Read Hatam NIBOHON MBEN ISRAEL GI NIGOM 16 Bible Online

NIBOHON MBEN ISRAEL GI NIGOM 16 - Hatam bible

NIBOHON MBEN ISRAEL GI NIGOM 16

¹Brua Gi Preu dima ne ittei bikes ei prak meng nsi di Daud tin ei mem tu. Leu api ibon midut nindig mindhe titut kep humti kin midut nibiyai ningon kwes kin Allahti ei nimbar hum dokti. Iba nibon midut dima bikuk yok bak TUHAN.

²Tirigi Daud bon midut ba, bikuk no bak TUHAN leu su lene pai nihyet di biyai gi kei bak limwa nya tug hon nadi ei TUHAN ninyengti,

³leu api kwas njita tut yahagom. Lene noni yai mikwau di ibam ninghui gom kin roti nindak gom kin kue kismis bitri sop nya kin pinai nya di idem yam ei su dima gom-gom sindam ba, yahagom igyem noyam.

⁴Daud kon Lewi nya ibou poi mem gima ibie tut midut nikuk no bak TUHAN Allah Israel ei Brua Gi Preu dima nuhui a. Lene ibipai doia ba, ibikon TUHAN ninyeng a.

⁵Asaf ne nibou di ya bibie mem yok ri. Lene Zakharia ya kui noni. Idimig Yoel kin Semiramot kin Yehiel kin Matica kin Eliab kin Benaya kin Obed-Edom kin Yeiel ei mem gima ikek nggong mbrei nya. Asaf bui yeng beng ngkimom-tembaga ba,

⁶imam cin di Benaya kin Yahaziel imiep pun mbrei nya ba, ibiya bibie Brua Gi Preu noho kikau.

⁷Gima ne midyai nimbie him ngat di Daud ndo bak Asaf kin nisut bat nya ri. Daud dimig yok ei mem gima ipai doia ba, ibikon TUHAN ninyeng.

⁸Jipai sigyo bak TUHAN bijitri tut ninyeng di jei bak tungwatu nya. Jipui sut niyai munti nya bak mben dihyeisi dini yahagom.

⁹Jipai doia ba, jibinggei sut TUHAN. Jitri tut niyai munti nya di bindei ba, tungwatu nya inga leu sut hagom.

¹⁰Noni ne TUHAN gom ngat di ninyeng jei ri. Ma jingon nggei-hi-nggei lewo ninyeng tak kep nye. Ma yo di yahagom di ikuk yok bak Noni ingon nggei-hi-nggei.

¹¹Jahara Noni leu binhyepo yai nisindemti bijeni. Jikuk je biNoni bijo ninno bijo kikau.

¹²Je di jintun Yakub him di jinok Allah de awak kin je di jintun mben Israel him di jinok Nide limwa di mbus je ei su nya e, jiyok ngon kep mindur di Noni bon nya hagom. Ma jibbwe ser nikos tutti nya au.

¹⁴Ide Allah ne TUHAN ri. Nikos tutti nya hagom bon ninyeng mem tungwatu dihyeisi dini hagom.

¹⁵TUHAN yok ngon kep Nide gi preu di preu ei mem nye. Nipreu eisi dima bon ninyeng bijo ninno bijo kikau.

¹⁶ Noni bon Nide gi preu dima bit Abraham nipou leu api bit Ishak cem,

¹⁷ leu api ngot kep nipreu eisi dima ninghig-niker bit Yakub binok gi preu di jo kikau mem mben Israel.

¹⁸TUHAN pai bak “Midiyai minu Kanaan binani binok ade dihyei ninda rom.”

¹⁹Nipou yo lene TUHAN De limwa nya ibong ngkiai ei minu Kanaan lo, imangti poi mien he.

²⁰Igibong srig mben ngkiai gom ngat ikieti bi. Noro ibong-bong wai ba, ijo leu mben bihi ikieti ug ei mben bihi ikieti bu. Ba, ipri leu minu hi ug ei minu hiter bu.

²¹ Noro TUHAN gisindui sut ba, tungwa hi co kep yok bi. Lewo TUHAN sok kep nibou ndig nya tut yok,

²²“Ma jiwaisi Ditde limwa nya di didimig yok ei su nya au. Ma jibon mun kinei sut Ditde nabi nya cem au.”

²³Tungwatu dihyeisi dini hagom e, jipai doia bijibikon TUHAN ninyenga! Lene jitri tut nihyet di biyai ningon di nggei-hi-nggei bikwop njap. Nihyet di biyai ingon di nggei-hi-nggei dima rino Noni teu nye leu mun di buhun ba, ingwes ngun tu.

²⁴Jitri tut TUHAN Ninyeng Di Jeisi bak mben nya yahagom. Jitri tut niyai munti di nindig bibor nya bak tungwatu dihyeisi dini hagom.

²⁵Lewo TUHAN ne Andigpoi Di Ninyeng Jei rin ba, suar tungwatu nya yahagom inggei sut Noni. Je di tungwatu nya jahagom e, ma jittin tut Noni dor njiriek jide kwar di jikuk je bak nya.

²⁶Mben hiter nya ide kwar nya di ikuk yok bak ne kwar nya he ri. Noro TUHAN ne No di pai tes mpia-bbed him titut yam ri.

²⁷Ba, Ninyeng Di Jei Bibor kin nikei-kau-keisi bicuon Nonti. Nide Ig mpung tut nisindemti kin ningon di nggei-hi-nggei.

²⁸Je di tungwatu nya e, ma jikon TUHAN nikei-kau-keisi kin nisindemti!

²⁹Jikon TUHAN Ninyeng di dia-diau kei. Lene jijem mindhe mem jibui bijindig ei nimbar hum dokti ei Nide Ig. Ma jiba sinsun di pwoi di bindo bipia jingon gom tut Noni bikuk je bak.

³⁰Je di tungwatu dihyeisi dini jahagom jidigit tirigi jiya ei Noho bei! Dihyeisi dini nddong kei ba, bit bon ugwa-kwei kan bi.

³¹Mpia-bbed him kin dihyeisi dini e, ma jinggei-hi-nggei hak ug! Ma jitri tut bak mben yahagom bipia TUHAN dima ne Nibou Ndig ri.

³²Muk ngei kin mun nyeng di joti nya hagom e, ma jigwei bong noyam kin kru di cut di nigwei bong. Miai nya kin njita kioi di joti nya e, ma jiyai nillei hak ug!

³³Biei bigbehei nya mimbos-hi-mbos lewo TUHAN kwei krau mem gima ta ninyeng tak kepti ei dihyeisi dini tu.

³⁴ TUHAN ningon kei sut nye ba, ningon ngakei nyeti jo kikau bijo ninno. Gima rino ma jipai sigyo bak Noni.

³⁵Jipai biNoni “Na Di Allah di ateu nye leu mun di buhun ba, abiyai ningwes ngun binye e, ateu nye biningwes ngun leu mben ngkiai ikieti lene aba nye bicom yam hanyen leu binhyepo nahap niji binipai sigyo ba, nikon anyeng di kwes-kwau cem!”

³⁶Jikon TUHAN Allah Israel ninyeng nogindini cem bijo ninno bijo kikau cem! Leu api mben Israel yahagom ipai “Igbit ri.” Leu api ikon TUHAN ninyeng a.

³⁷Leu api Nibou Ndig Daud ndo midyai bak Asaf kin keret Lewi nindigsi nya leu binhyepo yahati tut mun nyeng hagom di bitut mben Israel ide nibon midut nibikuk no bak TUHANti ei gumihyep di ikes Nide Brua Gi Preu eisi kikau. Yo dini igyai midyai bikwop njap-njap ei mpia dima.

³⁸Leu api Obed-Edom di Yedutun nipmot kin ibou ningot muhwindagom ba, muhwindaningai bu di insi de gom kin noni impu Asaf. Yo di igya ser dimbou pmem nya inyeng rino Obed-Edom kin Hosa.

³⁹Noro indo Imam Zadok kin imam nindigsi nya mem gima yahati tut nibon midut nikuk no bak TUHAN di mbut kep ei gumihyep di idimig ei mem pima ei Gibeon.

⁴⁰Suar yo dima ibon midut nindig mindhe titut kep humti ei nimbar hum dokti bikwop njap tekti kin mmunti. Ibon nok gima bit leu TUHAN niggai serti nya di kes bak mben Israel.

⁴¹Idimig Heman kin Yedutun kin nindigsi di impu Imam Zadok kin imam nindigsi nya pima pijum ei mem gima ipai doia bibikon TUHAN ninyeng tut ningon ngakei tungwatu nyati di bijo ninno bijo kikau.

⁴²Heman kin Yedutun cem inyeng tak kep yo di iba pun mbrei kin yeng beng ngkimom-tembaga pima di ikek kep bibibit doia di ipai bibikon TUHAN ninyenga. Lene yo di intun Yedutun ninsi de him nya igya ser dimbou pmem nya ei gumihyep dima.

⁴³ Leu api yahagom ingkwei ug ei ide ig hanyen. Daud cem ngkwei hanyen bipigo nide ig bei nsi nya.