Read Hatam NIBOHON MBEN ISRAEL GI NICAN 32 Bible Online

NIBOHON MBEN ISRAEL GI NICAN 32 - Hatam bible

NIBOHON MBEN ISRAEL GI NICAN 32

¹Tirigi Nibou Ndig Hizkia bon mun nyeng di bindo tut ningon di gom tut TUHAN leu su lene Sanherib di nok nibou ndig mem mben Asyur sindi coi biyai minu Yehuda ninghas him biyati. Lene cuk nide tentara nya ba, igyon ttai minu ndig ngot di bon tentara nibousi di igya coi nya bihwen yo di ibong minu ndig dima leu ba, igyai bigyati.

²Tirigi Hizkia kan tut Sanherib ningon kanti di tin ei mem hwen minu ndig Yerusalem tu,

³lene noni ya tut yo di igya kui noni kin nide nibou tentara nya ba, ikos tut mem gima iji kep minyei bousi nya di jo ttai minu ndig dima hagom. Leu binhyepo mpe dino tentara Asyur nya ikwei yon ttai minu ndig Yerusalem lene bit bon itau minyei hi mem tungwatu kin mindhe-ndhe di ide nya bidut kan bi. Lene Hizkia nya icuk tungwatu nipmem ngat ba, iji kep minyei bousi ngot di biam bei minu ndig dima nisai nya hagom.

⁴

⁵Leu api nibou ndig bindei sindem minu ndig dima tug hon tungwatu nya di noni cuk yok bikinding ngug tig nya hanyen ba, iwin ig di bon ninggre di jo-jo yam dip anai ei ngug tig dima dip ba, cuk tukan nya biwin ngug tig nibikrop ttai hi kin bu ei nisai ma kwei cem. Ba, igyai munti dima bindei sindem minu ndig. Nok gima cem Hizkia cuk yok bigya kep tentara nibousi di igya coi ei mpia niji kepti ei nite bei mpia nipriti ei minu ndig Yerusalem timiei nisai pima ba, ikinding bikei hanyen. Lene cuk yok leu binhyepo ibon micim kin mun di ibipukep ser siceu ide minggwen ninggwenti nya mang bibor cem.

⁶Lene bikon nibou tentara nya mem gima ibie tut pinai di ingat rin ei minu ndig dima yahagom. Lene cuk yok ba, idem yam ei mpia di jo bas hak di iba ngug tig bikrop ttai ei dimbou pmem nuhui ei minu ndig dima leu api pai biyok,

⁷“Ma mimbri kui jingkek ba, jingon nddong kei. Ma jidigit tut nibou ndig mben Asyur kin nide tentara nya au. Nisindemti di ningat rin bit nyeni nindig bibor dor njiriek nisindemti di ningat rin bit noni.

⁸Nisindemti di ningat rin bit noni ne tungwatu nya he. Noro nisindemti di ningat rin bit nyeni ne TUHAN Allah rin ba, Noni mimpu nyeni bikon pran bit nibou ndig mben Asyur kin nide tentara nya gau nye.” Tirigi limwa nya imiap ide nibou ndig nihyet dima lene itug ndei mimbri di kui ingkek noyam.

⁹Njap poi gi nidipti bu tirigi Sanherib ya tut nide tentara nya ei Lakhis lene sok nihyet bak Hizkia kin timiei Yehuda nya di ingat rin ei minu ndig Yerusalem leu binhyepo ibinut nibou ndig mben Asyur nihyet di pai biyok,

¹⁰“Dani ne Sanherib nibou ndig mben Asyur rin ba, dihig ser je nggon rino jibrim jingkek bibor dino jibong kikau ei minu ndig Yerusalem di nogindini siceu igyon ttai dima i?

¹¹Apo Hizkia pai bije bipia jide TUHAN Allah miteu je leu nyende nisindemti e? Ma jiba jingon com noni au lewo ris mun bije hak ug. Noni misindui sut je ba, jimai jinggum kin jinggobiau cem.

¹²Noni ripo ya kep mpia di ikuk yok bak Allah eisi kin nimbar hum dok nya di mem TUHAN di nggek ningwig tu. Leu api cuk timiei Yehuda nya kin timiei minu ndig Yerusalem ba, ikuk yok bak Allah cem indig biei nggrai di ui-gwang kei ei nimbar hum dokti gom ngat he cem e?

¹³Apo jigikan tut mun di dani kin didigup bat-didigai bat nya nibon bak mben hiter nya bi e? Bit bon ide kwar nya igiteu yok ba, ingwes ngun leu nibou ndig mben Asyur ninda nsi bigyo sren!

¹⁴Kwar tou risrig yo dima ikieti di bon mun nok gima tu i? Dem tut gima jide kwar teu je bijingwes ngun kan bi sren!

¹⁵Ma jisindui sut jide nibou ndig dima biris je ba, ris mun bije au! Ma jiba jingon com noni au. Lewo bit bon kwar hi sindem mem gima teu nide limwa di ingat rin ei dihyeisi dini ba, ingwes ngun leu nibou ndig mben Asyur ninda nsi di sindem bibor kan bigyo sren. Jo nibreisi bipia jide kwar dima cem miteu je bijingwes ngun kan bi sren!”

¹⁶Lene tentara di Sanherib pinak yok kwei pima ighyet di kinei sut TUHAN Allah kin Hizkia di TUHAN de awak di indat kep nindigsi nya mang bibor bu di dor njiriek gi jo srat diniti no rinaha.

¹⁷Nibou Ndig mben Asyur pas srat cem bisrep tut TUHAN Allah di mben Israel ikuk yok bak. Srat dima nibimbiti pai “Mben nya hagom ide kwar hi di teu yok leu dinda nsi di sindem bibor ba, ningwes ngun bi sren. Gima rino bit bon Hizkia de kwar dima cem teu nide limwa nya ba, ingwes ngun leu dinda nsi di sindem bibor kan bi.”

¹⁸Lene tentara di Sanherib pinak yok kwei dima iba nihyet Ibrani bitri tut ighyet dima tignam bibor leu binhyepo ibindei ba, timiei minu ndig Yerusalem di idem yam di igwam ei ngug tig dip nya idigit tut ba, ingon dahat leu cem. Leu binhyepo krop kei mem gima tentara dima yok icoi ug ei minu ndig dima ba, ihwen yok leu lene igyai bigyati.

¹⁹Yoni ipai sut Allah di timiei minu ndig Yerusalem ikuk yok bak dima noyam kin gi ipai sut kwar di yo di hiter nya ibon bou inda him bikuk yok bak.

²⁰Leu api Nibou Ndig Hizkia kin Nabi Yesaya di Amos nipmot ikiju bingat nadi ba, yahara Allah leu binhyepo Noni mpu yok.

²¹Apino TUHAN pinak malaikati gom biyai nimai bak tentara Asyur nya kin ide nibou nya di igyon ttai minu ndig Yerusalem pima yahagom. Gima bindei ba, nibou ndig mben Asyur ngkwei hanyen ba, mmai sut nindig bibor. Leu api mpe di gom bu tirigi ningat rin ei nide ig kwar lene nimunggwom bat ningat-ngat nya ibou poi ikwei ba simeda biyai nimai bak ei mpia dima.

²²TUHAN ba nisinati dima biteu Nibou Ndig Hizkia kin timiei minu ndig Yerusalem nya leu Sanherib di nok nibou ndig mem mben Asyur ninda nsi kin ide siceu nindigsi nya inda nsi cem. TUHAN bindei ba, timiei Yehuda nya ibong kei igwam kei leu ba, mben ngkiai leu minu di gahai yok nya igiwaisi yok bi.

²³Tungwatu nya imang bibor ittei mun di ikwas tut TUHAN kwei ei minu ndig Yerusalem. Nok gima cem injei mun di kei nya bak Hizkia. Hon kep gima kwei lene mben nya yahagom ibou cut bak.

²⁴Ei nijam dima ne Nibou Ndig Hizkia cut ei ninggwenti di bindei ba, niwei-nidut cut igkep noni api om no ba, mbigom ma mai hak ug. Noro ngat nadi leu api TUHAN yai mun di bindo bak bipia noni mikei hanyen yo.

²⁵Noro noni gijem sigyo hanyen bak TUHAN tut ginjei mun di kei bak dima bi lewo ningon jei. Gima rino TUHAN ningon sibui sut timiei Yehuda kin Yerusalem nya.

²⁶Noro niabiati bu ne Hizkia kin timiei minu ndig Yerusalem yoom yonti ei TUHAN Noho bei. Gima rino TUHAN kes hukum ei nide limwa nya dip mem nijam di Hizkia niyaisi jo yo dima bi.

²⁷Nibou Ndig Hizkia nyeng tut ndigban nindig bibor ba, tungwatu nya yahagom ibou cut bak. Noni tap ninsi mang-mang mem gima nju ndigban nide di nok mas kin perak kin tig permata nya kin biei ngat di ui-gwang kei kin mun di ibipukep siceu ide minggwen nya kin ndigban di nibok kak nindigsi nya cem eisi.

²⁸Noni ngot ig gudan nya cem mem gima nju ningat miaisi di nok gandum kin ba anggur ngei kin mini zaitun eisi. Noni bon sar nsi nya cem mem sapi nya kin domba nya ningut mang bibor ba, njei hagom bibong ei sar nsi dima yok.

²⁹Ter leu niyai munti dima yok bu lene ngot minu ndig mang-mang cem. Allah njei ndigban nindig bibor ba, mpung bipias hagau bak noni. Lene gima bindei ba, nyeng tut ndigban nindig bibor.

³⁰Nibou Ndig Hizkia dima rino hajung ser minyei bousi Gihon nibiamti. Leu api bindei hei minyei ningei ba, biam kak dihyei nyem di itig ei dihyei jou ug ei minu ndig Yerusalem. Ningat ntun mun nyeng di Hizkia bon hagom him.

³¹Mpe di nibou mben Babel nya ipinak ibou poi kwei mem gima ihig ser Hizkia tut bindo di mindur pima lene TUHAN sindui sut ba, Hizkia buhup bit leu nonti ningon kanti. Tug hon nisinati dima lene TUHAN bingon Hizkia ningonti.

³²Nipui mun nindigsi nya tut Nibou Ndig Hizkia nibon munti nya kin ningon ngakei TUHANti hagom jo ei srat Yesaya Di Amos Nipmot De Ningat-Hi-Ngatti kin srat Nibohon Nibou Ndig Mben Yehuda kin Nibou Ndig Mben Israel Nyati.

³³Hizkia mai leu api itig ei dihyei di itig kep nibou ndig nya kikep eisi pima nijjai. Tirigi noni mai su lene timiei Yehuda kin timiei minu ndig Yerusalem yahagom ibon mun di bindo tut gi inggei sut noni nindig bibor. Lene nipmot Manasye kui bigwam nok nibou ndig biya luei nohoti bu.