Read Hatam NIBOHON MBEN ISRAEL GI NICAN 29 Bible Online

NIBOHON MBEN ISRAEL GI NICAN 29 - Hatam bible

NIBOHON MBEN ISRAEL GI NICAN 29

¹Hizkia kui bigwam nok nibou ndig mem timiei Yehuda nya ei mpe dino nide njap ug ei ari bingwam nyatungwagom ba, muhwi. Ninyeng tak kep bidem ari bingwam nyatungwagom ba, muhwindatai ei minu ndig Yerusalem. Nipmem ninyeng rino Abia di Zakharia nipmisop.

²Hizkia nibon munti nya bipwoi TUHAN ningon noyam kin nidigai Nibou Ndig Daud.

³Hizkia kau dimbou ei TUHAN De Ig hanyen ei bed gi nigom ei ari bingwam gi nigom di ninyeng tak kepti dima leu lene cuk tungwatu nya ba, ikinding nikineisi nya hanyen.

⁴Noni cuk imam nya kin Lewi nya ba, idem yam ei mpia di jo bas hak di iba ngug tig bikrop ttai ei TUHAN De Ig ei nite bei mpia nipriti,

⁵bimbrap bit yok ei mpia di jo bas hak di iba ngug tig bikrop ttai dima. Noni pai biyok “Suar je di Lewi nya jidimig jenti pijum hak ei mem TUHAN. Lene ma jibindei pwoi jidigup bat-jidigai bat nya ide TUHAN Allah De Ig. Suar jicom mun nyeng di bindei dino map kui Ig dima hagom leu ug e.

⁶Idigup bat-idigai bat nya iba ingon di gom bibit TUHAN Allah bi. Ba, ikes Noni ei leu api iba inghim bak Nide gumihyep di Ningat rin eisi dini cem.

⁷Yoni inggam dimbou nya ei TUHAN De Ig ba, ibimu Nide mini njeng di njeng nya lene indig biei nggrai di ui-gwang kei ei Nide Ig cem bi. Ba, igibon midut nindig mindhe-ndhe titut kep humti bak Allah di mben Israel ikuk yok bak cem bi.

⁸Apino TUHAN ba nigga bikes hukum ei timiei Yehuda nya kin timiei minu ndig Yerusalem nya dip ug a. Niyai nibou tutti dima ribindei dino yahagom idigit tut ba, ingkek hyenha tut cem.

⁹Icig bat nya imang bibor ikrop bimai ei pranti ba, siceu nya ikat itnem bat kin imunggwom bat nya imang bibor ba, isima cem.

¹⁰Nogindini diyok dingon mem gima dipreu mun ei mem mben Israel ide TUHAN Allah leu binhyepo Noni gga nye bu bi.

¹¹Dimunggwom bat jen, ma jibindin-ndin nyen bu au. Lewo TUHAN dimig jeni ei mem gima jikuk je bak Allah ba, joom jenti nok awak mem Noni ba, jindig biei nggrai di ui-gwang kei cem lene mem gima jibie tut Nide limwa nya leu binhyepo ikuk yok bak Noni cem tu.”

¹²Lewi nya di idem yam ei sirima inyeng Mahat di Amasai nipmot kin Yoel di Azarya nipmot leu Kehat ninsi de nya kin Kish di Abdi nipmot kin Azarya di Yahaleleel nipmot leu Merari ninsi de nya kin Yoah di Zima nipmot kin Eden di Yoah nipmot leu Gerson ninsi de nya kin Zimri kin Yeiel leu Elisafan ninsi de nya kin Zakharia kin Matanya leu Asaf ninsi de nya kin Yehiel kin Simei leu Heman ninsi de nya kin Semaya kin Uziel leu Yedutun ninsi de nya.

¹⁵Nidipti bu ne induk yo di Lewi nindigsi nya bu ba, yahagom idem yam ei lewo suar ibindei kwes yonti. Gima leu lene nibou ndig cuk imam nya bicoi ug ei TUHAN De Ig ba, ibindei kwes Ig dima bit leu nok TUHAN De niggai serti nya. Ibindei hei mun nyeng di map kuisi tu nya hagom ug ei nisai bikes ei Ig him. Leu api Lewi nya ipian bu leu mpia dima biyuug sut ei Mbang Briep Kidron ei minu ndig Yerusalem nisai.

¹⁷Ikinyon ei midyai dimati bigyai ei njap gi nigom mem bed gi nigom. Lene ibindei pwoi mpia di jo bas kin bisai ei TUHAN De Ig dima nuhui him nya hagom biput ei ninsi njap muhwindaningai. Leu api ibindei pwoi Ig dima ningat titut yam ei ninsi njap muhwindaningai biput ei njap gi nisimnaimuhwidip brimigtehigom mem bed gom dima.

¹⁸Leu api Lewi nya di igyai midyai dima ingkwei bipai sut midyai dima nimbutti hanyen bak Nibou Ndig Hizkia. Ingkwei bipai “Nibindei pwoi TUHAN De Ig titut yam hanyen bu bitut nimbar hum dok di mem indig mindhe-ndhe titut eisi kin meja di mem idis roti ei TUHAN Noho bei ei dip kin nimbumbati nindigsi nya hagom tu.

¹⁹Nibingkwei ndigban mem TUHAN De Ig po Nibou Ndig Ahas cat leu Ig dima ninsi nya ei nijam di ninyeng tak kep timiei Yehuda nya biba ningha bak Tuhan pima hanyen eisi tu. Nikes mun nyeng hagom ei TUHAN De Ig ba, gima jo pijum ei mem Noni hanyen bu tu. Ba, ndigban dima yok hagom no jo ei nimbar hum dok nuhui.”

²⁰Nibou Ndig Hizkia binyen tut bi. Noro nduk nibou di inyeng jei nya yahagom bidem yam ei lene ya tut yok ba, icoi ug ei TUHAN De Ig.

²¹Ibijem sapi nikre ningut muhwindacan kin domba nikre ningut muhwindacan kin domba pmot ningut muhwindacan kin kambir nikre ningut muhwindacan kwei mem gima ibibon midut nibiyai nikos ser sisarti gau nibou ndig nide bat nya kin limwa nya ide sisar ba, ibindei pwoi TUHAN De Ig hanyen cem. Nibou ndig cuk imam di intun Harun him nya ibon midut nindig mindhe-ndhe dima yok ei nimbar hum dokti bak TUHAN.

²²Ibui sapi dima yok leu api imam nya iba ninggrom biprok nimbar hum dok. Leu api igyai nok gima tut domba ningut muhwindacan pima kin domba pmot ningut muhwindacan pima cem.

²³Ibijem kambir pima yok bak nibou ndig kin limwa nya di ingat rin bikuk yok bak TUHAN ei gumihyep dima. Leu api yahagom ikes inda ei kambir dima yok dip.

²⁴Igyok inda ei dip bidem leu api imam nya ibui ba, iba ninggrom biprok nimbar hum dok. Iba midut dima biyai nikos ser sisarti gau limwa nya yahagom. Ibon midut nindig mindhe-ndhe titut kin midut nibiyai nikos ser sisarti ei nimbar hum dokti gau limwa nya yahagom nok gima lewo nibou ndig cuk yok tut.

²⁵Nibou ndig kes Lewi nya ei TUHAN De Ig mem gima iba nggong mbrei kin yeng beng bipai doia noyam kin gi po Daud krau kep nipou pima. Noni yai bram Daud niyaisi dima bit leu TUHAN nipingok Daud ningonti tug hon Nabi Gad kin Nabi Natanti. Nibou ndig kes imam nya cem ba, ikrau pun mbrei nya bigya ei sirima.

²⁷Hizkia yai mun di bitto leu binhyepo ikinyon ei nibon midut nindig mindhe-ndhe ei nimbar hum dokti. Tirigi ibui kep mindhe-ndhe bindig kep ei nimbar hum dokti rino limwa nya iba doia bikon TUHAN ninyenga. Lene yo di ikek musik nya iba pun mbrei nya kin nggong mbrei nya kin yeng beng nya kin musik hi ter nya cem bipai doia.

²⁸Nibou Ndig Hizkia ya tut limwa nya di ingat rin ei sirima bikuk yok biba ibiau bicom mpia ba, iba ingwak bikik dihyei bikuk yok bak TUHAN. Yo di ipai doia yuhui jo kep doia bipai kikau. Lene yo di ikek kep musik di ibipai doia nya inda jo kep musik bikek kikau bibou hum yem mindhe-ndhe di ibui bindig ei nimbar hum dokti hagom bingwig ug e.

³⁰Nibou ndig kin nibou di inyeng jei nya icuk Lewi nya bipai doia nibikon TUHAN ninyeng ngot di Daud Asaf nya ipas kep nya. Tungwatu nya yahagom iba ingon di nggei-hi-nggei bipai doia lene iba ibiau bicom mpia lene iba ingwak bikik dihyei cem bibikuk yok bak Allah.

³¹Gima leu lene Hizkia pai biyok “Jahagom jidimig jenti pijum ei mem TUHAN tu. Gima rino suar jittei kep mun di mem nibon midut nindig ei nimbar hum dokti kwei ei TUHAN De Ig dini leu binhyepo jibipai sigyo bak Noni.” Leu api yo di idem yam ei su yahagom ittei mun di ikwas tut TUHAN kwei. Nok gima cem bihi ijem ide mindhe-ndhe mikuisi hak bit leu ingon joi sutti kwei mem gima ikwas ba, ibibon midut nindig mindhe-ndhe titut ei humti bak TUHAN.

³²Yo dima ijem ide sapi nikre ningut ningot muhwindacan kin domba ningut sratus gom kin domba pmot ningut sratus can kwei bikwas hagom tut TUHAN mem gima ibibon midut nindig mindhe titut ei nimbar hum dokti bak.

³³Ijem sapi nikre ningut sratus muhwindagom kin domba ningut sribu ningai kwei mem gima ikwas tut TUHAN bibui nok mikwau lene yo di idem yam ei yahagom igyem njita bit yam.

³⁴Imam di ibindei kwes yonti ibou poi he ba, dem mem gima yeet mindhe-ndhe dima hagom ningkek leu bi. Gima rino Lewi nya impu yok tut neet mindhe ngkek leusi lewo ingon gom tut nibon midut nipiap yonti bipwoi dor njiriek imam nya. Gima rino Lewi nya impu yok tut midyai dima kikau bibou imam di ibindei pwoi yonti imangti dem ug e.

³⁵Ter leu nibon midut nindig mindhe-ndhe titut ei nimbar hum dokti dima ne imam nya indig nimmau ndok di ikus leu mindhe-ndhe di ibipai sigyo bak TUHAN bibui nok mikwau di igyem dima ba, ikiber ba anggur ngei bit mindhe-ndhe di indig ei nimbar hum dokti pima cem. Yahagom ikinyon ei nibon midut nikuk no bak Allahti ei TUHAN De Ig tug hon nisinati dima.

³⁶Leu api Nibou Ndig Hizkia kin limwa nya yahagom ingon nggei-hi-nggei lewo Allah mpu yok hak ba, ibon mun dini yok hagom ei nituti di jei bi.