Read Hatam NIBOHON MBEN ISRAEL GI NICAN 14 Bible Online

NIBOHON MBEN ISRAEL GI NICAN 14 - Hatam bible

NIBOHON MBEN ISRAEL GI NICAN 14

¹Tirigi Nibou Ndig Abia mai ba, itig simin nibou ndig nya ijui dip ei Daud De Minu Ndig leu su lene nipmot Asa kui bigwam nok nibou ndig biya luei nohoti bu. Mpe dima lene nibong kei nigwam keisi kieng kep minu Yehuda kikau mem nijam ari bingwam simnai di Nibou Ndig Asa ninyeng tak kep minu dima.

²Asa bon kep mun di igbit kin mun di kei nya ba, bipwoi nide Allah ningon a.

³Ninda jo kep nimbar hum dok kin mpia di ikuk yo bak kwar eisi nya di mben ngkiai ide binggek hagom bingwig. Lene ya kep kwar di itas ei nya ba, kki bindung-ndiem hak ba, ya kep dihim di itas ei mem kwar Sop Asyera nya cem binjei bitti hak ug.

⁴Noni cuk timiei Yehuda nya leu binhyepo igyok igyai kep igyai munti nya ba, ibibit idigup bat-idigai bat nya ide Allah ningon kanti kin nipingokti nya kin nicuk yokti nya cem hagom.

⁵Noni nggek mpia di ikuk yo bak kwar eisi kin mpia di indig kep biei nggrai di ui-gwang kei eisi nya hagom ei minu ndig nya ei minu Yehuda cem. Apino mpia mbum-bra ei ninda behei mem nijam di ninyeng tak kep dima.

⁶Gima rino bon nituti mem noni bon ngug tig di ngkiem bibor ser minu ndig nya hagom ei Yehuda ug a. TUHAN bindei ba, nibong kei nigwam kei kieng kep nide minu mem ari bingwam poi leu ba, tungwatu nya igikon pran bit yam mem nijam dima bi.

⁷Asa pai timiei Yehuda nya “Jikwei ba, ibindei sindem ide minu ndig nya tug hon gi ibon ngug tig ttai minu ndig nya bitut tentara nibousi di igya coi di jo-jo yam dip kin dimbou pmem bitut hau di ibahau ser nya cem. Nyeni igya ngkiem ser minu dini lewo yahagom ibit ide TUHAN Allah ningon kanti mem nye tu. Noni nyohou nyeni cem bindei ba, igya ngkiem ei ide hanjop dini nisurti-nipekti.” Asa pai nok apino ikinyon ei midyai di ibrim ingkek tutti bigyai ba, ibikes inda tut bi.

⁸Nibou Ndig Asa de tentara timiei Yehuda nya ikrau mun di ibipukep siceu ide minggwen bibikrau kin micim imangti ibou sribu sratus ningai. Lene nide tentara timiei Benyamin nya ikrau mun di ibipukep siceu ide minggwen bibikrau kin hampiap kin tibor ei inda him dima sok yam ibou sribu sratus can ningot muhwindaningai. Mimbri kui tentara dima yok yahagom ingkek ba, igyok ngon kep ningginausi tut notou ikon pranti mungkun kei.

⁹Mpe di gom bu ne Zerah di nibou tentara Sudan gom ba nide nimpung tentara nya ibou juta gom bitut kroba pran sratus ningai ba, bihwen minu Yehuda. Ba, ikes yok kikau ug ei Maresa.

¹⁰Asa cem njei sut nide tentara nya ndam Zerah. Lene nibou cin dima idimig tentara di ide nya ba, iba yoho rok yam ei Mbang Briep Zefata di jo dideu Maresa.

¹¹Leu api Asa ngat nadi bak nide TUHAN Allah bipai “TUHAN e, Nangkom ngat he rino ampu kep tentara di isindem bi nya ba, ibindei timek tentara di isindem bibor. Nyende TUHAN Allah e, ma ampu nye nogindini! Nyeni niba ningon com Nani ba, ninjei kwei tug hon anyeng mem gima nikon pran bit nimpung tentara di nindig bibor dini. TUHAN e, Nani ne nyende Allah ri. Jo nibreisi bipia bit bon tungwatu nya ibindei timek Nani kan bi.”

¹²Lene Asa ngat nadi bikes leu api njei sut nide tentara timiei Yehuda nya bikon pran bit nimpung tentara Sudan di nindig bibor dima. Leu api TUHAN bindei timek tentara Sudan nya yahagom. Gima rino yahagom itti kep inghim dip binang.

¹³Asa ya tut nide tentara nya ba, igyon igkep yok kikau ug ei minu ndig Gerar. Tentara Sudan imang bibor ikrop hak ei pran dimati. Apino ide tentara nya isindem bu bi lewo TUHAN kin tentara timiei Yehuda ibindei sar yok. Tentara timiei Yehuda nya ipos tentara Sudan ide ndigban nya mang bibor cem leu yok. Leu api igya kep minu ndig ngot di jo ttai Gerar hagom bisar. Lewo TUHAN bindei ba, timiei minu ndig dima yok yahagom inghuisi mpig sut Noni noyam. Tentara timiei Yehuda nya icoi ug ei minu ndig dima bipos ndigban mang bibor leu timiei nya bimbut tut.

¹⁵Lene icoi bihwen yo di ighyen kep mindhe-ndhe nimuhup tu nya ide mpia di prak meng yati bipos domba nya kin unta nya mang bibor ba, ijem bimbut tut leu yok. Gima leu api ingkwei hanyen ug ei minu ndig Yerusalem.