Read Hatam NIBOHON MBEN ISRAEL GI NIGOM 12 Bible Online

NIBOHON MBEN ISRAEL GI NIGOM 12 - Hatam bible

NIBOHON MBEN ISRAEL GI NIGOM 12

¹Tirigi Daud nang leu Nibou Ndig Saul pima ne noni nang kikau ug ei Ziklag. Tentara di ingon gom nya ba, mimbri kui ingkek cem ikwei bicom yam bit noni.

²Yo dini di intun keret Benyamin him di Saul cem ntun yo him iba inda com kin inda prak biprindei tibor kan ba, ikes tig ei bikumsikikti biprindei mun cem kan.

³Ide nibou nya inyeng Ahiezer kin Yoas di Semaa nipmot bat cin leu Gibea. Tentara di mimbri kui ingkek nya inyeng Yeziel kin Pelet di Azmawet nipmot bat cin kin Berakha kin Yehu leu Anatot kin Yismaya leu Gibeon di mimbri kui ningkek ba, ninyeng jei lewo nggre kin Nihwen Mun Cig Ibou Ningot Ningai pima ri. Kin Yermia kin Yehaziel kin Yohanan kin Yozabad yoni leu Gedera kin Eluzai kin Yerimot kin Bealya kin Semarya kin Sefaca yoni leu Harufi kin Elkana kin Yisia kin Azareel kin Yoezer kin Yasobam yoni di intun Korah nide bat nya kin Yoela kin Zebaja di Yeroham nipmot bat cin leu Gedor.

⁸Mpe di po Daud ningat rin ei nide dikti ei iggum ndigsi lene tentara di mimbri kui ingkek di ihwen mun kan nya di intun keret Gad him ikwei bicom yam bit noni. Yo dini ne tentara di iba mun di ibipukep ser minggwen nya leu yonti cem iba micim bikon pran kan cem ri. Mimbri kui tentara dini yok ingkek dem kep nok singa di niten-pos lene ibrim imig noyam kin rusa ninangti.

⁹Yo di inyeng jo daptarti bibit leu inyeng jeisi rini ba, inyeng rino Ezer kin Obaja kin Eliab kin Mismana kin Yeremia kin Atai kin Eliel kin Yohanan kin Elzabad kin Yeremia kin Makhbanai.

¹⁴Yo di intun Gad him dima nite hi ne nibou tentara di inyeng jei di inyeng tak kep tentara ibou sribu gom bibikwop yok ri. Lene bihi bu inok nibou tentara di inyeng tak kep tentara ibou sratus gom bibikwop yok cem.

¹⁵Mpe di gom ei bed gi nigom hangi tirigi Minyei Yordan su lene nibou tentara dima yok isigon Minyei Yordan di su bibor dima biyuug dihip ei nite hi leu api ijji timiei di ibong kep mbang briep nya ei nite bei mpia nipriti kin nite bei mpia nicutti cem leu.

¹⁶Mpe di gom ne tungwatu nimpung gom di intun keret Benyamin kin keret Yehuda him yuug ngat Daud ei dikti di noni bong ser.

¹⁷Daud kiju buug ngat yok lene pai biyok “Gino jikwei nok disut mem gima jitti kin da lene ma jikwei bicom yam bit nye hak ug. Niba ningon di kei bicigit je! Noro mbro nok gino dibon mun di kinei tut je bi lo, gi jingon kanti mijitri dinghapti bak siceu nya lene Allah di idigup bat-idigai bat nya ikuk yok bak kan tut gima leu api mikes hukum ei jeni dip.”

¹⁸Hammi tirigi pai bak nok rino Allah Ninnei sindem tut Amasai di bit yok ba, niabiati bu mitug ndei ninyeng nibou mem nimpung “Nihwen Mun Cig Ibou Ningot Ningai” pima. Leu api noni pai, “Na di Andigpoi Daud di Isai nipmot e, nyeni nahati tut nani! Handei kon ba, aya tut yo di impu na bijibrim jingkek kikau ba, jibingat ningat kep. Allah tti kin na di Andigpoi tu!” Pai nok leu api Daud cigit yok bikon inyeng nok nibou mem nide tentara nya.

¹⁹Tirigi Daud kin mben Filistin injei siceu mem gima ikon pran bit Nibou Ndig Saul lene tentara di intun keret Manasye him nite hi itti kin Daud. Ningat ne mpe dima Daud nonti ya tut mben Filistin dima bi. Noro nibou mben Filistin nya ikuk Daud bingkwei hanyen ug ei Ziklag. Lewo ittin tut leu ma Daud miluei ningon bitti kin Nibou Ndig Saul hanyen baham nimbuk kep yok.

²⁰Tentara di mimbri kui ingkek di intun keret Manasye him po itti kin Daud tirigi po ningat rin ei puig sinon ndam Ziklag pima inyeng rino Adnah kin Yozabad kin Yediael kin Mikhael kin Yozabab kin Elihu kin Ziletai. Nipou ne bikwop tungwagom-gom rinok nibou mem tentara nya ibou sribu gom.

²¹Yo dini ne nikon pran cig di mimbri kui ingkek nya di impu Daud di hwen siceu nya ri. Ei nijam gi nidipti bu ne yo dini inok nibou tentara mem nimpung tentara Israel.

²²Tentara hi kin bu di sindi ikwei su nya ibicom yam bit Daud bikwop njap-njap. Apino jei bi lene Daud de tentara nya bikum eisi ba, imang bibor.

²³Tirigi Daud ningat rin ei Hebron lene tentara di mimbri kui ingkek nya imang ibicom yam bit noni ba, yahati tut leu binhyepo noni kui bigwam nok nibou ndig biya luei Saul nohoti dem igbit TUHAN nipreu eisi. Tentara dima yok imangti rinok gini, keret Yehuda de nintun himti ibou sribu muhwindagom ba, sratus muhwindaningai. Yo dini itti kin Daud tut ide mun di ibipukep tibor ninggwenti di isu ser yok kin ide micim, kin keret Simeon de nintun himti ibou sribu muhwindacan ba, sratus gom di mimbri kui ingkek nya, kin keret Lewi de nintun himti ibou sribu bitai ba, sratus muhwindagom. Yo dini ne Yoyada de tentara nya di ibie tut yo di intun Harun him ibou sribu ningai ba, sratus muhwindacan bitut Zadok di pinjoi pilei gom di mimbri kui ningkek kin nide bat nya ibou ningot can ba, can lene yahagom inok nibou ig bei nsi, kin keret Benyamin de nintun himti (keret di Nibou Ndig Saul ntun him) ibou sribu ningai. Keret Benyamin nindigsi nya iba ingon di gom bahati tut Saul kikau, kin keret Ef(...)

³⁸Tentara di mimbri kui ingkek dima yok yahagom yuug ei Hebron ba, itin ei mem gima ikon pran. Ba, ingon ya mem gima ikon Daud bigwam nok nibou ndig mem mben Israel titut yam. Mben Israel nindigsi nya cem ingon noyam kin yo dima tut gima ikon Daud nok nibou ndig mem yoni yahagom titut yam.

³⁹Tentara dima yok ibong bit Daud ei Hebron mem njap ningai ba, igyem pesta di mben Israel nindigsi nya itin ei mem yok tu. Nok igyem njita ba, ibidut ndia ngei cem.

⁴⁰Keret di ibong ting bibor ei nite bei mpia nijjai cem injei kwei leu ide minu ba, ibinjei sut keledai kin unta kin bagal kin sapi di ipian njita di nindig bibor kwei. Yo dima ne keret Isakhar kin Zebulon kin Naftali nya ri. Njita di injei sut kwei nya ne tepun kin biei ara ngat kin kismis kin ba anggur ngat kin mini zaitun nya ri. Yo dini ijem sapi kin domba kwei mem gima ibui nok mikwau bigyem. Mun di igyai dima yok hagom bindo tut bipia mben Israel yahagom ingon nggei-hi-nggei bibor.