Read Hatam NIBOHON MBEN ISRAEL GI NICAN 6 Bible Online

NIBOHON MBEN ISRAEL GI NICAN 6 - Hatam bible

NIBOHON MBEN ISRAEL GI NICAN 6

¹Lene Nibou Ndig Salomo ngat nadi bipai, “TUHAN e, Nani agwam coi bumbuhui nggop di dindi-kai bit leu ajoi sutti.

²Nogindini dingot Ig ndig di ngkiem bibor gom leu binhyepo abong niti bijo ninno bijo kikau.”

³Tirigi nibou ndig ngat nadi bikes leu lene kiek noho ndam limwa nipmem ngat di igya ei mpia dima leu api mut niyai kep yok leu binhyepo Allah yai gi kei biyok.

⁴ Bipai “Nipou yo lene Na Di TUHAN apreu kep dicig Daud ba, apai ‘Leu nimbie him tirigi dibuwak Ditde limwa nya di yehei leu minu Mesir kikau kwei bipek njap di ammani kep lene didimig minu ndig gom ei minu Israel nok gumihyep di suar yoni ingot ig eisi binok gumihyep di ibikuk yok biDa eisi bi. Lene didimig tungwagom leu mben Israel ikieti ei nok nibou ndig mem Ditde limwa mben Israel cem bi. Noro tini bu ne didimig minu ndig Yerusalem ei nok gumihyep mem gima ikuk yok biDa eisi. Lene didimig na di Daud ei mem gima anyeng tak kep Ditde limwa nya.’ Noni pai nok rino da di Salomo dinggei sut mben Israel ide TUHAN Allah di yai mun bipek kep nipreu eisi dima tu.”

⁷Lene Salomo binut nihyet bu bipai “Dicig Daud tin ei ningonti mem gima ngot ig di nok gumihyep mem gima mben Israel ibikuk yok bak ide TUHAN Allah eisi.

⁸TUHAN pai binoni ‘Angon kanti dima kei,

⁹noro nani rima angot ig dima bi sren lewo apmot rimingot Ditde ig dima.’

¹⁰Nogindini TUHAN bon mun bipek kep Nide nipreu eisi dima tu. Diya luei dicig nohoti bidinok nibou ndig mem mben Israel tu. Lene dingot ig mem gima mben Israel ikuk yok bak ide TUHAN Allah eisi cem biput tu.

¹¹Ditin ei ninsi gom ei TUHAN De Ig dima bidikon Brua Gi Preu eisi tu. Ba, tig gi preu di TUHAN preu ei mem limwa mben Israel jo niti.”

¹²Mpe dima lene Salomo cuk yok ba, iba ngkimom-tembaga bibon bilen bitas ei mpia di jo bas hak di iba ngug tig bikrop ttai ei TUHAN De Ig ninggimau yon. Bilen dima nijeisi kin ninyanti dem meter can biniken. Lene nanaisi dem meter gom biniken. Salomo kui biya bilen dima dip ei limwa di idem yam ei dima yahagom yoho bei lene ya biba noho birok kik nimbar hum dok bou yahagom igyai him. Leu api ba nibiau bicom mpia ei bilen dip dima bisu ninda hacem kui bikieng ninda ndam mpia-bbed him lene ngat nadi bipai,

¹⁴“TUHAN Allah mben Israel e, hi di noyam kin Nani ei gwamti kin dihyeisi dini bi. Abon mun bipek kep Ade nipreu eisi lene ando tut angon ngakei Ade limwa di iba ingon di gom bicom Nani ba, ibit ahyet cem.

¹⁵Abon mun bipek kep Ade nipreu ei mem dicig Daudti tu. Mun di apreu ei mem dicig dima hagom ne abindei bipek kep mem nye ei njap di ammani tu.

¹⁶ Apreu ei mem dicig Daud tu bipia gino nide nintun him yamti di bram yam nya ibit Ade nicuk yokti mungkun kei noyam kin Daud lene yo di intun noni him mikui bigwam nok nibou ndig bigya luei nohoti sindam ba, inyeng mitak kep mben Israel bijo ninno bijo kikau. TUHAN Allah mben Israel e, nogindini handei kon ba, ayai igbit Ade nipreu ei mem dicig Daud di nok Ade awak pima hagom hak ug.

¹⁸ Noro Allah e, dem mem gima abong ei tungwatu ikieti ei dihyeisi dini nijit e? Mpia-bbed him titut yam bon nibresti di dem mem Nani bi. Gi nok lene Ade Ig di dingot dini midem mem Nani bi sren.

¹⁹Ditde TUHAN Allah e, Ade awak ridani. Handei kon ba, angig atingou mem ditde nadi dini ba, abuhup dihyet tut mun di dahara na tut nya.

²⁰ Handei kon ba, ayok ayai kep ig di adimig ei nok gumihyep di nikuk nye bak Nani eisi dini bikwop mmun-njap. Mpe dino dani kin ditde limwa nya nikwei coi ig dini ba, ningat nadi bak Nani lene handei kon ba, Na di agwam gwamti angig atingou mem nyende nadi di ningat bak Nani. Lene ma akos ser ditde sisar kin Ade limwa mben Israel ide sisar di nibon nya.

²²Tirigino tungwatu nya ipai kep hiter lene ibuwak noni kwei biya kui Ade nimbar ei Ade Ig leu binhyepo no dima pai tug hon neheng bipia ningon ngun,

²³lene TUHAN ei gwamti e, handei kon ba, angig atingou mem nyeni nihyet leu api akos tut munhyet dini nok igbit. Ma akes hukum ei gi hi di ningon mui dip dem igbit nide mun di yai tunggwei lene ma asindui sut gi hi di ningon ngun bimbut hak.

²⁴Tirigino Ade limwa mben Israel icut bak ide siceu nya drek dip gi ibon sisar tut Nani lo, ittin ser ide sisar ba, ikuk yok biNa di TUHAN bingkwei hanyen ei Ade Ig dini cem ba, yahara mem Na leu binhyepo akos ser ide sisar dima lene,

²⁵handei kon ba, angig atingou ei gwamti mem Ade limwa nya ighyet. Akos ser ide sisar cem abuwak yok hanyen kwei ei ide minu dini di ayai biyok kin idigup bat-idigai bat nya tu.

²⁶Na Di TUHAN e, tirigino abindei ba, mpia but bi kikau drek dip sisar di Ade limwa nya ibon tut Na lo, ittin ser ide sisar dima ba, iba yoho rok Ade Ig dini hanyen lene iba ibou coi mem Na bingat nadi,

²⁷lene ma angig atingou ei gwamti mem ighyet. Akos ser Ade awak di mben Israel ide sisar di ibon nya. Angginau yok tut puig di igbit. Leu api TUHAN e, abindei ba, mpia but hanyen bidem minu di ayai bak Ade limwa nya mem gima ijem bou yok nok ide bijo ninno bijo kikau.

²⁸Tirigino ninggum nindig bibor kin nsuwer ajar hwen yok ba, hou di dut hwen njita kioi nya bimui ba, briei ngwoi kin hai ceng cut igkep minu dini lene siceu nya igyon ttai Ade limwa nya ne ninggwen di buhun cut igkep yok cem,

²⁹apino handei kon ba, angig atingou mem ighyet. Gino Ade limwa mben Israel bihi ikiju bigya ba, isu inda kui ndam Ade Ig dini leu api iba ingon di ngguk bingat nadi bak Nani,

³⁰lene ma angig atingou ei gwamti di agwam kepti mem ide nadi ba, akos ser mun di ibon tunggwei sut Na. Lewo Nangkom he rino akan tut tungwatu nya ingonti a. Gima rino ma abibon tungwagom-gom bit leu nok niyai munti nya.

³¹Leu binhyepo Ade limwa nya ittin tut Nani ba, ibit ahyet kikau mem nijam di ibong kep minu di akes bak nyeni nidigup bat-nidigai bat nya dini.

³²Tirigino ngkiai gom di bong minu ting bibor miap tut anyeng di jei kin mindur nya di abon mem Ade limwa nya leu api kwei kuk no biNa ei Ade Ig dini,

³³lene ma angig atingou ei atimieisi ei gwamti mem nihyet ba, abuhup bit leu ningon kanti. Leu binhyepo tungwatu dihyeisi dini hagom ingon mijo kep Nani bibit ahyet noyam kin nye di Ade limwa di mben Israel nibit ahyet. Tug hon nisinati dima ne mben ngkiai migyok ngon kep bipia Ade Ig di dingot dini ne gumihyep gom ngat mem tungwatu nya ikuk yok biNa eisi ri.

³⁴Tirigino acuk Ade limwa nya biyuug kon pran bit siceu nya ei mpia di tou rino igya ba, ikiek yoho ndam Ade minu ndig di adimig ei dini kin Ade Ig di dingot mem Nani leu api ingat nadi,

³⁵lene ma angig atingou ei gwamti mem ide nadi lene abindei ba, ide siceu nya micut bak yoni.

³⁶Tirigino Ade limwa nya ibon sisar tut Na (ningat ne hi di bon sisar bi ningat rin bi) lene angon sibui sut yok ba, icut bak ide siceu nya di ipos yok ug ei ingkiaisi ei minu ting bibor kin dideu cem,

³⁷lene TUHAN e, handei kon ba, angig atingou mem Ade limwa nya ighyet tirigi ingat nadi. Gino ittin ser ide sisar bingat nadi bak Nani lene ipai jit bipia ibon sisar bimbuk bibor tu lene ma angig atingou mem ighyet.

³⁸Gino iba ingon titut yam bittin ser ide sisar ei minu ting dima leu api ikiek yok ba, iba yoho rok minu di ayai bak nyeni nidigup bat-nidigai bat nya di adimig ei su dini kin Ade Ig di dingot mem Nani,

³⁹lene ma angig atingou ei atimieisi ei gwamti mem ighyet ba, angondut yok. Ma abuhup ide nadi di ingat nya ba, akos ser Ade limwa nya ide sisar di ibon nya hagom.

⁴⁰Ditde Allah e, nogindini ma ayok ayai kep nye ba, amiap kep nyende nadi di ningat bak Nani ei gumihyep dini.

⁴¹ TUHAN Allah e, nogindini ma akiju ba, aba Brua Gi Preu di bindo tut Ade nisindemti bicoi ug ei Ade Ig dini ba, abong eisi bijo ninno bijo kikau. Ma anjei mun di kei bak imam nya drek dip midyai di igyai nya. Handei kon ba, Ade limwa nya yahagom ingon nggei-hi-nggei lewo anjei mun di kei biyok.

⁴²TUHAN Allah e, ma arok nibou ndig di adimig ei su dini ei atta au. Ayok ngon kep angon di ngakei Daud di nok Ade awak pima.”