Read Hatam NIBOHON MBEN ISRAEL GI NICAN 21 Bible Online

NIBOHON MBEN ISRAEL GI NICAN 21 - Hatam bible

NIBOHON MBEN ISRAEL GI NICAN 21

¹Yosafat mai lene itig ei jui dip di ibet ei mem itig kep nibou ndig nya ingut eisi ei Daud De Minu Ndig. Leu api nipmot Yehoram kui bigwam nok nibou ndig biya luei nohoti bu.

²Yehoram di Yosafat nipmot di nok nibou ndig mem timiei Yehuda nya bon nikinjoi bat ningkom hak ibou muhwindagom ba, inyeng rino Azarya kin Yehiel kin Zakharia kin Azariahu kin Mikhail kin Sefaca.

³Yo dini iba yokep mas kin perak kin ndigban di nibok kak nindigsi nya mang bibor leu icigya. Lene icig kwas minu ndig di bon tentara nibousi di igya coi ei minu Yehuda ba, bikwop nipmot bat nya yahagom. Noro Yosafat ndo Yehoram di nipmot mighumbou nok no di kui binok nibou ndig biya luei nohoti bu.

⁴Tirigi Yehoram kan lo, ninyeng tak kepti sindem tu lene cuk tungwatu nya ba, igyai nimai bak nikinjoi bat ningat-ngat pima yok yahagom kin nibou mben Israel ibou poi cem.

⁵Yehoram kui bigwam nok nibou ndig mpe dino nide njap ug ei ari bingwam ningot ningai ba, can. Ninyeng tak kep timiei Yehuda nya mem nijam ari bingwam muhwindaningai ei minu ndig Yerusalem.

⁶Yehoram yai bram Nibou Ndig Ahab kin nibou ndig mben Israel nindigsi nya igyaisi ba, wak Ahab nipmisop gom. Noni bon sisar tut TUHAN tu.

⁷ Noro TUHAN kou sut gima cok tut Daud de nintun him yamti di bram yam nya di ikui bigwam nok nibou ndig nya lewo Noni preu ei nipou su bipia yo di intun Daud him nya mporo inyeng mitak kep ide limwa nya kikau.

⁸ Tirigi nijam di Yehoram ninyeng tak kep dima lene mben Edom yaham imbuk kep minu Yehuda leu api ta nide ninyeng tak kepti ba, ya binonti.

⁹Gima rino Yehoram kin nide nibou pran nya yehei sut ide kroba pran leu api injei bihwen tentara Edom. Noro tentara Edom igyon ttai yok bibiddei yok ndam yam. Himmun dima lene Yehoram nya iku yok biyoom yok nyahan sin yokti ba, inang bingwes ngun hak leu yok.

¹⁰Hon kep njap dima kwei lene nibou ndig mben Edom nya ibou cut bak nibou ndig timiei Yehuda nya bu bi. Ei nijam dima ne timiei minu ndig Libna cem yaham imbuk kep nibou ndig timiei Yehuda nya. Mun di buhun dini hagom cut igkep Yehoram lewo ba ninghim bak TUHAN Allah di nidigup bat-nidigai bat nya ikuk yok bak.

¹¹Apino noni win mpia di ikuk yok bak kwar eisi nya ei nungug him ei minu Yehuda ug a. Apino gima bindei dino timiei Yehuda kin timiei Yerusalem nya ibon sisar tut TUHAN.

¹²Leu api Yehoram yai srat gom di Nabi Elia pas tirigi niyaisi jo yo. Srat dima nibimbiti pai “TUHAN Allah di Daud kuk no bak kes hukum ei Na Di Andigpoi dip lewo agiyai bram acig kin agnyon igyaisi bi.

¹³Noro Na Di Andigpoi ayai bram nibou ndig mben Israel igyaisi. Lene abindei ba, timiei Yehuda kin timiei Yerusalem nya iba ingon di gom bibit Allah bi. Na Di Andigpoi abon munti noyam kin Nibou Ndig Ahab kin nibou di igya luei nohoti nya ibon munti nya. Lene gima he bi lewo mbro nok gino akinjoi bat ningat pima yok igyai munti nya kei dor njiriek Na Di Andigpoi ayai munti nya lo, ayai nimai bak yahagom hak.

¹⁴TUHAN mikes hukum nindig bibor ei ade limwa nya kin amunggwom bat nya kin atnem bat nya yahagom dip. Lene Noni mibindei sar ndigban ngot di Na Di Andigpoi anyeng tut nya cem hagom.

¹⁵Lene Na Di Andigpoi nanti cem mporo anggwen tug hon anghop pmot dwoi ba, anggwenti dima mikum eisi bikwop njap kikau ba, buhun bibor.”

¹⁶Mpe dima lene TUHAN pingok ei mben Filistin kin mben Arab di ibong dideu mben Sudan ibongti ei les him ingonti leu binhyepo ikon pran bit Yehoram.

¹⁷Icoi ug ei minu Yehuda bihwen yok leu lene icoi ug ei minu ndig Yerusalem binggek nibou ndig de ig cem. Lene ibikat Yehoram nimunggwom bat nya kin nitnem bat nya yahagom bingkwei sut yok. Noro Ahazia di Yehoram nipmot nipumiap nongkom he rino ningwes ngun leu ba, igikat bi ug a.

¹⁸Tirigi mun dima yok cut igkep yok lene TUHAN ba ninghop komti di nggwen bibor bihwen Yehoram apino giyai ningkek ngun eisi hanyen kan bi.

¹⁹Ninggwenti dima om no kikau mem nijam ari bingwam nitindur can bibindei ba, ninghuisi wei bibor lene jo kep kikau bimai sut. Noro nide limwa nya igikwap hum nindig bibor di bindo tut gi ibou cut binoni noyam kin gi ikwap mem idigup bat-idigai bat nya pima bi.

²⁰Nide limwa nya hi di nso tut nimaisi dima cem bi. Lene itig ei Daud De Minu Ndig noro igitig bit nibou ndig nindigsi nya ei jui dip nibou ndig pima bi. Tirigi po Yehoram kui bigwam nok nibou ndig pima ne nide njap ug ei ari bingwam ningot ningai ba, can. Ninyeng tak kep mem nijam ari bingwam muhwindaningai ei minu ndig Yerusalem.