Read Hatam NIBOHON MBEN ISRAEL GI NIGOM 5 Bible Online

NIBOHON MBEN ISRAEL GI NIGOM 5 - Hatam bible

NIBOHON MBEN ISRAEL GI NIGOM 5

¹ Yakub nipmot mighumbou rino Ruben. Noro Ruben yem njita tut nicig nitnem ndrim hi. Apino Yakub bindei timek nisindemti nok mighumbou leu noni biyai bak Yusuf. Mbro nok gima lo, keret Yusuf rino sindem bibor dor njiriek Yakub de nintun him di bram yam nindigsi nya bi.

² Noro keret Yehuda rino sindem bibor dor njiriek keret nindigsi nya hagom. Nok gima cem no di ntun keret Yehuda him rinok nibou ndig gi nimbie him ngat mem mben Israel yahagom.

³Yakub nipmot mighumbou Ruben yai nipmot bat nya ibou bitai ba, inyeng rino Henokh kin Palu kin Hezron kin Karmi.

⁴ Yoel de nintun him di bram yam nya inyeng rino Semaya kin Gog kin Simei kin Mikha kin Reaya kin Baal kin Beera. Beera ne nibou di bie tut keret Ruben mpe di po Tiglat-Pileser di nok nibou ndig mem Asyur kat bikri yok ug ei ingkiaisi ri.

⁷Bit leu pung di intun him lene ipas kep nibou mem insi de nya di intun Ruben him nok gini. Yeiel kin Zakharia, kin Bela di Azas nipmot ba, Sema nignyon di intun Yoel ninsi de him lene yahagom ibong ei Aroer. Idis yam kikau bibong ei nite bei mpia nijjai bipek kin minu ndig cin di Nebo kin Baal-Meon.

⁹Ide mindhe-ndhe di ighyen kep ei hanjop Gilead nya mang bibor. Gima rino intek bibong ser minu di jo nite bei mpia nipriti ei iggum ndigsi di ug ninno bipek kin Minyei Efrat nyai.

¹⁰Ei nijam di Saul gwam nok nibou ndig lene keret Ruben injei bihwen mben Hagri di ibong ei Gilead nite bei mpia nipriti ningwig ba, ibong timiei ei ide hanjop nsi dima.

¹¹Keret Gad ibong nite bei mpia nijjai dideu keret Ruben ide hanjop. Ibong ser minu Basan kikau ug bipek kin Salkha di jo nite bei mpia nipriti.

¹²Yoel di ntun keret Gad him dima rinok pung di yo di inyeng jei nya insi de intun him. Lene Safam nok pung di yo di inyeng jei lai-lai de ide bat nya intun him. Yaenai kin Safat inok pung di keret Gad ninsi de nindigsi nya di ibong ei minu Basan intun him.

¹³Yo di nindigsi di igya coi keret Gad bitut ibou muhwindacan di intun keret Gad him insi de nya inyeng rino Mikhael kin Mesulam kin Syeba kin Yorai kin Yakan kin Ziya kin Eber.

¹⁴Yo dima intun Abihail di Huri nipmot him. Idimig idigup bat-idigai bat di intun him dima leu bijehei bikui ba, yoni inyeng rinok gini. Abihail kin Huri kin Yaroah kin Gilead kin Mikhael kin Yesisai kin Yahdo kin Bus.

¹⁵No di nok nibou mem ninsi de dima yok hagom rino Ahi di Abdiel nipmot ba, nignyon ninyeng rino Guni.

¹⁶Yo dini ibong ei minu Basan kin Gilead ba, ibibong bidem minu mien ngot di jo ei minu dima. Lene ibibong bidem minta nidumti ndig di jo ei hanjop Saron cem.

¹⁷Ipas kep pung dini ei nijam di Yotam nok nibou ndig mem timiei Yehuda nya ba, Yerobeam nok nibou ndig mem mben Israel.

¹⁸Keret Ruben kin keret Gad kin keret Manasye di ibong Minyei Yordan nite bei mpia nipriti ide tentara di mimbri kui ingkek nya di isu mun di ibipukep ser minggwen kan nya kin gi ikrau simeda kin tibor kan nya imangti ibou sribu ningot bitai bitai ba, sratus muhwindacan ningot muhwindagom yo rinaha.

¹⁹Yo dima ikon pran bit keret Yetur kin Nafis kin Nodab. Keret dini yok ne keret di igya coi mben Hagri ri.

²⁰Tentara dima yok iba ingon com Allah ba, yahara bak leu binhyepo mpu yoni. Leu api Noni buhup ighyet bisindem tut yok leu binhyepo ibindei timek mben Hagri nya bitut tentara ngkiai di itti kin yok nya yahagom.

²¹Pran dima cut bit leu Allah ningon kanti. Apino Allah mpu yok di igyai nimai bak siceu nya imang bibor dima. Ibikat siceu nya ibou sribu sratus gom ba, isima. Lene ibipos unta nya ningut sribu ningot muhwi kin domba nya ningut sribu sratus can ningot muhwi kin keledai nya ningut sribu can. Gima leu api ibibong timiei ei minu dima kikau ug bipek nijam di mben Asyur ikwei kat mben Israel bicom yok ug ei ingkiaisi.[2]

²³Keret Manasye nite hi ibong leu minu Basan kikau ug ei nite bei mpia nijjai bipek kin Baal-Hermon kin Senir kin Nungug Hermon. Lene idigek kep mpia tto nsi dima kikau.

²⁴Yo di inok nibou mem insi de nya inyeng rino Hefer kin Yisei kin Eliel kin Azriel kin Yeremia kin Hodawya kin Yahdiel. Yo dini ne tentara di mimbri kui ingkek nya ri.

²⁵Keret dini ingon gom tut Allah di idigup bat-idigai bat nya ikuk yok bak bi. Noro iba inghim bak ba, ikuk yok bak mben po Allah jji yok leu minu Kanaan tu pima ide kwar nya.

²⁶ Gima rino Allah pingok ei Pul di nok nibou ndig mem Asyur ningonti dino njei siceu di hwen yoni ug a. Pul ninyeng hi rino Tiglat-Pileser. Noni kat keret Ruben kin Gad kin Manasye nite hi di ibong ei Minyei Yordan nite bei mpia nipriti bicom yok ug ei ingkiaisi bibong ei minu mien Halah kin Habor kin Hara kikau ug ei mpia ttou nsi gom di jo dideu Minyei Gozan nyai cem. Lene keret dima yok ibibong timiei ei sirima kikau kwei bipek ammani kep.