Read Hatam NIBOHON MBEN ISRAEL GI NICAN 4 Bible Online

NIBOHON MBEN ISRAEL GI NICAN 4 - Hatam bible

NIBOHON MBEN ISRAEL GI NICAN 4

¹ Nibou Ndig Salomo cuk yok ba, iba ngkimom-tembaga bibon nimbar hum dok ningat gom. Nimbar hum dok dima nijeisi dem meter muhwindatai. Lene ninyanti dem meter muhwindatai. Lene nanaisi dem meter bitai biniken.

²Lene iba ngkimom-tembaga bibon bokor nijut di nittou gom cem ba, nijutti dem meter can biniken lene ninyanti dem meter bitai biniken lene ninghausi dem meter simnaibrimigningai biniken.

³Lene iba sapi ningwes nipui can di bijop yam bimau nitta bei nisai. Ibindei ba, sapi ningwes dima rap bokor nitta bingkiem-kiau lewo iba mun di ibibon bokor dima bikingkrai kin yam binok gom tu.

⁴Leu api ikes bokor nijut dima bijo sapi ngkimom-tembaga ningut simnaibrimigcan inghim dip ba, ningut ningai ibirok kik nite bei mpia nijjai lene ningut ningai ibirok kik nite bei mpia nibiho lene ningut ningai ibirok kik nite bei mpia nicutti lene ningut ningai ibirok kik nite bei mpia nipriti.

⁵Bokor dima nindokti dem senti muhwindacan biniken. Nihui dip dem kep mok ninghas di kieng bei nisai noyam kin mitou bakung nitou di nugyem kieng. Bokor dima dem mem yuhug minyei liter sribu ningot muhwindagom eisi.

⁶ Nibou Ndig Salomo bindei ba, ibon bokor ndig ningat simnai ba, ikes ningat muhwi ei TUHAN De ig ei nite bei mpia nibiho lene ikes ningat muhwi bu ei nite bei mpia nijjai. Bokor ndig dima yok mem gima ibipiap kep mindhe di ikos kukiau bindig ei nimbar hum dok pima ei niti nok mun di ibikuk yok bak TUHAN. Lene ibet minyei di jo ei bokor nijut bibor dimati ei mem gima imam nya ibipiap yonti.

⁷ Lene iba mas bibon mini njeng nidihim simnai ba, bibit leu ningwes di ikos tutti tu lene ibibon meja ningat simnai cem. Lene ikes mini njeng nidihim simnai dima kin meja ningat simnai dima hagom ei ninsi ndig di jo ei TUHAN De Ig dima. Ikes mini njeng nidihim ningat muhwi bitut meja ningat muhwi ei nite anda prak. Lene ikes mini njeng nidihim ningat muhwi kin meja ningat muhwi ei nite anda com. Lene iba mas bibon mok ningat sratus gom cem.

⁹Lene Nibou Ndig Salomo cuk yok ba, ibon mpia di jo bas hak di iba ngug tig bikrop ttai ndig gom ei Ig dima ninsi mem imam nya lene ibon mpia di jo bas hak di iba ngug tig bikrop ttai ndig gom kin bu bei nisai. Lene iba ngkimom-tembaga bikrau dimbou pmem nimeng di bikkin mpia di jo bas hak di iba ngug tig bikrop ttai ndig cin dima.

¹⁰Lene ikes bokor nijut pima bijo ei TUHAN De Ig wer dideu nuhuisi ei nite bei mpia nipriti kin mpia nibiho ikieti.

¹¹Huram di nok nibou mem tukan di ingon ki tut midyai di ibon bou inda him dima bon yengkuong nya kin skop nya kin mok nya cem. Leu api bikes ninda tut gi bon[4] ndigban nyeng hagom di mem TUHAN De Ig dima bit leu Salomo yoni ipreu kep yam tut nipou pima. Ndigban di bon mem TUHAN De Ig dima rino,

¹²cou dihim di nindig krop ningat can kin mun di yahak ei cou dihim hacem nidip hu kwei di dem kep mok di nikrausi joti kin lante di yahak binghau ba, ibijuk cou dihim ndig cin pima dip ningat can,

¹³kin biei delima di iba ngkimom-tembaga bibon ningat sratus bitai inghau nipuig can jop yam ttai lante di yahak binghau cou dihim pima dip,

¹⁴kin kroba ningat simnai kin bokor ndig ningat simnai,

¹⁵kin bokor di nindig krop di iba ngkimom-tembaga bibon gom kin sapi di iba ngkimom-tembaga bibon ningut simnaibrimigcan di ikes bokor di jut pima ei inghim dip,

¹⁶kin yengkuong nya kin skop nya kin hot nggram nya. Huram ba ngkimom-tembaga bibon ndigban dini yok hagom, mem TUHAN De Ig lene dip ndigban dima yok hagom bidia kei bibit leu Nibou Ndig Salomo nicuk noti.

¹⁷Nibou Ndig cuk yok bipia ibon ndigban dima yok hagom ei pabrik ngkimom-tembaga jep oi gom ei minu ndig Sukot kin minu mien Zereda ikieti ei Mbang Briep Yordan.

¹⁸Ndigban dima yok mang bibor apino bit bon tungwa hi kan tut ngkimom-tembaga di ibibon dima hagom nibuhunti kan bi.

¹⁹Lene Nibou Ndig Salomo cuk yok ba, iba mas di pimbai kei bibon ndigban nindigsi nya bu mem TUHAN De Ig. Ndigban nindigsi di bon bu nya rino nimbar hum dok kin meja mem roti di idis ei TUHAN Noho bei,

²⁰kin mini njeng nidihim kin mini njeng nya ningat hagom di iba mas di mahan kei bibon mem gima itin binjeng ei Ninsi Di Kwes-Kwau nuhui him dem igbit nikos tutti tu,

²¹kin mimau di nok mitou nya kin mini njeng nika nya kin koi nya, Mun di mem ibicok hum ngum leu mini njeng nipu bibindei ba, pwoi kei,

²²kin mok mien di bon nikrausi nya kin den mem biei nggrai di ui-gwang kei kin den mem hum mbom nya kin dimbou nya di ibicoi ug ei TUHAN De Ig kin dimbou mem Ninsi Di Kwes-Kwau di iba mas bikingkrai nya hagom.