Read Hatam NIBOHON MBEN ISRAEL GI NICAN 17 Bible Online

NIBOHON MBEN ISRAEL GI NICAN 17 - Hatam bible

NIBOHON MBEN ISRAEL GI NICAN 17

¹Yosafat kui bigwam nok nibou ndig biya luei nicig Asa nohoti. Lene kum ei nide nisindemti leu binhyepo ya ngkiem ser mben Israel.

²Noni kes nide tentara nya ba, igya bidem minu ndig di bon tentara nibousi di igya coi nya ei minu Yehuda hagom ba, igya bidem minu ndig ngot ei Yehuda nisai nya hagom ba, igya bidem minu ndig ngot di nicig coi di yai biyati nya ei hanjop keret Efraim cem hagom.

³TUHAN njei mun di kei bak Yosafat. Lewo co igbit nicig nicoti hak ug. Lene gikuk no bak kwar Baal bi.

⁴Noro kuk no bak Allah Nongkom ngat he bibit nicukti nya hagom. Niyai munti nya noyam kin nibou ndig mben Israel igyai munti nya bi.

⁵TUHAN bindei ba, Yosafat di gwam nok nibou ndig mem timiei Yehuda nya sindem bibor. Limwa nide nya yahagom injei ndigban di kei nya mikuisi bak. Gima rino noni nyeng tut ndigban ba, limwa nya ibou cut binoni bibor cem.

⁶Ningon di ya mem gima bit TUHAN nicukti sindem bibor. Noni nggek tut mpia di ikuk yo bak kwar eisi nya kin cou dihim nya di ibikuk yok bak kwar Sop Asyera ei minu Yehuda hagom.

⁷Ninyeng tak kep ba, ug cut ari bingwam gi niningai lene noni pinak nibou di inyeng jei nya ba, ingginau tungwatu tut TUHAN niggai serti nya hagom bidem minu ndig ngot di jo ei minu Yehuda. Nibou dima yok inyeng rino Benhail kin Obaja kin Zakharia kin Nataneel kin Mikha.

⁸Lene Lewi nya ibou muhwindatai kin imam ibou can yahati tut yok. Lewi nya inyeng rino Semaya kin Netanya kin Zebaja kin Asael kin Semiramot kin Yonatan kin Adonia kin Tobia kin Tob-Adonia. Lene imam cin pima inyeng rino Elisama kin Yoram.

⁹Ipwoi srat di TUHAN Niggai Serti Nya jo niti dima ba, ibiya bidem minu ndig hagom ei minu Yehuda bingginau limwa nya di ingat rin ei minu ndig dima tut TUHAN nicukti nya.

¹⁰TUHAN bindei ba, mben ngkiai ide ninyeng tak kepti di jo ttai minu Yehuda hagom ingwes mien tut gima ikon pran bit Nibou Ndig Yosafat.

¹¹Yosafat tug ndei perak kin ndigban di kei nindig bibor mikui-kausi leu mben Filistin. Lene tug ndei domba ningut sribu muhwindacan sratus muhwindacan kin kambir sribu muhwindacan sratus muhwindacan leu mben Arab.

¹²Yosafat de nisindemti bikum eisi kikau. Ninda jo kep bibon tentara nibousi di igya coi nya kin minu ndig nya ba,

¹³nju ndigban keyam bidem minu ndig dima hagom. Lene bikes tentara di mimbri kui ingkek nya ei minu ndig Yerusalem.

¹⁴Bikwop nibou tentara dima yok igya tut ide nimpung tentara nya gom-gom bit leu insi de nya. Adna ne nibou pran mem nimpung nibicom yam di intun keret Yehuda ninsi de nya him rin ba, noni nok nibou pran mem tentara ibou sribu sratus ningai.

¹⁵No di nican rino Yohanan di nok nibou mem tentara ibou sribu sratus can ba, ningot muhwindaningai.

¹⁶No di niningai rino Amasia di Zikhri nipmot di nok nibou mem tentara ibou sribu sratus can. (Amasia kes nonti mikui-kausi binok awak hak mem TUHAN.)

¹⁷Nibou pran mem nimpung tentara nibicom yam di intun keret Benyamin him rino Elyada di mimbri kui ningkek di nok nibou mem tentara ibou sribu sratus can di ide hampiap kin mun di ibipukep siceu ide minggwen nya jo indati di dem kei nya.

¹⁸Yosabad di nok nibou di bie tut nimpung tentara nibicom yam di ya kui Elyada ba, noni rinok nibou mem tentara ibou sribu sratus gom ba, ningot muhwindaningai di ide minggwen jo indati di dem kei su nya.

¹⁹Yo dini rino igya kui nibou ndig ei minu ndig Yerusalem. Ter leu gima lene nibou ndig kes nimpung tentara nindigsi nya bu ba, icoi bigya ser minu ndig di bon tentara nibousi di igya coi nya bidem minu Yehuda nisurti-nipekti.