Read Hatam NIBOHON MBEN ISRAEL GI NICAN 20 Bible Online

NIBOHON MBEN ISRAEL GI NICAN 20 - Hatam bible

NIBOHON MBEN ISRAEL GI NICAN 20

¹Nijam gi nidipti bu ne tentara Moab kin Amon nya igya tut tentara Meunim nya di ibicom yam bit yok nya ba, injei bihwen minu Yehuda.

²Leu api tungwatu nya ikwei pai bak Nibou Ndig Yosafat “Tentara Edom imang bibor ikwei leu Igpong Nsim nite dima ug mem gima ihwen Na Di Andigpoi. Yoni icoi bihwen minu ndig Hazezon-Tamar ba, igyati tu.” (Hazezon-Tamar ne ninyeng hiter mem En-Gedi ri.)

³Lene Yosafat digit tut nihyet di miap dima bingat nadi bak TUHAN leu binhyepo ndo ningon kanti bak. Leu api cuk limwa nya yahagom ba, igyem njita bi mem nituti poi.

⁴Tungwatu nya di ijo leu minu ndig gom-gom ei minu Yehuda di yuug ei minu ndig Yerusalem yahara TUHAN bimpu yok.

⁵Ibicom yam bit timiei Yerusalem nya ba, idem yam ei mpia di jo bas hak di iba ngug tig bikrop ttai di nijep ei TUHAN De Ig nihui dip. Yosafat kiju biya ei yahagom yoho bei,

⁶lene ba nihyet ndig bingat nadi bak TUHAN bipai “Nidigup bat-nidigai bat nya ide TUHAN Allah e, Nani ne Allah ei gwamti ba, anyeng tak kep mben di dihyeisi dini hagom. Anyeng jei bibor ba, asindem bibor cem. Ba, tungwa hi di sindem bibor mem gima bindei timek Nani kan bi.

⁷ Nani ne nyende Allah ri! Tirigi Ade limwa di mben Israel nya ikwei krau minu dini lene akes hagom bak asut di Abraham leu binhyepo dihyei dini nok mben Israel ide dihyei ninda rom bijo ninno bijo kikau.

⁸Yoni ibong ei minu dini ba, ingot ig di nok gumihyep mem gima ikuk yok biNa eisi. Lene ikan tut bipia,

⁹gino itug ndei hukum drek dip ide sisar nya ba, pran cut igkep yok ba, nsuwer ajar hwen yok cem ba, ninggum hwen yok lene ace tut ba, ikwei ya ei dimbou heisi di ikuk yok bak Allah eisi dini. Gino yuum mun di buhun bibor lene ace tut yok ba, ingat nadi biNa leu api mporo amiap ide nadi di ingat biNa ba, ampu yok.

¹⁰ Nogindini mben Amon kin Moab kin Edom yoni ibicom yam ba, itin ei mem gima ihwen nyeni ug ri. Tirigi nidigup bat-nidigai bat nya ikwei leu minu Mesir lene ace tut gima ihwen mben dima yok leu ba, igyai minu di ide bigyati bi. Gima rino nidigup bat-nidigai bat nya ikes yok bisir ide minu he. Lene igibindei sar mben Amon kin Moab kin Edom nya bi.

¹¹Nogindini mben dima yok ijoi sut ibindei timek nye ba, ijoi sut ijji nye leu minu di akes binye dini ri.

¹²Nani ne nyende Allah ri! Ma akes hukum ei yok dip lewo niyai nisindemti mem gima nikon pran bit tentara imang bibor di ijoi sut icoi minu dini ba, ibindei timek nye bi. Nikan tut puig di nikon pran bit yokti bi. Gima rino nikwei kuk nye biNa leu binhyepo ampu nye.”

¹³Mpe dima lene pinai Yahudi nya kin itnem bat imunggwom bat nya yahagom no igya kui TUHAN De Ig ei dimbou heisi ba,

¹⁴Yahaziel di ntun keret Lewi him ningat rin ei yo di imang bibor dima ikieti. Nicig rino Zakharia leu Asaf ninsi de ba, nimbier nikimti rino Benaya kin Yeiel kin Matanya. Mpe dima lene TUHAN Ninnei mpung ei Yahaziel ningonti bisindem tut noni,

¹⁵ leu binhyepo tri tut nihyet bipai “Na Di Anyeng Jei kin disut bat jen e, TUHAN pai bipia ma jingon cut leu ba, jidigit tut gima jikon pran bit tentara imang bibor dima au. Lewo jeni rino jikon pran bit yok bi noro Allah Nonti mikon pran bit yok.

¹⁶Njap di hyep bu tirigi yoni ikui kak puig di kui ug ei nitinggoisi Zis lene ma jihwen yok. Mijitau kep yam ba, jihwen yam ei briep nohon keti gom ei iggum ndigsi niyenti dideu iggum ndigsi Yeruel.

¹⁷Ma jeni jikon pran ei pran nicutti dini bi. Ma juug bijiya jiyati hak ei mpia di indo mem je ba, jiya hak ei sirima. Lene mijingat bou jiyai him bipia TUHAN mibindei timek jide siceu nya. Je di timiei Yehuda kin Yerusalem e, ma jingon ku jenti tut ba, jidigit tut au. Ma jinjei siceu mem gima jicoi ug ei pran dimati leu api TUHAN mimpu je!”

¹⁸Leu api Nibou Ndig Yosafat ba nibiau bicom dihyei lene ba ningwak bikik dihyei bikuk no bak TUHAN. Lene limwa nya yahagom igyai bram niyaisi dima.

¹⁹Leu api Lewi nya di intun Kehat kin Korah insi de him nya ikiju bigya. Iba nimbos-hi-mbos bikon mben Israel ide TUHAN Allah ninyenga.

²⁰Njapti kui lene limwa timiei Yehuda nya injei mem njap tekti ba, yuug ei iggum ndigsi dideu Tekoa pima. Tirigi ikiju bimbut rin lene Yosafat sok kep yok “Timiei Yehuda kin Yerusalem jen! Ma jiba jingon com jide TUHAN Allah leu api mijiya ngkiem mem gima jikon pran bit yok! Ma jice tut bijibit nabi jide nya ipingok jeti leu api mijibindei cut jide siceu nya!”

²¹Tirigi nibou ndig mbrap bit limwa nya leu su lene cuk nimpung di ipai doia leu binhyepo ijuk sinsun nimig-ninda di ijuk kikep mem njap di ibon midut nya ei TUHAN De Ig pijum nya. Suar nimpung nipai doia dima ibon nimpung bigya igyati tut ide sinsun nibon midut ei nimpung tentara yoho bei ba, ibipai doia ninno “Ma jinggei sut TUHAN! Lewo ningon ngakei nye bijo ninno bijo kikau!”

²²Tirigi nimpung di ipai doia dima yok iba nimbos-hi-mbos bipai doia lene TUHAN bindei ba, siceu ide tentara nya igyok nisinsiou ei yamti tirigi itin ei mem ihwen timiei Yehuda nya.

²³Tentara Amon kin mben Moab ihwen tentara Edom nya bigya kep yahagom bitimek hak ug. Leu api tentara cin pima ikiek yo ndam yam ba, igyok kep yam bibor bisar ningwig a.

²⁴Tirigi tentara timiei Yehuda nya injei ba, yuug krau mpia di timiei minu dima yohok ig jibei nut yam di jo anai ei iggum ndigsi lene ikui ei nidip hu kwei bicap ser siceu nya ibongti leu api ingat lo, siceu ikrop sinsiou ba, ingut tug kep mpia ei dihyei ninjek dip. Siceu ide tentara nya hi di ningwes ngun cem bi.

²⁵Leu api Yosafat ya tut nide tentara nya ba, yuug pos ndigban di siceu ide di imai leu nya. Ittau kep mindhe-ndhe nimuhup tu nya mang bibor kin ndigban ngot di siceu ide nya kin sinsun kin ndigban di bon ninyeng nindigsi nya. Idimig ndigban di ipos dima yok keyam ei njap nitindur ningai lo, ndigban nindigsi nya mang-mang no jo yo. Noro ikiju bimbut hak leu bikes bijo nimun ei.

²⁶Njap gi nibitai lene yahagom idem yam ei Mbang Briep Berakha ba, ipai doia bibikon TUHAN ninyeng tut mun di Noni bibon mem yok dima hagom. Gima rino ijem briep dima ninyeng Mbang Briep Nikon TUHAN Ninyeng.

²⁷Leu api Yosafat ya tut nide nimpung tentara nya ba, yahagom iba ingon di nggei-hi-nggei bingkwei hanyen ug ei minu ndig Yerusalem. Lewo TUHAN bindei timek ide siceu nya leu su.

²⁸Tirigi yuug krau minu ndig dima lene yahagom ingig ninggre ba, ikek nggong mbrei nya ba, imiep pun mbrei nya cem tirigi ibisau ndam TUHAN De Ig.

²⁹Bikwop mben ngkiai ei minu hiter nya hagom imiap tut TUHAN di bindei timek mben Israel ide siceu di ihwen yok nya nok gima apino yahagom idigit tut nindig bibor.

³⁰Gima rino Yosafat ninyeng tak kep mem nijam di mpia mbum-bra dima. TUHAN bindei ba, timiei Yehuda nya ibong kei igwam kei bidem minu di Yosafat ninyeng tak kep nisurti-nipekti hagom.

³¹Yosafat kui bigwam nok nibou ndig mpe dino nide njap ug ei ari bingwam ningot ningai ba, muhwi. Ninyeng tak kep kikau mem nijam ari bingwam nyatungwagom ba, muhwi ei minu ndig Yerusalem. Nipmem ninyeng Azuba di Silhi nipmisop.

³²Yosafat bon mun di kei ei TUHAN niyai him noyam kin nicig Asa cem.

³³Noro tut mpia di tungwatu nya ikuk yo bak kwar nya eisi ne ginggek gima bi. Limwa nya igiba ingon di gom bikuk yok bak idigup bat-idigai bat nya ide Allah bigyo.

³⁴Nipui mun tut Yosafat nibon munti nindigsi nya leu nimbie him di ninyeng tak kepti kikau ug bipek ninyeng tak kepti ningwig honti jo ei srat Nipui Sut Yehu Di Hanani Nipmot niyai joti di jo ei srat Nibohon Nibou Ndig Mben Israel Nyati.

³⁵Mpe di gom ne Yosafat di nok nibou ndig mem timiei Yehuda nya dini jem nisut bit Ahazia di nok nibou ndig mem mben Israel di bon mun di kinei nindig bibor.

³⁶Ba, ibon kibar minyei ei muk nuhuisi Ezion-Geber leu binhyepo iba kibar dima bimbut muk ngwa dip ug ei Tarsis.

³⁷Noro Nabi Eliezer di Dodawa nipmot di nitimieisi leu minu ndig Maresa sok kep Yosafat bipai “TUHAN mibindei sar Na Di Andigpoi ade midyai di ayai kep dima hagom lewo ajem asut bit Ahazia.” Lene TUHAN bindei nggek kibar ngot nide di bon nya apino dem mem gima kibar mbut ei muk ngwa dip bi sren.