Read Hatam NIBOHON MBEN ISRAEL GI NICAN 34 Bible Online

NIBOHON MBEN ISRAEL GI NICAN 34 - Hatam bible

NIBOHON MBEN ISRAEL GI NICAN 34

¹ Yosia kui bigwam nok nibou ndig ei mpe di po nide njap ug ei ari bingwam muhwindaningai tu ba, ninyeng tak kep timiei Yehuda nya ug ei ari bingwam ningot ningai ba, gom ei minu ndig Yerusalem.

²Yosia bon mun di bipwoi TUHAN ningon ba, yai bram nide pung Nibou Ndig Daud niyai kepti nya bibit Allah de nicukti nya hagom titut yam cem.

³Tirigi Yosia kui bigwam nok nibou ndig ei mpe di pilei ngat yo dima bininyeng tak kep mem nijam ari bingwam muhwindaningai leu su lene noni kinyon ei nikuk no bak Allah di nidigai Daud kuk no bak nipou su. Ari bingwam bitai gi nidipti bu ne noni bindei nggek mpia di tungwatu nya ikuk yo bak kwar Sop Asyera ngot kin kwar nindigsi nya hagom eisi nya binnir wap hak.

⁴ Yosia de limwa nya inggek kwar dima yok ba, idram hagom bindung-diem leu api ikam nindung ba, ibigimahap ug ei yo di indig mindhe-ndhe ei nimbar hum dokti bak kwar nya dima ijui dip nya. Ibinggek Baal de nimbar hum dok nya kin nimbar di indig biei nggrai di ui-gwang kei ei niti nya ei mpia dima cem.

⁵ Leu api Yosia ndig imam ngot po igyai midyai mem kwar pima yok injum ei nimbar hum dokti di yonti ide nya dip. Tug hon nisinati dima lene noni bindei ba, timiei Yehuda nya kin timiei minu ndig Yerusalem idem mem gima ikuk yok bak TUHAN hanyen.

⁶Noni bon mun dima yok bidem minu ndig ngot kin hanjop di kinei-kinau ei keret Manasye kin Efraim kin Simeon nya ide hanjop nsi hagom kikau ug bipek kin keret Naftali ide hanjop nsi ei nite bei mpia nijjai.

⁷Yosia nya igya kep bilet Asyera de nimbar hum dok nya di jo bidem Ninyeng Tak Kepti Ei Nite Bei Mpia Nijjai. Igya kep kwar nya kin nimbar di indig biei nggrai di ui-gwang kei eisi nya ba, idram hagom bindung-ndiem hak. Leu api Yosia ngkwei hanyen kwei ei minu ndig Yerusalem.

⁸Yosia ninyeng tak kep ug ei ari bingwam gi nisimnaimuhwidip brimigtehiningai niabiati cok tut kwar nya leu TUHAN De Ig kin hanjop nsi dima hagom bipwoi kei tu lene cuk ibou ningai ba, ikinding TUHAN De Ig nikineisi nya hanyen. Ibou ningai dima inyeng rino Safan di nicig ninyeng Azalya kin Maaseya di nibou minu ndig Yerusalem kin Yoah di nicig ninyeng Yoahas. Yoah ne no di ninyeng jei di ya kui nibou ndig ri.

⁹Lene Lewi nya di igya ser TUHAN De Ig nimbou igyai mitiei di igyok keyam nya ba, ikes bak Hilkia di Imam Nibou Ndig. Mitiei dima kwei leu keret Efraim kin keret Manasye kin limwa nindigsi nya ei Ninyeng Tak Kepti Ei Nite Bei Mpia Nijjai kin timiei Yehuda nya kin timiei minu ndig Yerusalem nya.

¹⁰Niabiati bu ne Imam Nibou Ndig Hilkia ttei mitiei dima bikes bak mindor di igyok igyai kep TUHAN De Ig ibou ningai di ikinding kep pima. Ibou ningai dima yuug sut mitiei dima,

¹¹bikes bak tukan biei kin tukan di ingot ig nya cem lewo isuar mitiei mem gima ibipek tig kin biei di ibikinding TUHAN De Ig di nibou ndig di inok nibou mem timiei Yehuda nya isindui sut di kinei su pima.

¹²Yo di ikinding kep Ig ninggekti dima yahagom ingon sren kei. Lewi nya ibou bitai inyeng tak kep tukan dini tut ide midyai ba, inyeng rino Yahat kin Obaja di leu Merari ninsi de kin Zakharia kin Mesulam di leu Kehat ninsi de. Lewi nya ingon ki tut gi ikek musik kan ba,

¹³itug ndei midyai dino igyok igyai kep Ig dima nimbumbati di tungwatu nya ipian kep nya ba, inok mindor mem tukan di igyai midyai hi gom hi gom kin yo di ibindei mbut midyai ei kintrorti kin yo di igya ser dimbou cem.

¹⁴Mpe dino ibindei hei mitiei di ikwas dima yok leu mpia di igyok keyam eisi lene Hilkia ngat Srat TUHAN Niggai Serti Nya di jo niti bou niyai him. Srat dima ne Allah Niggai Serti Nya po yai bak Musa pima ri.

¹⁵Lene Hilkia pai bak Safan “Dingat Srat TUHAN Nicukti Nya bou diyai him ei TUHAN De Ig tu.” Pai nok leu api yai srat dima bak Safan.

¹⁶Safan krau srat dima buug sut bingat nibou ndig bipai bak “Mun nyeng di Na Di Andigpoi acuk nye tut nya ne niyai hagom biput tu.

¹⁷Nibiyai mitiei di igyok ei TUHAN De Ig ba, nikes bak tukan nya di igyai midyai kin yo di igyok igyai kep yok tut midyai di igyai dima cem tu.”

¹⁸Leu api Safan kum ei nihyetti bipai bak “Hilkia yai srat dini cem bida. Pai nok leu api noni kwop srat bokti dima bak nibou ndig.”

¹⁹Tirigi nibou ndig miap tut srat dima nibimbiti lene krau sinsun di juk ser ningkek dip birik. Lewo srat nibimbiti di miap dima bindei ba, ningon ngguk tut.

²⁰Noni cuk Hilkia kin Ahikam di Safan nipmot kin Abdon[15] di Mikha nipmot kin Safan di nok sekertaris minu Yehuda kin Asaya di hati tut nibou ndig pijum yahagom bipai biyok,

²¹“Juug ba, jihig ser TUHAN mem dani kin limwa nya di ingat rin ei minu Israel kin minu Yehuda tut mun di jo srat diniti. TUHAN gga nye drek dip idigup bat-idigai bat nya di ibit nicuk nyeti di jo srat diniti e, he bi e?”

²²Cuk yok nok apino Hilkia kin Ahikam kin Abdon kin Safan kin Asaya yuug ba, ihig ser Hulda di sop gom tut srat nicukti dima. Hulda ne sop nabi di bong ei hanjop nsi nijep gom ei minu ndig Yerusalem ri. Nijjep ninyeng Salum di Tikwa nipmot ba, nignyon ninyeng Harhas. Salum ne mindor di nyohou dimig sinsun nibikuk no bak TUHAN ei Nide Ig di imam nya ijuk kep ri. Tirigi Hulda miap tut ipaisi dima hagom tu

²³lene cuk yok bingkwei hanyen ndam nibou ndig bipai sut TUHAN nisok bak noti “TUHAN Allah di mben Israel ikuk yok bak pai,

²⁴‘Midikes hukum ei minu ndig Yerusalem bitut timiei minu ndig Yerusalem yahagom dip tug hon nisigionti nya di ipas kep ei srat dimati di ikwop bak Na Di Nibou Ndig pima tu.

²⁵Yoni iba inghim bak Dani leu ba, ibui ide mindhe bibikuk yok bak nung nya. Mun nyeng di ibon nya hagom bindei ba, digga yok. Digga timiei minu ndig Yerusalem nya lene doom kep diggati dima kan bi.

²⁶Noro tut Nibou Ndig Yosia ne Da di TUHAN Allah Israel disok dihyet dini ei je dip bak noni tirigi srat bokti dima tibim ei atingou nsi pima ba,

²⁷anso nanti tut leu api aboom nanti tut ei Doho bei. Ditin ei mem gima dihwen minu ndig Yerusalem bidikes hukum ei dip. Noro tirigi amiap tut dihyet dima rino apim ba, arik sinsun di ajuk ser angkek dip cem nok bindo tut angon di ngguk. Dimiap kep ade nadi tu ba,

²⁸midikes hukum ei minu ndig Yerusalem dip mem nijam di ayaijo yo dini bi. Midisindui sut bibou abong kei agwam kei kikau ug bipek ayaijo ningwig honti ug e.’ ” Lene yo di nibou ndig cuk yok ndam Hulda pima ingkwei hanyen bipai TUHAN Nihyet di sok tug hon Hulda pima bak.

²⁹Nibou Ndig Yosia nduk nibou timiei Yehuda nya kin nibou timiei minu ndig Yerusalem nya ba, yahagom idem yam.

³⁰Leu api ya tut yok ba, yahagom yuug ei TUHAN De Ig. Imam nya kin Lewi nya kin limwa nya kin yo di yuhui mbum nya kin yo di inyeng nya yahagom injei bit yok. Lene nibou ndig kiju biya ei mpia di ibet ei mem[16] noni bou yahagom igyai him lene kon nihyet di nindig bikwop kep srat gi preu di ingat ei TUHAN De Ig pima titut yam. Leu api nibou ndig bon gi preu bak TUHAN mem gima ba ningon titut kin ninnei titut bibit TUHAN nihyet kin TUHAN Nicukti Nya kin Niggai Serti Nya cem. Noni yai mun bipek kep mun di TUHAN kin TUHAN de limwa nya ipreu kep yam tut po jo ei srat pimati tu.

³²Lene cuk keret Benyamin kin nindigsi di ingat rin ei minu ndig Yerusalem yahagom ba, ipreu ei mem TUHAN bipia mibit gi preu dima nikos tutti nya. Apino yo di ibong ei minu ndig Yerusalem ibit nikos tutti nya di tug hon gi preu di Allah kin idigup bat-idigai bat nya ipreu sut biyam nipou su hagom.

³³Nibou Ndig Yosia ya kep kwar nya di biyai ningon him wei sutti di jo bidem minu Israel hagom bindung-ndiem. Leu api cuk nide limwa nya yahagom bikuk yok bak idigup bat-idigai bat nya ide TUHAN Allah. Apino limwa nya yahagom ingon gom tut TUHAN kikau mem nijam di Yosia niyaijo yo.