Read Hatam NIBOHON MBEN ISRAEL GI NICAN 5 Bible Online

NIBOHON MBEN ISRAEL GI NICAN 5 - Hatam bible

NIBOHON MBEN ISRAEL GI NICAN 5

¹ Tirigi Nibou Ndig Salomo bindei ba, ingot TUHAN De Ig biput tu lene noni bindei ba, inju mun di nicig Daud dimig ei mem TUHAN po noni bindei ba, tukan iba perak kin mas bibon bitut ndigban nindigsi nya pima hagom ei ig gudan gom ei Ig dimati.

² Gima ngwig leu lene Nibou Ndig Salomo nduk nibou mem keret nya kin nibou mem mben Israel insi de nya ba, yahagom idem yam ei minu ndig Yerusalem mem gima ikon TUHAN de Brua Gi Preu leu Sion dino Daud De Minu Ndig[5] ug ei TUHAN De Ig.

³Gima rino yahagom idem yam ei mem Njap Nindig Ig Jibei Mpam Meng.

⁴Tirigi nibou dima yok yahagom idem yam ei su lene Lewi nya ikon Brua Gi Preu dima ba,

⁵ittei ug ei TUHAN De Ig. Lene imam nya kin Lewi nya ittei TUHAN De Prak Meng bitut nimbumbati nya cem kwei ei TUHAN De Ig.

⁶Lene Nibou Ndig Salomo ya tut limwa mben Israel yahagom di idem yam ei Brua Gi Preu dima nibiho leu api ibui sapi kin domba bibikuk yok bak TUHAN ei sirima. Mun di ibui di ibikuk yok bak TUHAN dima ne bit bon igikwop nimangti kan bi.

⁷Gima leu lene imam nya kin Lewi nya ibindei coi Brua Gi Preu dima ug ei TUHAN De Ig bikes ei kerub cin pima ibehei ei Ninsi Di Kwes-Kwau.

⁸Kerub cin dima ikieng inyehei kep Brua dima bitut ug di ibittei nya cem.

⁹Ug di ibittei dima jei bibor apino niyenti tau ei Ninsi Di Kwes-Kwau nuhui him bijo brei, ei tungwatu nya di igya dideu Ninsi dima nuhui him igyai him noro yo di igya nisai ne igingat bi. (Ug dima hacem no jo nijoti ei ninsi dima kikau kwei bipek ammani kep.)

¹⁰ Ter leu tig nisra can po Musa bindei coi ei niti ei mpe di po ningat rin ei Nungug Sinai tirigi po mben Israel ijo leu minu Mesir ba, ingat rima kak puig sinon ndam minu Kanaan ba, TUHAN bon gi preu bit yoni pima ne mun nyeng hi kin bu jo ei Brua dimati bi.

¹¹ Imam yahagom di idem yam ei dima leu nimpung imam nya hagom rin ba, yahagom itin ei yonti mem midut dima tu. Lewi nya di ipai kep doia nya kin gi iba musik bipai kep doia nya inyeng rino Asaf kin Heman kin Yedutun bitut yo di intun insi de nya him yahagom ba, ijuk sinsun di iba minghas di nggriu-nggrop kei binap noyam. Lene Lewi nya ikiju bigya ei nimbar hum dok nite bei mpia nipriti bikrau yeng beng kin nggong mbrei ei inda him. Lene imam ibou sratus gom ningot can di ikrau pun mbrei di imiep nya igya bit yok ei sirima leu api yo di ipai doia di ibibit mun di hiter ikek kep pima ipai ba, ibibit pun mbrei kin yeng beng kin mun di ibikek kep doia nindigsi nya. Doia di ipai di ibikon TUHAN ninyeng dima nibimbiti pai, “TUHAN kei-kau! Gima rino ma jikon ninyenga. Ningon ngakei nyeti jo ninno bijo kikau.” Tirigi Imam nya sindi yehei kwei leu TUHAN De Ig lene nipigati di piga mpia kei di bindo tut TUHAN di Ningat rin ei sirima tau kros lene piga bidem Ig dima ninsi titut yam apino b(...)