Read Hatam NIBOHON MBEN ISRAEL GI NICAN 16 Bible Online

NIBOHON MBEN ISRAEL GI NICAN 16 - Hatam bible

NIBOHON MBEN ISRAEL GI NICAN 16

¹Nibou Ndig Asa ninyeng tak kep timiei Yehuda nya ug ei ari bingwam gi ningot ningai ba, muhwindagom lene Baesa di nok nibou ndig mem mben Israel coi bihwen minu Yehuda. Noni bindei sindem minu ndig Rama leu binhyepo binggam ser timiei Yehuda nya ide puig neheisi kin nicoisi.

²Apino Nibou Ndig Asa yai mas kin perak leu ig gudan di inju mas kin perak keyam eisi ei TUHAN De Ig kin gi jo ei nibou ndig de ig cem. Leu api pinak hagom ug ei Damsyik bak Benhadad di nibou ndig mben Siria. Lene bisok ei gima dip,

³“Akwei ba, sijem sisut bit yam nok gi po side ndigpoi nya ijem isut bit yam nipou yo pima. Lene dipinak mas kin perak di kei bibor dini mikuisi bina ba, dibisok dihyet bina ba, aom na leu Baesa di nok nibou ndig mem mben Israel leu binhyepo noni mikus nide tentara nya leu minu di dinyeng tak kep dini.”

⁴Benhadad ce tut Asa nihyet nghwak him dima bicuk nide nibou tentara nya ba, injei sut ide nimpung tentara nya bigya kep minu ndig ngot ei minu Israel bikon pran bit yok. Ibindei timek minu ndig Iyon kin Dan kin Abel-Bet-Maakha di keret Naftali de minu ndig di nju kep ndigban eisi nya hagom.

⁵Tirigi Nibou Ndig Baesa miap nibimbiti tut gima lene kes ninda tut gi bindei sindem minu ndig Rama pima bimbut leu.

⁶Gima leu lene Nibou Ndig Asa cuk nide limwa di timiei Yehuda nya yahagom poi ba, ipian tig kin biei di Baesa mbus keyam ei minu ndig Rama mem gima bindei sindem minu ndig dima buug sut ug ei minu ndig Mizpa kin Geba leu binhyepo Asa ba nimbumbati dima bibindei sindem minu ndig cin dima.

⁷Mpe dima lene Nabi Hanani kwei ngat Nibou Ndig Asa bipai bak “Aba angon com nibou ndig mem mben Siria tut nide nisindemti lene agiba angon com ade Tuhan Allah tut nide nisindemti bi. Gima rino nituti mem gima abindei timek nibou ndig mben Israel[10] de tentara ngwig leu nani tu.

⁸Apo agiyok ngon kep gi po mben Sudan kin Libia nya ide tentara nya imang bibor cem lene ide kroba pran kin ide tentara di iba kuda bikon pran imang bibor lo, TUHAN bindei ba, joom kep yok leu gi po aba angkiem bisu Noni pima bi e?

⁹TUHAN yok niyai kep tungwatu bidem dihyeisi dini titut yam leu binhyepo kwas Nide nisindemti tut yo di iba ingon gom bibit Noni kikau. Noro aba angon di mbum bibon mun tu. Gima rino hon kep ammani kui lene mporo acut ei nijam nikon pranti kikau.”

¹⁰Lene Nabi Hanani nipaisi dima bindei ba, Asa ningon sibui sut noni. Apino com Nabi dima ug ei ig bui nsi. Mpe dima lene Asa sindi ba nimbuk kak nide limwa nya ibou poi.

¹¹Mun nyeng di mbut ei nijam di Asa ninyeng tak kepti dima leu nimbie him kikau ug bipek ningwigsi hagom jo ei srat Nibohon Nibou Ndig Mben Yehuda kin Nibou Ndig Mben Israel Nyati.

¹²Asa ninyeng tak kep kikau mem ari bingwam ningot ningai ba, muhwindatai lene bicut ei ninggwen di buhun biborti di hwen nimig cin hacem. Mbro nok gima lo, gikiek no hanyen ndam TUHAN di mimpu no tut ninggwenti dima bi. Noro ba ningon com yo di inda kan nya leu binhyepo impu noni.

¹³Leu api noni mai ei ari bingwam can gi gwam dip.

¹⁴Lene iba biei ngat di ui-gwang kei nya kin mini mbris di ui-gwang kei nya bibihwen ningut titut yam. Leu api itig ei nibou ndig nya ijui dip ei Daud De Minu Ndig. Lene limwa nya ikwap hum nindig bibor di bindo tut gi ibou cut binoni bibor.