Read Hatam NIBOHON MBEN ISRAEL GI NICAN 23 Bible Online

NIBOHON MBEN ISRAEL GI NICAN 23 - Hatam bible

NIBOHON MBEN ISRAEL GI NICAN 23

¹Ug ei ari bingwam gi nimuhwindacan lene Imam Yoyada kos tut mem gima kon Yoas nok nibou ndig bu. Gima rino kes ningon kanti nyahan bak nibou tentara nya ibou muhwi mungkun. Yo dima inyeng rino Azarya di nicig Yehoram kin Ismael di nicig Yohanan kin Azarya di nicig Obed kin Maaseya di nicig Adaya kin Elisafat di nicig Zikhri.

²Nibou tentara dini yok imbut bidem minu ndig ngot di jo ei minu Yehuda hagom ba, induk Lewi nya kin nibou mem insi de nya yahagom ba, idem yam leu api ittei yam ug ei minu ndig Yerusalem.

³ Yahagom idem yam hak ei TUHAN De Ig ba, ibon gi preu bit Yoas di nibou ndig nipmot. Yoyada pai biyok “Nibou Ndig Ahazia di mai su nipmot no rini! Suar ikon noni nogindini ba, kui bigwam banggo mbrei nibou ndig dip. Lewo TUHAN preu ei nipou su bipia Daud de nintun him yamti di bram yam nya inyeng mitak kep ide limwa nya kikau.

⁴Gima rino suar jiyai igbit dingon kanti dini. Tirigi imam nya kin Lewi nya igyai midyai ei Njap Nigwam Kep Ninghuisi bidem leu su lene ma imbut au. Noro ma ikwas yam ei nimpung ningai ba, nimpung gi nigom igya ser dimbou pmem nya ei TUHAN De Ig bingkiem ba,

⁵nimpung gi nican bu igya ser nibou ndig de ig lene nindigsi nya igya ser Dimbou Pmem Nikiou. Suar limwa nya yahagom induk yam kwei ei TUHAN De Ig.

⁶Ma hi dima coi ug ei Ig Bei dima au. Noro imam kin Lewi nya di igyai midyai he rima icoi ug eisi. Tut yoni ne ma icoi hak ug lewo TUHAN dimig yo dini pijum ei mem Nonti tu. Suar nindigsi nya ibit TUHAN nicukti nya ba, yahagom igya hak nisai.

⁷Suar Lewi nya ikus ide simeda leu naham bikrau ei inda him ba, ibiya ser nibou ndig leu binhyepo ibicuon niyaisi ug ei nimbutti nya hagom. Suar jiyai nimai bak tungwa tou rino pigau hanjop bicoi ug ei TUHAN De Ig hak ug.”

⁸Lene Lewi nya kin timiei Yehuda nya iba ibou coi mem Imam Yoyada nicuk yokti dima hak. Yo di ikes inda tut midyai di igyai ei Njap Nigwam Kep Ninghuisi dima cem igimbut leu TUHAN De Ig bi. Gima rino nibou tentara nya induk yo di sindi ikes inda tut midyai di igyai nya kin yo di sindi ikwei mem igyai midyai nya kwei ba, iba yahagom bicom yam.

⁹Imam Yoyada kwas micim kin mun di ibipukep siceu ide minggwen nya di Nibou Ndig Daud de di igyok ei TUHAN De Ig pima tut nibou tentara nya.

¹⁰Yoyada kes yo di ikus ide simeda leu nahamti di ikrau ei indati nya ba, igya ser dimbou pmem ei Ig dima nuhui nu kwei.

¹¹Tirigi yo di igya ser nya ibon nipui bigya igyati bidem leu api Yoyada ug buwak Yoas ba, hei sut kwei leu TUHAN De Ig. Tirigi hei sut Yoas kwei su lene Yoyada kon topi nibou ndig ba, bijuk nibou a. Lene bikes Srat Tut Allah Nicukti cem bak. Tug hon midut dima lene ibikon Yoas kui bigwam nok nibou ndig. Leu api Imam Yoyada ya tut nimunggwom bat nya ba, isiber mini midut nibikon Yoas nok nibou ndig ei nibou nggram him ba, limwa nya yahagom ijem “Na di nibou ndig e, ma ayaijo ninno ug o!”

¹²Tirigi Atalya miap limwa nya di iba nimbos-hi-mbos bikon nibou ndig ninyeng dima lene bisau haninyai buug ei TUHAN De Ig him. Lewo imang bibor idem yam ba, ingwig ttai mpia dima.

¹³Ug krau su lene ngat nibou ndig nijep di ya hak ei dimbou hui ei TUHAN De Ig nuhui bingat nibou tentara nya kin yo di imiep pun mbrei di igya ser mpia di ibindei kui Yoas binok nibou ndig eisi pima. Lene limwa nya yahagom iba ingon di llei bimbos-hi-mbos bibimiep pun mbrei cem ser. Yo di ikek kep musik ei TUHAN De Ig cem iba musik hi gom hi gom bikon njap midut dima. Lene Atalya ba ningon di digit birik nide sinsun lene bahara pia “Jikinei sut da bijitri da o! Jikinei sut da bijitri da o!”

¹⁴Yoyada ce tut gima igyai nimai bak Atalya ei TUHAN De Ig him bi. Gima rino pai bak nibou tentara nya “Jibuwak noni ba, jimbut sin nimpung di igya ser dimbou pmem a. Lene ma jiyai nimai bak bikwop tungwa tou rino brim ningkek bicuon sop dima niyaisi hak ug.”

¹⁵Lene ikat noni ba, ikri ug ei nibou ndig de ig leu api igyai nimai bak ei Dimbou Pmem Kuda nuhui ei nibou ndig de ig him.

¹⁶Lene Imam Yoyada hara mem Nibou Ndig Yoas kin nide limwa nya yahagom bitut nonti leu api ipreu ei TUHAN Noho bei bipia yoni mingon gom tut TUHAN.

¹⁷Gima leu lene yahagom injei ug ei ig Baal binggek bitti hak ug ei dihyeisi. Igya kep nimbar hum dok kin kwar nya ba, idram bindung-diem hak. Lene ikat Matan di imam Baal ba, igyai nimai bak hak ei nimbar hum dok nuhui a.

¹⁸Leu api Imam Yoyada ndo midyai bak imam nya kin Lewi nya leu binhyepo yahati tut midyai ei TUHAN De Ig bit leu nok gi Nibou Ndig Daud dimig ei mem yok nipou su. Suar ibon midut nindig mindhe-ndhe titut ei nimbar hum dokti bak TUHAN dem igbit Musa niggai serti nya ba, iba doia bibon midut noyam kin doia di Daud dimig nipou ei su.

¹⁹Yoyada kes tentara di igya ser dimbou pmem ei TUHAN De Ig bigya ser leu binhyepo bit bon yo di map kui yokti nya icoi ug eisi bi.

²⁰Noni ya tut nibou tentara nya kin nibou di inyeng tak kep kin nibou di yahati tut minu Yehuda nya kin limwa nya yahagom ba, injei bit Nibou Ndig Yoas leu TUHAN De Ig ug ei nibou ndig de ig. Ibuwak Yoas ba, ibicoi Dimbou Pmem Di Bon Ninyeng leu api Nibou Ndig Yoas kui bigwam ei banggo mbrei ninyeng tak kepti dip.

²¹Nide limwa nya yahagom ingon nggei-hi-nggei lene mpia mbum-bra bidem minu ndig dima lewo igyai nimai bak Atalya leu su.