Read Hatam NIBOHON MBEN ISRAEL GI NICAN 15 Bible Online

NIBOHON MBEN ISRAEL GI NICAN 15 - Hatam bible

NIBOHON MBEN ISRAEL GI NICAN 15

¹Mpe di gom ne Allah Ninnei sindem tut Nabi Azarya di Oded nipmot.

²Apino noni ug ngat Nibou Ndig Asa bipai bak “Nibou Ndig Asa kin je di timiei Yehuda kin Benyamin jahagom e, ma jimiap kep mun di disok kep je tut dini. TUHAN mitti kin je gino jeni cem jitti kin Noni. Gino jahara TUHAN bindo ningon kanti bije lene Noni mindo ningon kanti bije. Noro gino jiba jiyai ngat Noni he lene Noni cem miba niyai ngat je.

³Mben Israel yoom yonti ba, ikuk yonti bak Allah di nijit dima bi mimbrek ngan tu. Ba, Nide niggai ser yokti jo nibreisi mem yok ba, imam nya di ingginau kep yok nya ingat rin cem bi.

⁴Noro mpe dino mun di buhun cut igkep yok lene yahara bak TUHAN Allah Israel leu binhyepo mpu yok. Yahara Noni bindo ningon kanti biyok lene Noni ndo biyok.

⁵Ei nijam dima ne gimbun tungwatu ingwes ngun tirigi imbut leu minu hi ug ei minu hiter kan bi. Lewo nihwen yamti jo bidem minu hagom.

⁶Mben hi co kep mben hiter bu. Lene timiei minu ndig hi ico kep timiei minu ndig hiter bu. Lewo Allah Nonti bindei ba, yahagom iba nitok biyam.

⁷Mbro nok gima lo, suar jiya ngkiem bijibrim jingkek kikau. Lewo ningat di kei mintun mun di jibrim jingkek mem dima him.”

⁸Tirigi Asa miap Nabi Azarya di Oded nipmot nipaisi dima rino ningon llei bibor mem. Lene kiju binjei kwar nya hagom bingwig leu Yehuda kin Benyamin ninyeng tak kepti. Ba, njei mun dima yok ningwig leu minu ndig ngot di noni bindei timek nya ei nungug him Efraim cem hagom. Leu api kinding TUHAN de nimbar hum dok ei mpia di jo bas hak di iba ngug tig bikrop ttai ei TUHAN De Ig hanyen.

⁹Keret Efraim kin Manasye kin Simeon nya ibicom yam bit Asa bibong bidem ei nide minu di ninyeng tak kepti nya nipou su. Lewo jo nibreisi mem yok bipia TUHAN mpu noni tu. Lene Asa nduk yo dima kin timiei minu Yehuda Benyamin nya kwei ba,

¹⁰yahagom idem yam ei minu ndig Yerusalem mem bed gi niningai tirigi Asa ninyeng tak kep mem ari bingwam simnaimuhwidip tu.

¹¹Mpe dima lene ijem sapi ningut sratus muhwindacan kin domba ningut sribu muhwindacan leu mindhe-ndhe di ipos kwei leu ikon pranti pima bibui hagom pijum ei bak TUHAN bindig ei nimbar hum dokti.

¹²Lene ipreu ei bak TUHAN bipia yoni miba ingon kin innei titut yam bibit idigup bat-idigai bat nya ide TUHAN Allah ningon kanti.

¹³Tungwa tou rino mibit TUHAN ningon kanti bi lene mitug ndei hukum nimai hak ug. Gini bitut ndigpoi kin pilei nya ba, pinai nya kin sop nya cem yahagom.

¹⁴Iba ighyet nindig beheng ser tug hon TUHAN ninyeng bipia yoni mikrau kep mun di ipreu ei dima. Leu api imbos-hi-mbos ba, ibimiep pun mbrei nya cem.

¹⁵Limwa nya yahagom igyai nillei noyam. Lewo iba ingon titut yam bicom ighyet tug hon neheng dima tu. Iba ingon di llei bikuk yok bak TUHAN bitig dino TUHAN cem joi sut yok. TUHAN bindei ba, nibong kei nigwam kei kieng kep ide minu di inyeng tak kepti nya hagom.

¹⁶Tut gima cem Nibou Ndig Asa bicut nidrot Maakha ninyeng leu gi gwam nok Nipmem Sop Nibou Ndig. Lewo noni bon cou dihim noyam kin kwar di kinei bibor ba, bikuk no bak kwar Sop Asyera di ipai bipia bindei nnum njita kioi nya. Asa bindei tti cou dihim dima lene bindei binnir wap leu api ndig hagom ei Mbang Briep Kidron.

¹⁷Mbro nok gino Asa cok tut gumihyep di ikuk yo bak kwar eisi nya hagom di jo ei minu dima bi lo, noni ba ningon di gom bibit TUHAN kikau ug bipek niyaijo ningwig honti.

¹⁸Asa nju ndigban di iba mas kin perak bibon kin ndigban nindigsi nya hagom di ipos leu pranti nya di noni kin nicig Abia ikwas pijum tut TUHAN pima hagom ug ei TUHAN De Ig.

¹⁹Lene tungwatu nya ikon pran ei minu dima bu bi kikau ug bipek ari bingwam gi ningot ningai ba, muhwi di Asa ninyeng tak kep dima.