Read Hatam NIBOHON MBEN ISRAEL GI NICAN 19 Bible Online

NIBOHON MBEN ISRAEL GI NICAN 19 - Hatam bible

NIBOHON MBEN ISRAEL GI NICAN 19

¹Yosafat di nok nibou ndig mem timiei Yehuda nya ningwes ngun bingkwei hanyen ei nibou ndig de ig ei minu ndig Yerusalem.

²Lene Nabi Yehu di Hanani nipmot kwei um noni bipai bak “Dem tut gima Na di Andigpoi ampu no di mbuk bibor dima ba, atti kin no di ningon mpo tut TUHAN dima e? Na Di Andigpoi ayai munti dima bindei ba, TUHAN gga na.

³Mbro nok gima lo, nibon munti di kei no ntun Na Di Andigpoi him yo. Acok tut cou dihim di kwar Sop Asyera de limwa nya ikuk yok bak nya hagom ba, abrim angkek mem gima ayai munti dem igbit Allah ningon kanti cem tu.”

⁴Mbro nok gino Nibou Ndig Yosafat bong hak ei minu ndig Yerusalem lo, noni ug cem kep nide limwa nya bidem nide minu nisurti-nipekti lene hara mem yok leu binhyepo ingkwei hanyen ndam idigup bat-idigai bat nya ide TUHAN Allah.

⁵Noni kon nikei nya ba, kes yok bidem minu ndig di bon tentara nibousi di igya coi nya hagom ei minu Yehuda.

⁶Noni pingok ingonti bipai biyok “Ma jiba jingon di ki bimbus limwa nya ingonti lewo jimbus yok gau ninyeng tungwatu bi. Noro gau TUHAN ninyenga. TUHAN ngig niyai kep jeni mpe dino jikos tut munhyet ei limwa nya ikieti.

⁷Suar jittin tut TUHAN ba, jiba jingon di sok kep jenti bikos tut munhyet hi nok mungkun kei. Lewo ide TUHAN Allah ningon mpo tut yo di iris mun kin yo di imbus nggok tungwatu kin yo di isu inda mem mun nibingot kep yokti nya.”

⁸Yosafat kon nikei nya bibikwop Lewi nya kin imam nya kin nibou nya ibou poi nok nikei ei minu ndig Yerusalem. Suar yo dini ikos tut munhyet di bitut nitunggwei TUHAN nicukti nya kin munhyet nindigsi nya cem.

⁹Yosafat cuk nikei dima yok “Tirigi jibindei mbut jide midyai lene ma jidigit tut TUHAN ba, jiba jingon di gom biyai mun nyeng hagom bit leu Nide nicuk jeti nya.

¹⁰Mpe dino jisut bat nya leu minu ndig hi ipai sut munhyet nihwen mun kin nitunggwei Allah nicuk nyeti nya kin nikos tutti di jo tu nya bije lene ma jipingok ingonti tut gi igyai munti nya ndo bindo di kei tirigi igya ei nikei noho bei. Gi nok lene yoni migyai mun tunggwei sut TUHAN bi. Gi bi lene TUHAN migga jeni kin jide limwa nya. Gino jibit Nide nicuk jeti dini lene mijiyai mun tunggwei hi bi.

¹¹Dikes ninyeng di jei bak Amarya di nok Imam Nibou Nindig leu binhyepo ninyeng tak kep munhyet hagom di bitut Allah de nicuk nyeti nya hagom. Lene nibou hanjop di Zebaja di Ismael nipmot ninyeng tak kep munhyet nindigsi nya. Lewi nya ide midyai rino igyok igyai kep munhyet di nikei ikos tut nya leu binhyepo hagom mbut igbit nipuig kikau. Ma jiyai igbit mun nyeng di dindo bije dini ba, jiyai jibou tut munhyet hagom. TUHAN ningat rima simin je di jiba jingon di gom bimbus munhyet.”