Read Hatam NIBOHON MBEN ISRAEL GI NIGOM 24 Bible Online

NIBOHON MBEN ISRAEL GI NIGOM 24 - Hatam bible

NIBOHON MBEN ISRAEL GI NIGOM 24

¹ Harun yai nipmot bat nya ibou bitai ba, inyeng rino Nadab kin Abihu kin Eleazar kin Itamar. Nadab Abihu nya imai nipou tirigi icig mai bigyo. Cin dima imai tirigi igyai imunggwom hi bigyo. Gima rino Eleazar kin Itamar ikrau kep midyai imam. Daud kwas yo di intun Harun him nya bibon nimpung nya bibit leu midyai di igyai nya. Zadok di ntun Eleazar him kin Ahimelekh di ntun Itamar him impu Daud tut midyai nikwas yo ei nimpungti dima.

⁴Ikwas yo di intun Itamar him ei nimpung muhwindaningai. Lene ikwas yo di intun Eleazar him ei nimpung simnaimuhwidip brimigtehigom lewo yo dini imang bibor inok nibou mem nimpung ig bei nsi nya.

⁵Yo di intun nimpung Eleazar kin Itamar him bihi inok nibou mem midyai nya di igyai ei TUHAN De Ig lene bihi inok imam nya. Gima rino ikwas midyai nya tut yok tug hon niko nibinggok tut.

⁶Yo di intun nimpung Eleazar kin Itamar him tungwagom-gom kiju bikus bit. Leu api Semaya di sekertaris pas kep inyeng sindam. Semaya ne Nataneel di ntun keret Lewi him nipmot ri. Ibon mun dima yok bou nibou ndig kin yo di igya kui noni kin Imam Zadok kin Ahimelekh di Abyatar nipmot kin nimpung imam nya di inok nibou mem nimpung ig bei nsi nya kin nimpung Lewi nya di inok nibou mem nimpung ig bei nsi nya yahagom igyai him.

⁷No dima pas kep inyeng di idimig ei bibit leu nomor tut midyai nya di itug ndei tug hon bit di ikus mem nimpung ningot can ba, bitai. Nigom ne Yoyarib ri. Nican ne Yedaya ri. Niningai ne Harim ri. Nibitai ne Seorim ri. Nimuhwi ne Malkia ri. Nimuhwindagom ne Miyamin ri. Nimuhwindacan ne Hakos ri. Nimuhwindaningai ne Abia ri. Nimuhwindatai ne Yesua ri. Nisimnai ne Sekhanya ri. Nisimnaibimiggom ne Elyasib ri. Nisimnaibrimigcan ne Yakim ri. Nisimnaibrimigningai ne Hupa ri. Nisimnaibrimigtai ne Yesebeab ri. Nisimnaimuhwidip ne Bilga ri. Nisimnaimuhwidip brimigtehigom ne Imer ri. Nisimnaimuhwidip brimigtehican ne Hezir ri. Nisimnaimuhwidip brimigtehiningai ne Hapizes ri. Nisimnaimuhwidip brimigtehibitai ne Petahya ri. Ninyatungwagom ne Yehezkiel ri. Ninyatungwagom gom ne Yakhin ri. Ninyatungwagom can ne Gamul ri. Ninyatungwagom ningai ne Delaya ri. Ninyatungwagom bitai ne Maazya ri.

¹⁹Ipas kep yo dima inyeng ba, ibibit leu nituti di tungwagom-gom yai kep nide midyai ei TUHAN De Ig. Igyai kep midyai nibon midut nya bit leu nok Harun di ide pung di intun him ndo biyok di bibit leu mben Israel ide TUHAN Allah nicuk yokti nya.

²⁰Ter leu gima ne Lewi de nintun him yamti di bram yam nya hi kin bu di inok nibou mem ide ig bei nsi nya inyeng rino Yehdeya leu pung Amram di ntun Subael him kin Yisia di ntun Rehabya him kin Yahat leu pung Yizhar di ntun Selomot him kin Yeria kin Amarya kin Yahaziel kin Yekameam yoni ne Hebron nipmot bat di bit leu ide njap di isrek nya rin kin Samir leu pung Uziel di ntun Mikha him kin Zakharia leu pung Uziel di ntun Mikha de adig-ajoi di Yisia him kin Mahli kin Musi kin Yaazia yoni di intun Merari him.

²⁷Yaazia yai nipmot bat nya ibou ningai di inyeng rino Syoham kin Zakur kin Hibri.

²⁸Mahli yai nipmot bat nya ibou can di inyeng rino Eleazar kin Kish. Eleazar yai nipmot bat nya hi bi. Noro Kish yai nipmot nimig gom di ninyeng rino Yerahmeel.

³⁰Musi yai nipmot bat nya ibou ningai di inyeng rino Mahli kin Eder kin Yerimot. Yo dini ne nibou mem nimpung ig bei nsi nya ei keret Lewi ri.

³¹Tut midyai di igyai bibit leu ide nimpung nya lene bikwop nibou ig bei gom kin nikinjoi pinai yoni ikus bit sur yam noyam kin gi ide bat di imam nya di intun Imam Harun him ibon pima. Ikus bit dima bou Nibou Ndig Daud kin Zadok kin Ahimelekh kin nimpung imam nya di inok nibou mem nimpung ig bei nsi nya kin nimpung Lewi nya di inok nibou mem nimpung ig bei nsi nya yahagom igyai him.