Read Hatam NIBOHON MBEN ISRAEL GI NICAN 28 Bible Online

NIBOHON MBEN ISRAEL GI NICAN 28 - Hatam bible

NIBOHON MBEN ISRAEL GI NICAN 28

¹Ahas kui bigwam nok nibou ndig ei mpe di po nide njap ug ei ari bingwam nyatungwagom. Lene ninyeng tak kep bidem ari bingwam simnaimuhwidip brimigtehigom ei minu ndig Yerusalem. Noni yai bram nidigai Nibou Ndig Daud niyai munti nya bi ba, noni bon mun di bipwoi TUHAN ningon cem bi.

²Niyai munti nya noyam kin nibou ndig mben Israel nya. Noni cuk tungwatu nya ba, iba ngkimom nitu bibon kwar Baal nya mang bibor ba,

³bindig biei nggrai di ui-gwang kei ei Mbang Briep Hinom cem. Noni bui nonti nipmot bindig ei nimbar hum dokti ba, bikuk no bak kwar nya. Bon nok gima ba, bibit leu yo po TUHAN jji yok leu minu Kanaan pima ibon kepti di kinei bibor nya. TUHAN jji yok mpe di po mben Israel icoi bikieng kep minu Kanaan.

⁴Ahas ba mindhe-ndhe bibon midut ei nimbar hum dokti nya ba, bindig biei nggrai di ui-gwang kei ei nimbar hum ndok nya cem bidem mpia di ikuk yok bak kwar nya eisi ei nungug dip nya kin biei ndig behei di nggrou kei nya.

⁵ Gima rino nide TUHAN Allah sindui sut ba, nibou ndig mben Siria bindei timek Ahas drek dip nide sisar. Lene bikat timiei Yehuda nya imang bibor bikri yok ug ei Damsyik ba, inok awak ei ingkiaisi. TUHAN sindui sut ba, Nibou Ndig Pekah di Remalya nipmot leu mben Israel cem bindei timek Ahas de limwa nya biyai nimai bak tentara timiei Yehuda nya di mimbri kui ingkek nya ibou sribu sratus gom ningot can mem njap gom ngat he. Idigup bat-idigai bat nya ide TUHAN Allah sindui sut mun di buhun dima yok hagom bicut igkep yok lewo timiei Yehuda nya igibit TUHAN Nihyet bu bi.

⁷Zikhri di tentara Israel ide nibou yai nimai bak Maaseya di Ahas nipmot kin Azrikan di ninyeng tak kep midyai ei nibou ndig de ig kin Elkana di ya kui nibou ndig ninda com cem.

⁸Mbro nok gino timiei Yehuda nya ide pung kim mben Israel lo, tentara Israel ikat sop ibou sribu sratus can kin imunggwom bat nya ba, isima. Leu api ikri yok ug ei Samaria. Tentara Israel nya imbut tut ndigban di ipos leu timiei Yehuda nya mang bibor cem.

⁹Oded di TUHAN de nabi no bong ei minu ndig Samaria. Mpe dino tentara Israel ikat timiei Yehuda nya imang bibor bikri yok hanyen kwei lene isima ei minu ndig Samaria. Tirigi tentara nya ingkwei hanyen ug ei minu ndig dima tu lene Oded ug ngat yok bipai biyok “Jibindei timek timiei Yehuda nya drek dip gi po jidigup bat-jidigai bat nya ide Allah gga yoni. Noro TUHAN ngat gi jiba jisibut biyai nimai bak tentara timiei Yehuda nya bou niyai him.

¹⁰Nogindini juubon timiei minu ndig Yerusalem kin timiei Yehuda nya ba, inok jide awak nya bu! Jikan tut bipia jeni cem jibon sisar tut jide TUHAN Allah bi e?

¹¹Jimiap e, yo di isima binok jide awak dini ne je di adig-ajoi ningat-ngat nya ri. Gima rino ma jikes yok bingkwei ug ei ide ig hanyen hak ug. Gi bi lene TUHAN migga jeni bu bikes hukum ei je dip.”

¹²Lene nibou mben Israel di inyeng jei ibou bitai di inyeng rino Azarya di Yohanan nipmot kin Berekhya di Mesilemot nipmot kin Yehizkia di Salum nipmot kin Amasa di Hadlai nipmot ba, yoni cem isrep tut tentara di ingkwei hanyen leu pranti dima ibon munti.

¹³Bipai ser yok “Ma jibuwak yo di isima dima yok kwei au! Nyeni ibon sisar tut TUHAN ba, sisar dima nindig bibor lene dem mem gima itug ndei hukum drek dip. Nogindini jijoi sut mem gima jibon mun di bikum ei ide nitunggweisi bu!”

¹⁴Lene tentara dima yok ikes yo di ikat yok nok awak kwei nya kin ndigban di ipos nya hagom bak limwa mben Israel nya kin ide nibou nya cem.

¹⁵Lene nibou mben Israel di inyeng jei ibou bitai pima ikiju ba, yahati tut yo di tentara nya ikat yok kwei pima yok. Ikwas sinsun di jo srig ndigban di ipos di ikwei sut pima tut yo di isuar nya ba, ikwas srop kin njita kin ndia ngei di idut cem tut yok. Lene iba mini zaitun bidip ibokti cem bibindei kui yo di isindem mem gima imbut imig bi nya ei keledai nya dip bibuwak yok ug ei minu ndig Yerikho di nok dui sraba ninghousi. Leu binhyepo yahagom ingkwei hanyen ug ei ide minu bei di jo minu Yehuda hanyen. Leu api mben Israel ingkwei hanyen ug ei Samaria.

¹⁶Mpe dima lene mben Edom ikiju bihwen timiei Yehuda nya hanyen bu bikri imang bibor ug ba, isima. Gima rino Nibou Ndig Ahas hara Tiglat-Pileser di nibou ndig mben Asyur leu binhyepo cuk nide tentara nya kwei bimpu no.

¹⁸Mpe dima lene mben Filistin icoi minu ndig ngot di jo ei nungug kiou ei nite bei mpia nicutti kin minu Yehuda ei nite bei mpia nibiho cem. Igya kep bihwen minu ndig Bet-Semes kin Ayalon kin Gederot bitut minu ndig Sokho kin Timna kin Gomzo kin minu mien ngot di jo ttai minu ndig ningai dima. Leu api ibong timiei eisi.

¹⁹TUHAN bindei ba, mun di buhun bibor cut igkep timiei Yehuda nya lewo Ahas di nok nibou ndig mem timiei Yehuda nya ba ninghim bak TUHAN lene bie tut ninyeng tak kepti mungkun kei bi cem.

²⁰Nibou ndig mben Asyur dima gikwei mem gima mpu Ahas bi noro tte tut noni bibindei ba, mun di buhun bindin Ahas.

²¹Apino bitig dino Ahas yai mas leu TUHAN De Ig kin nibou ndig de ig kin limwa nya ide nibou nya ide ig cem ug a. Leu api njei mun dima yok hagom bak nibou ndig mben Asyur. Noro mas dima bon ninyeng mem no bi.

²²Mbro nok gino mun di buhun dima bindin Ahas nindig bibor lo, noni bon kep sisar tut TUHAN bikum eisi kikau.

²³Ahas bindei ba, mun di buhun bibor cut igkep nonti kin nide limwa nya tug hon gi bui mindhe-ndhe bindig ei nimbar hum dokti bak mben Siria po ibindei timek noni tu pima ide kwar di ikuk yok bak nya hanyen. Lewo kan “Mpaba mben Siria ide kwar nya impu nibou ndig mben Siria. Ba, gino sa sibui mindhe bisindig ei nimbar hum dokti bak kwar dima ne hi rima mimpu sani cem a.”

²⁴Gima leu api cat ndigban di jo ei TUHAN De Ig hagom ba, bindei kinei ningwig a. Leu api kiju binggam TUHAN De Ig dima hak ei biwin nimbar hum dok nya bidem minu ndig Yerusalem titut.

²⁵Noni kiju biwin mpia di ikuk yo bak kwar eisi nya mang-mang bikwop minu ndig kin nimien nya ei minu Yehuda nisurti-nipekti. Leu binhyepo nide limwa nya indig biei nggrai di ui-gwang kei bak mben ngkiai ide kwar nya ei niti. Tug hon nibon munti dima lene bindei ba, nidigup bat-nidigai bat ide TUHAN Allah gga noni.

²⁶Nipui mun tut Ahas ninyeng tak kepti kin nibon munti nya hagom leu nimbie him ug bipek ningwigsi hagom jo ei srat Nibohon Nibou Ndig Mben Yehuda kin Nibou Ndig Mben Israel Nyati.

²⁷ Ahas mai lene itig ei minu ndig Yerusalem. Noro igitig ei nibou ndig nya ijui dip bi. Lene nipmot Hizkia kui bigwam nok nibou ndig biya luei nohoti bu.