Read Hatam NIBOHON MBEN ISRAEL GI NIGOM 20 Bible Online

NIBOHON MBEN ISRAEL GI NIGOM 20 - Hatam bible

NIBOHON MBEN ISRAEL GI NIGOM 20

¹ Nijam gi gwam nijam hou gi nidipti bu tirigi nibou ndig nya injei siceu bikon kep pran bit ide nitok joti nya lene Yoab njei sut nide tentara nya ba, coi hanjop Amon bihwen yok leu api igyai minu ndig Amon bigyati. Mpe dima lene Nibou Ndig Daud gwam kikau ei minu ndig Yerusalem leu ba, bit Yoab nya bi. Yoab ya tut nide tentara nya ba, igyon siceu ttai minu ndig Raba. Leu api Yoab de tentara nya ihwen timiei nya bibindei ba, minu ndig dima timek hak cem.

²Gima leu lene Daud kwei yai ndigban di ipos nya mang bibor leu minu ndig dima. Nibou ndig Amon de topi nibou ndig nibuhunti kilo ningot ningai ba, bitai dima jo srig ndigban ngot dimati. Iba tig permata ningat gom bimau topi dima. Lene Daud yai tig permata dima ba, bimau nide topi nibou ndig di nonti ttin a.

³Leu api noni kat timiei minu ndig Raba yahagom bibindei ba, yahagom iba sigigi kin pacul kin oi nya ba, ibiyai kep midyai. Daud yai nok gima tut yo di ibong ser minu ndig Amon nindigsi nya cem. Gima leu lene Daud ya tut nide tentara nya yahagom ba, ingkwei hanyen kwei ei minu ndig Yerusalem.

⁴Jei bi lene Daud kon pran bu bit mben Filistin ei Gezer. Mpe dima lene Sibkhai di timiei Husa gom bindei mai Sipai di nok tentara Filistin di ningut anjan ndig ngat. Apino mben Filistin icut biyoni.

⁵ Tirigi ikon pran bit mben Filistin hanyen bu lene Elhanan di Yair nipmot yai nimai bak Lahmi di Goliat leu minu Gat nide adig-ajoi hak. Micim di Lahmi ttei kep bon nika nindig ba, nok oi ka di jei.

⁶Tirigi ikon pran bit mben Filistin hanyen bu ei minu ndig Gat lene tungwa di ningut anjan ndig ngat gom di ninda hacem bon ninda pijum muhwindagom lene nimig hacem bon nimig nda pijum nya cem muhwindagom ningat ri. No dini ntun yo di ingut anjan ndig ngat gi nipou nya him.

⁷Lene noni kiju bisrep huk mben Israel. Gima rino Yonatan di Daud nikindig Simea nipmot kiju bihwen noni bimai hak.

⁸Ibou ningai di Daud nya igyai nimai biyok dima ne yo di ingut anjan ndig ngat di intun timiei Gat di ingut anjan ndig ngat him ri.