Read Hatam NIBOHON MBEN ISRAEL GI NIGOM 10 Bible Online

NIBOHON MBEN ISRAEL GI NIGOM 10 - Hatam bible

NIBOHON MBEN ISRAEL GI NIGOM 10

¹Mpe dima lene tentara Filistin ikon pran bit tentara Israel ei Nungug Gilboa apino mben Israel imang bibor imai ei pranti lo, nindigsi nya yahagom bitut Saul kin nipmot bat nya inang leu.

²Noro mben Filistin yahatap yok bigyai nimai bak Saul nipmot bat nya ibou ningai di inyeng rino Yonatan kin Abinadab kin Malkisua.

³Yo di ikon pran itot yam sindem bibor simiak Saul ei nite hi nite hi apino nide siceu nya iprindei noni bibindei ba, nibok buhun bibor.

⁴Gima rino noni cuk nide awak pinai pilei di ttei kep nide minggwen nya bipai “Ma ahit ade simeda ba, adat da hak ug leu binhyema mben Filistin di igwam TUHAN ninghim dini yok iba da bikek au.” Noro pinai pilei dima ningon kou sut. Gima rino Saul hit nide simeda bitas pijum leu api tti ug ei ninggwenti bimai.

⁵Tirigi pinai pilei dima ngat lo, Saul mai su lene noni cem yai igbit Saul niyaisi pima ba, mai noyam kin niceu.

⁶Nok gima lene Saul kin nipmot bat nya ibou ningai yahagom igyai nimai leu api nide nintun him di bram yam hi ya luei nohoti bi.

⁷Tirigi mben Israel di ibong ei Mbang Briep Yisreel imiap tut bipia tentara Israel inang leu ba, Saul kin nipmot bat nya imai su lene inang leu ide ig nya. Lene mben Filistin ikwei bong ser minu ndig dima yok hagom.

⁸Njap di hyep bu mben Filistin di idem yam ei mem gima ipos ndigban leu tentara Israel ikwei yok igyai kep ingut ikwei su lene ingat lo, Saul kin nipmot bat nya ibou ningai ingut jo ei Nungug Gilboa.

⁹Lene irop Saul nitibou leu ba, ijuk nide sinsun pran leu lene isok tut nihyet di kei dima bak mben Filistin nindigsi yahagom cem bak ide kwar di ikuk yok bak cem.

¹⁰Lene tentara Filistia ikon Saul de minggwen ug ei ide ig kwar gomti leu api ipindur nitibou ei ide ig kwar Dagon nibousi.

¹¹Tirigi timiei Yabesh di ibong ei Gilead ikan tut notou mben Filistin ibibon Saul ningut lene,

¹²ide pinai di mimbri kui ingkek nya ittei yam bimbut kikau biyuug ei mpia dima. Tirigi yuug krau lene ittei Saul kin nipmot bat nya ingut bingkwei sut ug ei Yabesh bitig ei biei tamariska nghousi ei minu ndig dima. Leu api igyem njita bi kikau ei ninsi njap nitindur muhwindacan.

¹³ Saul ba ningon di gom bibit TUHAN kin nicukti nya bi. Apino mai drek dip a. Noni hara TUHAN leu binhyepo TUHAN ndo ningon kanti bak bi. Noro nang ndam nimai nya innei bahara yok bindo ingon kanti bak. Gima rino TUHAN kes hukum ei noni dip lene bitug ninyeng di tak kep limwa nya nok nibou ndig leu noni bikes bak Daud di Isai nipmot bu.