledai nya ei ba, hagom jo nijoti.

⁸Tirigi ibou bitai dima ikwei krau prak meng yati nuhui dip lene icoi ug ei prak meng behei gom bigyem njita bidut ba anggur ngei. Lene igyai perak kin mas kin sinsun hagom ei prak meng behei dima bimbut tut leu api iku hagom nyahan. Lene ikwei hanyen bicoi ug ei prak meng behei gom kin bu bigyai bit leu nok gima hanyen bu.

⁹Lene ipai biyam “Ide niyai munti dini kei bi. Mun di kei bibor pek kep mem nye. Gino ikimut yuhui tut lene gini dem tut bi. Handei kon ba, itri tut mun dini yok bak timiei nindigsi nya. Gino ibet ingon mem njap tekti lene jo nibreisi bipia nyeni mitug ndei hukum drek dip. Jikwei ba, nogindini nyeni yahagom yuug pai brei bak nibou pran nya di igya kui nibou ndig.”

¹⁰Gima rino ijo leu tentara Siria ide prak meng yati bingkwei hanyen ug ei Samaria. Lene ihig tentara di igya ser dimbou hui kwei bipai biyok “Nuug ei tentara Siria ide prak meng yati lo, ningat tungwatu nya hi bi. Tentara Siria ipas kuk tut ide kuda nya kin keledai nya bi noro hagom igya igyati ba, prak meng nya cem jo nijoti.”

¹¹Lene tentara pima yok ipai sut nihyet di kei dini leu api ighyet dima tibim kikau ug ei nibou ndig de ig.

¹²Mbro nok gino mmun mau noro nibou ndig kiju leu nibongti lene pai bak yo di igya kui noni “Jimiap e, dikan tut tentara Siria dima yok ingon kanti. Ikan tut bipia nyeni inggum bibor. Gima rino ikes ide prak meng yati ei ba, yuug kos dik ei susti. Ikan bigya nyeni yehei leu minu dini biyuug nggok njita ei ide prak meng yati. Lene yoni mihwen nye leu api mikat nye ug ei ide minu lene yoni mikwei bong ser nyeni ide minu dini.”

¹³Lene nibou gom di ya kui noni buhup “Jo nibreisi bipia mun di cut igkep nye di timiei minu dini di igyaijo yo dini noyam kin mun di cut igkep ide bat di imai su nya. Gima rino ma nyeni ijem ide kuda ningut muhwi kwei leu kuda nindigsi di jo binye leu api icuk yo di ibri kuda kan nya ug ei prak meng yati dima leu binhyepo inggok tut mun di pek kep mem tentara Siria.”

¹⁴Lene idimig ibou poi leu api yo dini ibri kroba pran ningut can biyuug nggok tut mun di pek kep mem tentara Siria bit leu nok nibou ndig nicuk yoti.

¹⁵Yo dini imbut kikau ug bipek Minyei Yordan bingat lo, tentara Siria ide sinsun kin ide mun di inyeng tut nya hagom gimahap kak puig di inang kak pima. Lene ingkwei hanyen bitri tut mun di ingat bou igyai him hagom bak nibou ndig mben Israel.

¹⁶Lene timiei Samaria yahagom ibipbur ba, idor ug ei prak meng yati pima bigyai mun nyeng hagom leu tentara Siria. Apino tungwatu nya iba mitiei perak nitig gom ngat bipek gandum di kei bibor kilo ningai ba, gandum-barli ningan kilo muhwindagom cem bit leu nok TUHAN nipaisi pima.

¹⁷Mpe dima lene nibou ndig nitom pima ya ser dimbou hui di itu ei ngug tig Samaria. Tirigi timiei minu dima yahagom yehei leu dimbou heisi dem kep nok nimpung di dimbun kei gom lene injei no dima ug ei dihyeisi bico kep noni binem-nnai bimai hak ug. Mun dini dem igbit Elisa nipai sut noti tirigi po nibou ndig kwei cem kep noni pima.

¹⁸Lewo mpe dima lene Elisa pai bak nibou ndig “Njap di hyep bu mem mpia di nok gini lene mitiei perak nitig gom midem mem gima ibipek gandum di kei bibor kilo ningai ba, gandum-barli ningan kilo muhwindagom cem.”

¹⁹Noro nibou ndig nitom pai bak Elisa “Mbro nok gino TUHAN pinak gandum kwei leu gwamti mem nye lo, bit bon mun di apai dima mipek kep mem nye kan bi!” Lene Elisa buhup “Mbigom lene ma angat mun dima yok hagom bou ayai him noro ayem njita dima bi sren.”

²⁰Lene mun dima hagom dem igbit Elisa nipai sut noti. Timiei minu dima injei noni ug ei dihyeisi ei dimbou heisi ei minu dima bico kep noni binem-nnai bimai hak ug.