Read Hatam NIBOHON MBEN ISRAEL GI NIGOM 19 Bible Online

NIBOHON MBEN ISRAEL GI NIGOM 19 - Hatam bible

NIBOHON MBEN ISRAEL GI NIGOM 19

¹Nituti poi bu ne Nahas di nibou ndig Amon mai lene Hanun di nipmot kui bigwam nok nibou ndig bu biya luei nohoti.

²Leu api Nibou Ndig Daud pai “Nahas ne sisut di ningon gom ri. Gima rino suar sijem sisut bit nipmot Hanun cem.” Gima rino Daud pinak nibou niya hacanti ba, yuug ei minu Amon leu binhyepo igwam ser Hanun ningon ei nicig nimaisi dima. Tirigi yuug krau minu Amon,

³lene nibou nya ei minu dima ipai bak Nibou Ndig Hanun “Na Di Anyeng Jei e, ma akan bipia Daud ba ningon di ngguk bipinak nibou niya hacan nya kwei drek dip na di Anyeng Jei acig nimaisi e? E bi! Daud pinak yok kwei nok yo di igyok itta kep ide minu dini rin ba, ikwei yok igyai kep minu ndig dini leu binhyepo noni mibindei timek nye ba, yai ide minu dini biyati ri!”

⁴Gima rino Nibou Ndig Hanun kat yo di igya kui Daud pima bikak yuhui nta leu cem kos sinsun di ide leu yok bijo sur intig bou hak cem leu api cuk yok bingkwei hanyen.

⁵Noro immai sut gi ingkwei hanyen ug ei ide ig a. Gima rino yuug ei minu ndig Yerikho. Tirigi mun di cut igkep yok tibim ei Daud nitingou nsi tu lene noni sok mem yok leu binhyepo ibong hak ei sirima bibou yuhui nta dima hei hanyen ug e.

⁶Lene Nibou Ndig Hanun kin mben Amon ingon huk niti bipia ibon munti dima bindei ba, Daud ningon sibui sut yok. Gima rino ipinak perak kilo sribu ningot ningai bitai ug ei minu ndig Mesopotamia Bei Nai cem ug ei minu ndig can di Maakha kin Zoba ei minu Siria cem. Iba perak dima bingot kep nibou nya leu kroba pran ningat sribu ningot ningai can kin tentara di iba kuda bikon pran kan nya cem. Leu api nibou ndig Maakha de tentara ikwei sut kroba pran di mben Amon iba perak bingot kep nibou leu pima hagom ba, yohok ide prak meng yati dideu ig kumti Medeba. Mben Amon cem yahagom injei kwei leu ide minu ndig nya hagom binjei siceu mem gima ikon pran bit Daud.

⁸Tirigi Daud miap tut tu lene noni cuk Yoab binjei sut nide tentara nya hagom mem gima ihwen ide siceu nya.

⁹Mben Amon injei siceu leu ide minu ndig ba, idimig ide nimpung tentara nya igyati ei dimbou pmem hammi minu ndig Raba dima nuhuigya. Ba, Raba ne nibousi mem Hanun ninyeng tak kepti ri. Lene nibou ndig ngot di ikwei mem gima impu yok nya idimig ide nimpung nya igyati ei ngoi dumti.

¹⁰Yoab ngat lo, siceu nya injei bigya ser no bei noho cem bei ninghim cem. Gima rino noni dimig tentara Israel di mimbri kui ingkek nya leu binhyepo iba yoho rok tentara Siria nya.

¹¹Lene noni kes tentara nindigsi nya bak nikinjoi Abisai ba, dimig yok leu binhyepo iba yoho rok tentara Amon nya.

¹²Lene Yoab pai bak nikijoi “Gino dihwen tentara Siria lo, ide nisindemti om kep da lene ma akwei mpu da. Nok gima cem gino ahwen tentara Amon nya lo, ide nisindemti om kep na lene midihwou mpu na.

¹³Akwei ba, siba mimbri di kui singkek biya ngkiem! Sikon pran gau side mben Israel kin side Allah de minu ndig nya cem. Handei kon ba, TUHAN mibon mun bit leu Nonti ningon kanti hak ug.”

¹⁴Lene Yoab ya tut nide tentara nya ikiju bikon pran bit yok apino tentara Siria nya ikiju binang leu Yoab nya yoho bei.

¹⁵Tirigi mben Amon ingat lo, tentara Siria nya inang leu siceu yoho bei lene yoni cem inang leu Abisai nya yoho bei binang kep inghim dip hanyen ug ei minu ndig nsi. Yoab bindei timek tentara Amon leu lene ngkwei hanyen ug ei minu ndig Yerusalem.

¹⁶Mben Siria ikan tut bipia mben Israel ibindei timek yok tu. Gima rino induk ide tentara nya yahagom bidem yam hanyen bu. Leu api Nibou Ndig Hadadezer cuk tungwatu nya bijem tentara Siria di ibong ei Minyei Efrat nite bei mpia nipriti kwei. Lene Hadadezer ndo nide nibou tentara di Sobakh leu Zoba mem gima ttei nibou tut yok.

¹⁷Hammi tirigi Daud miap tut gima rino nduk tentara Israel yahagom bidem yam. Leu api injei siceu bisigon Minyei Yordan biyuug dihip ei nite hi lene dimig nide tentara igyati ba, iba yoho rok mben Siria ide tentara nya leu api ikon pran bit yam.

¹⁸Tentara Israel ihwen yok ba, tentara Siria nya isujou leu yoho bei ug. Lene Daud ya tut nide tentara nya ba, ihwen tentara di ikrau kroba pran kan ibou sratus muhwindacan bimai ba, tentara nindigsi ibou sribu nyatungwacan cem itug ndei nimai. Siceu ide nibou pran di ninyeng Sobakh cem mai ei pran dimati.

¹⁹Tirigi nibou ndig nya di Hadadezer ninyeng tak kep yok pima ingat lo, tentara Israel ibindei timek yok tu lene yahara mem leu binhyepo ikrau yam nda ser leu api mben Israel inyeng tak kep yok. Hon kep gima kui lene tentara Siria ibrim ingkek bimpu tentara Amon bu bi.