Read Hatam NIBOU NDIG NYA GI NICAN 9 Bible Online

NIBOU NDIG NYA GI NICAN 9 - Hatam bible

NIBOU NDIG NYA GI NICAN 9

¹Mpe dima lene Nabi Elisa hig nabi di pilei yo gom leu nabi ngot di noni ngginau yok dima ikieti kwei bipai bak “Atin ei ba, apwoi ampou di mini zaitun joti dini ba, aug sut ei Ramot ei hanjop Gilead.

²Tirigi aug krau minu ndig dima lene ma anggok ser Yehu di Yosafat nipmot ba, Nimsi nignyon. Ma akri ninda ba, abidip huk noni leu binhyepo jicoi bijengkom ug ei nghim nsi gom,

³leu api asiber mini nibon midut dini ei nibou nggram him lene abipai bak ‘TUHAN simbot dat bipia Noni kon nani ba, anok nibou ndig mem mben Israel.’ Tirigi abon midut dima bingwig su lene ma abipbur ba, anang leu mpia dima haninyai.”

⁴Gima rino nabi di pilei yo dima kiju ba, ug ei Ramot,

⁵leu api ngat Yehu kin nibou tentara nindigsi nya di idem yam bisimbot kep mun biyam ei sirima. Lene Nabi dima ya dideu Yehu bipai bak “Andigpoi e, dikwei sut nihyet gom mem na di Andigpoi.” Yehu hig ser “Nihyet dima mem tou i?” Lene Nabi dima buhup “Mem na di Andigpoi nangkom.”

⁶ Yo cin icoi ug ei ig bei leu api nabi di pilei yo dima krau ampou tut mini zaitun pima bikiber ei Yehu nibou nggram him bipai bak “Mben Israel ide TUHAN Allah pai ‘Diba mini nibon midut dini bikon nani ba, anok nibou ndig mem Ditde limwa Israel nya.

⁷Suar ahwen ade andigpoi di Ahab kin nide ig bei nsi nya yahagom bisar ningwig ug. Tug hon nisinati dima midikes hukum ei Izebel dip drek dip gi po noni yai nimai bak Ditde nabi nya kin Ditde awak di nindigsi nya pima.

⁸Suar Ahab de ig bei nsi nya kin nignyon bat nya yahagom itug ndei nimai ningwig a. Midikes hukum nimai ei bikwop pinai ndigpoi nya kin pinai pilei nya ba, yahagom misar.

⁹Midibibon nide ig bei nsi nya noyam kin gi dibibon nibou ndig mem mben Israel cin di Yerobeam kin Baesa pima ide ig bei nsi nya ug ri.

¹⁰ Tut Izebel ne tungwatu nya mitig bi. Noro nsien nya mibriug ningut bigyem bingwig ei hanjop Yizreel ug ri.’ ” Nabi di pilei yo dima ndat kep nihyet dima hagom bak Yehu leu lene bipbur ba, nang leu.

¹¹Tirigi Yehu ngkwei hanyen ndam nisut bat nya leu api ihig ser noni “Mirei bon dima kwei pai mindei ngan bina ba, bon mindei bit na cem i?” Lene Yehu buhup “Mei, jikan tut tu.”

¹²Noro ibuhup “E bi! Nikan tut bi ba, apai brei binye hak ug.” Lene Yehu buhup “No dima kwei pai sut TUHAN nihyet di sok ei dip bipia TUHAN kon dani ba, midinok nibou ndig mem mben Israel.”

¹³Tirigi Yehu buhup ighyet rino nisut bat nya ijuk ide sinsun ndok di jei ba, ibingig lin dip ei Yehu noho bei. Leu api imiep pun mbrei ba, iba ighyet nindig bibor bijem bipia “Yehu ne nibou ndig rin o!”

¹⁴Lene Yehu nya igyok ingon gom mem gima igyai nimai bak Nibou Ndig Yoram di ningat rin bibong ei Yizreel mem nijam dima. Yoram ug ei mpia dima leu binhyepo bong tut nibokti nya di tug ndei ei mpe di ikon pran ei Ramot ba, ihwen Hazael di nok nibou ndig mem mben Siria pima. Lene Yehu pai bak nisut bat nibou tentara nindigsi nya “Gino jice tut ba, dinok nibou ndig lene ma jiya ser dimbou pmem Ramot dini leu binhyepo hi hei bitri tut bak mben Yizreel au.”

¹⁵

¹⁶Yehu sok kep yok leu lene kui ei nide kroba pran dip leu api njei ug ei Yizreel. Mpe dima lene Nibou Ndig Yoram kei bigyo ba, Ahazia di nok Nibou Ndig mem timiei Yehuda nya no cem kep noni ba, ningat rima bit yo.

¹⁷Tirigi tentara gom di ya ei ngug tig dip ser minu ndig Yizreel ngat, Yehu kin nide tentara nya di ikwei dideu tu lene ba nihyet ndig bahara “Tentara nimpung gom rino idideu kwei su o!” Lene Yoram buhup “Jicuk tentara di ba kuda bikon pran kan gom buug nggok tut yo dima gino yoni ne nyeni isut bat nya rin e, he ide siceu nya rin e?”

¹⁸Gima rino tentara gom dima bri kuda buug ngat Yehu lene hig ser “Nibou Ndig hig ser na di Andigpoi bipia aba angon di kwes bikwei ngat noni e?” Noro Yehu buhup “Anggok tut dingon kanti nya au! Aya abia kep da bit tentara nindigsi nya hak ug.” Lene tentara di ya ei ngug tig dip ser minu ndig pima ngat lo, tentara gom di bri kuda ug pima ug krau su noro gingkwei hanyen kwei bi. Lene noni pai mun dima.

¹⁹Leu api nibou ndig pima pinak tentara gom di ter bu bram. Lene tentara gom dini cem hig ser Yehu nok gi pima lene Yehu buhup mbigom bu “Anggok tut dingon kanti nya au! Aya abia kep da bit tentara nindigsi nya hak ug.”

²⁰Lene tentara di ya ei ngug tig dip ser minu ndig pima pai sut hanyen bu bipia no di icuk pima ug krau su noro gingkwei hanyen kwei bi. Lene pai bram biyok “Mpaba no di bie tut nimpung dima ne Yehu ri. Lewo nikrau kroba pranti noyam kin no di mirei bon.”

²¹Haninyai Nibou Ndig Yoram cuk tentara nya “Jitin ei ditde kroba pran mem da.” Lene itin ei kroba pran mem leu api Yoram kin Nibou Ndig Ahazia ibit yam ba, bihi bri nide kroba pran lene bihi cem bri nide kroba pran ba, yuug um Yehu ei miai di Nabot ninyeng tak kep nipou pima.

²²Lene Yoram hig ser Yehu “Aba angon di kwes bikwei nok disut rin e?” Noro Yehu buhup “Notou midikwei nok asut tirigino yo di nung kui yok nya imang bibor kin yo di ikuk yok bak kwar di apmem Izebel bindei bikieng kep mpia dini yo rinaha yo i?”

²³Yoroma miap nibuhupti dima tu lene Yoram hara “Ahazia e, no dini ne no di ham nimbuk kep da rin o!” Hara nok lene kiek nide kroba pran haninyai binang.

²⁴Lene Yehu ba nibbu bikri nide tibor ba, biprindei Yoram ninghim bikus leu bindei ningon him cem. Lene noni tti bimai ei nide kroba pran nsi.

²⁵ Leu api Yehu pai bak Bidkar di nok tentara gom di hati tut noni “No ayok ngon kep mpe di po sibri kuda pran ba, sibit Ahab di Yoram nicig pima yo e? Mpe dima lene TUHAN pai bak Ahab ‘Dikan tut no di yai nimai bak Nabot kin nipmot bat nya annani tu ba, dipreu ei mem na bipia midikes hukum ei na dip ei miaisi dini cem yo.’ ” Lene Yehu binut nihyet bu “Gima rino ma akon Yoram ningut ba, anjei ug ei miaisi di Nabot de dima hak ug. Leu binhyepo Allah nikes hukum ei noni dip dima mimbut bicut igkep noni hak ug.”

²⁶

²⁷Tirigi Ahazia ngat mun di cut igkep Yoram dima lene kui ei nide kroba pranti binang ndam minu ndig Bet-Hagan. Lene Yehu huk bram noni bicuk nide tentara nya “Jiyai nimai binoni cem!” Leu api iprindei noni bikinei ei puig di ug ei Gur dideu minu ndig Yibleam. Noni nang tut nibok kikau ba, ug krau Megido leu api mai ei sirima.

²⁸Lene nibou nya di igya kui noni ikon ningut ba, iba kroba pran bittei hanyen ug ei minu ndig Yerusalem. Leu api itig ei jui nsi di ibet ei mem itig kep nibou ndig Yehuda nya eisi ei Daud De Minu Ndig.

²⁹Ahazia kui bigwam nok nibou ndig mem timiei Yehuda nya ei mpe dino Nibou Ndig Yoram di Ahab nipmot ninyeng tak kep mben Israel mem nijam ari bingwam simnaibrimiggom tu.

³⁰Lene Yehu ug krau Yizreel. Tirigi Izebel miap tut mun di cut igkep Ahazia nya pima tu lene pri nibou ba, ba buk bidip niyai nggrop cem leu api su nibou ei kendera mihyeti ei ig nibou ndig bimian ser nimo jug.

³¹Tirigi Yehu coi kak dimbou pmem ei minu ndig dima lene Izebel hara bak “Nihwen kep mun cig Zimri e,[4] akwei mem mindei ngan i?”

³²Lene Yehu kiek no bitou kep kendera mihyeti lene jem “Tou rino tti kin dani i? Yo di igya kui nibou ndig ibou pwoi di ibong ei ig nibou ndig dima imiap nihyet lene ikiek yok bitou kep nimo jug.”

³³Lene Yehu pai biyok “Jikrau noni bijinjei ug ei dihyeisi.” Leu api injei Izebel leu anai ug ei dihyeisi. Lene Yehu bindei ba, nide kroba pran nimig co kep noni sindem bibindei ba, ninggrom di pio mpia rus ngug tig kin kuda nya di brim kroba pran nya.

³⁴Leu api Yehu coi ei ig nibou ndig dima biyem njita leu api pai “Mbro nok gino sop dima ne sop di tug ndei nisigion noti rin lo, ma jitig lewo noni ne nibou ndig hi nipmisop ri.”

³⁵Awak nide nya yuug kon ningut mem gima itig lene ingat lo, nibou ngwak njum kin ninda pang njum nya kin nimig njum nya he rijo a.

³⁶ Tirigi ipai sut mun di ingat bak Yehu tu lene noni pai “TUHAN tri tut ningon kanti tut sop dima tirigi po mbot kep tut bak Nide awak Elia bipia mporo nsien nya migyem bibriug Izebel ningut bingwig ei hanjop Yizreel ba,

³⁷ninjum nikenti nya mijo sinsiou nyen noyam kin sapi oi apino tungwatu nya mikan igbit tut nimai ngut dima ninyeng bu bi sren.”