Read Hatam NIBOHON MBEN ISRAEL GI NIGOM 14 Bible Online

NIBOHON MBEN ISRAEL GI NIGOM 14 - Hatam bible

NIBOHON MBEN ISRAEL GI NIGOM 14

¹Hiram di Nibou Ndig ei minu ndig Tirus cuk yo di igya kui noni ibou poi ba, yuug ngat Daud. Lene noni yai biei buom Libanon cem pinak tukan tig kin tukan biei ibou poi cem leu binhyepo ingot ig nibou ndig mem Daud.

²Tug hon nisinati dima lene Daud kan tut mungkun bipia TUHAN ta noni ninghig-niker nok nibou ndig mben Israel ba, ninyeng tak kepti dima sindem bibor mem Nide limwa nya.

³Daud bong ei minu ndig Yerusalem ba, wak nitnem bat ndrim nya ibou poi bu. Lene igyai imunggwom bat nya bihi kin bu.

⁴Nimunggwom bat di nitnem bat nya isrek tut yok ei minu ndig Yerusalem inyeng rino Syamua kin Sobab kin Natan kin Salomo kin Yibhar kin Elisua kin Elifelet kin Nogah kin Nefeg kin Yafia kin Elisama kin Beelyada kin Elifelet.

⁸Tirigi mben Filistin imiap tut mben Israel di ikon Daud kui bigwam nok nibou ndig mem mben Israel titut yam lene injei siceu kwei mem gima ikat noni. Gima rino Daud hei sut nide tentara mem gima ikon pran bit yoni.

⁹Daud njei sut nide siceu nya bisri lo, tentara Filistin igyai Mbang Briep Refaim bigyati ba, icat ndigban nya hagom tu.

¹⁰Tirigi Daud miap tut lene hig ser Allah “TUHAN e, dicoi bidikon pran bit mben Filistin e? Asindem tut da mem gima dibindei timek yok ug rin e?” Lene TUHAN buhup “Aya kep yok ba, akon pran bit yok hak ug. Lewo disindem tut je mem gima jibindei timek yok ug ri.”

¹¹Leu api Daud njei sut nide tentara nya ba, ikon pran bit Filistin nya ei Baal-Perasim bibindei timek yok. Lene noni pai “TUHAN ba dani binggek siceu ide nisindemti noyam kin minyei di su sindem bihwen mun nyeng hagom mbigom ngat hak.” Gima rino ijem mpia dima ninyeng ‘Baal-Perasim.’

¹²Tirigi tentara Filistin inang leu lene ibindei cut ide kwar nya bijo ei mpia dima hak. Tirigi Daud ngat kwar dima yok lene cuk nide limwa nya ba, indig hagom kep hum hak ug.

¹³Jei bi lene mben Filistin ikwei hanyen ba, igya bidem Mbang Briep Refaim ba, icat ndigban nya hagom.

¹⁴Lene Daud hig ser Allah tut yok hanyen leu api Noni buhup “Ahwen yok ei nite dini ug au. Noro jikrop je nyahan bijimbut ug ei nite bei inghim dip nu kwei dideu biei murbei nghousi ug api suar jihwen yok ei mpia dima.

¹⁵Gino jimiap nibimbiti di dem kep tentara di ittei yam kui-juk nyen ei biei murbei nimengti ei ninggrupti lene suar jikiju bijihwen yok. Lewo midiya bibie joho bei bidibindei timek tentara Filistin ug ri.”

¹⁶Lene Daud bon igbit TUHAN Allah nicuk noti dima. Noni ya tut nide tentara nya bikon pran bit tentara Filistin. Leu api tentara Filistin isu jou kep inghim dip leu Gibeon kikau ug bipek kin Gezer.

¹⁷Apino Daud ninyeng di jeisi tibim bidem minu hagom nisurti-nipekti. TUHAN bindei ba, mben nya yahagom idigit tut Daud bibor.