Read Hatam NIBOHON MBEN ISRAEL GI NICAN 11 Bible Online

NIBOHON MBEN ISRAEL GI NICAN 11 - Hatam bible

NIBOHON MBEN ISRAEL GI NICAN 11

¹Tirigi Nibou Ndig Rehabeam ngkwei hanyen ug ei minu ndig Yerusalem lene noni nduk nide tentara di ikon pran kan nya ibou sribu sratus gom ningot muhwindaningai di intun keret Yehuda kin keret Benyamin him kwei. Noni kos tut bipia mikon pran bit keret mben Israel di ibong ei nite bei mpia nijjai leu binhyepo ninyeng tak kep yok hanyen bu.

²Noro TUHAN sok nihyet ei Nabi Semaya dip,

³bak Rehabeam kin nide limwa di timiei Yehuda kin Benyamin nya yahagom bipai biyok,

⁴“Ma jikon pran bit jide adig-ajoi di keret mben Israel au. Jahagom jingkwei hanyen ug ei jide ig hak ug! Mun di pek kep mem je pima bit leu Da di TUHAN dingon kanti ri.” Lene yoni yahagom ibit TUHAN nihyet leu ba, yuug kon pran bit Yerobeam nya bi.

⁵Mpe dima lene Rehabeam bong ei minu ndig Yerusalem. Lene cuk nide tukan nya yuug bon ngug tig di sindem bibor ba, ibicuon minu ndig ngot ei Yehuda kin Benyamin ninyeng tak kepti nya hagom.

⁶Minu ndig ngot dima yok rino Betlehem kin Etam kin Tekoa kin Bet-Zur kin Sokho kin Adulam kin Gat kin Mares kin Zif kin Adoraim kin Lakhis kin Azeka kin Zora kin Ayalon kin Hebron.

¹¹Noni bindei sindem nide minu dima bikes nibou tentara nya bigya ser bikwop minu ndig ngot dima bitin ei njita kin mini zaitun kin ba anggur ngei,

¹²kin mun di ibipukep siceu nya ide minggwen kin micim ba, nju hagom keyam ei bikwop minu ndig ngot dima yok. Nok gima lene minu ndig ei Yehuda kin Benyamin ninyeng tak kepti dima jo kikau ei ninda behei.

¹³Mpe dima lene imam nya kin Lewi nya leu mben Israel ide minu nyeng tak kepti hagom yuug bicom yam bit Rehabeam.

¹⁴Lewi nya ikiju bimbut hak bikes ngoi dumti di ide nya kin dihyei di ide nya bijo ei. Lene ipri hak leu ba, yuug bong ei Yehuda kin timiei Yerusalem ide ninyeng tak kepti. Igyai nok gima lewo Yerobeam kin nibou ndig di igya luei nohoti sindam nya iggai ser Lewi nya leu nhyema igyai midyai nok TUHAN de imam nya bu au.

¹⁵ Yerobeam nonti kon nide imam nya mem gima igyai midyai ei mpia di ikuk yo bak kwar nya eisi cem mpia di ikuk yok bak ninnei rom nya kin kwar sapi di nonti bon ei su nya cem.

¹⁶Limwa di intun keret mben Israel him di ijoi sut iba ingon gom bikuk yok bak TUHAN Allah mben Israel nya yahagom ipri bit Lewi nya pima leu ide minu biyuug ei minu ndig Yerusalem. Leu binhyepo iba nibon midut nindig mindhe titut ei nimbar hum dokti bibikuk yok bak TUHAN Allah di idigup bat-idigai bat nya ikuk yok bak.

¹⁷Nok gima lene minu Yehuda di Rehabeam ninyeng tak kepti sindem bibor. Yoni yahati tut Rehabeam di Salomo nipmot ninyeng tak kepti kikau mem nijam ari bingwam ningai ba, igyai bram igyai kepti mem nijam di Nibou Ndig Daud kin Nibou Ndig Salomo inyeng tak kep yokti nipou pima cem.

¹⁸Rehabeam wak Mahalat. Misop dini nicig ninyeng Yerimot di Daud nipmot. Lene nipmem ne Abihail di Eliab nipmisop ba, Isai nidrot.

¹⁹Ba, igyai ipmot bat nya ibou ningai di inyeng rino Yeus kin Semarya kin Zaham.

²⁰Ei nidipti bu ne Rehabeam wak Maakha di Absalom nipmisop leu api igyai ipmot bat nya ibou bitai ba, inyeng rino Abia kin Atai kin Ziza kin Selomit.

²¹Rehabeam wak nitnem bat nya ibou simnaimuhwidip brimigtehiningai. Lene wak nitnem ndrim nya ibou ningot muhwindagom. Ba, noni yai nipmot bat nya ibou nyatungwagom ba, muhwindaningai kin nipmisop bat nya ibou ningot muhwindagom. Maakha ne nitnem di ningon ngakei di ningon ce bi dor njiriek nitnem bat nya kin nitnem ndrim nindigsi nya yahagom ri.

²²Gima rino ningon nga kei Abia di Maakha nipmot nindig dor njiriek nipmot bat nindigsi nya yahagom. Apino dimig Abia ei leu binhyepo noni kui bigwam nok nibou ndig biya luei nohoti hanyen ei nidipti bu.

²³Rehabeam ba ningon di ki binyohou kwas midyai tut nipmot bat nya lene binyohou kes yok bidem minu ndig ngot di sindem bibor hagom di jo bidem Yehuda kin Benyamin ninyeng tak kepti hagom binjei njita nindig bibor bak yoni ba, tin ei itnem bat nya imang bibor mem yok cem.