Read Hatam NIBOHON MBEN ISRAEL GI NICAN 27 Bible Online

NIBOHON MBEN ISRAEL GI NICAN 27 - Hatam bible

NIBOHON MBEN ISRAEL GI NICAN 27

¹Yotam kui bigwam nok nibou ndig ei mpe dino nide njap ug ei ari bingwam nyatungwagom ba, muhwi. Lene ninyeng tak kep mem nijam ari bingwam simnaimuhwidip brimigtehigom ei minu ndig Yerusalem. Nipmem ne Yerusa di Zadok nipmisop ri.

²Yotam pwoi TUHAN ningon noyam kin nicig Uzia cem. Noro noni coi ug ei TUHAN De Ig bindig biei nggrai di ui-gwang kei eisi bi sren.[11] Mbro nok gima lo, nide limwa nya ibon kep sisar kikau.

³Yotam rino win Dimbou Pmem Nite Bei Mpia Nijjai ei TUHAN De Ig lene bindei ngkiem ngug tig minu ndig Yerusalem ei mpia di ijem Ofel.

⁴Lene win minu ndig ngot di jo ei nungug him ei minu Yehuda kin tentara nibousi di igya coi nya kin ig di bon ninggre di jo-jo yam dip anai mem ibiya ser bidem bahamti nya cem.

⁵Noni kon pran bit Nibou Ndig Amon lene bindei timek noni bitut nide tentara nya cem. Leu api bidip huk mben Amon leu binhyepo iba mitiei belasten bigo gau yonti bikwop ari bingwam. Iba mitiei belasten dima bigo gau yonti bikwop ari bingwam nitindur ningai. Ba, bikwop ari bingwam ningai di gwam yam dip dima iba perak kilo sribu ningai sratus bitai kin gandum nitu kin gandum barli hacem nibuhunti kilo juta gom ba, iba hagom bigo gau yonti.

⁶Yotam nisindemti kum eisi kikau lewo ba ningon di gom bibit TUHAN Allah Nihyet.

⁷Mun nindigsi di pek kep mem Yotam kin nikon pranti nya kin ninggok puigsi nya hagom jo ei srat Nibohon Nibou Ndig Mben Israel kin Nibou Ndig Mben Yehuda Nyati.

⁸Yotam kui bigwam nok nibou ndig mpe dino nide njap ug ei ari bingwam nyatungwagom ba, muhwi. Ninyeng tak kep bidem ari bingwam simnaimuhwidip brimigtehigom ei minu ndig Yerusalem.

⁹Lene noni mai ba, itig ei Daud De Minu Ndig. Leu api nipmot Ahas kui bigwam nok nibou ndig biya luei nohoti bu.