Read Hatam NIBOHON MBEN ISRAEL GI NICAN 8 Bible Online

NIBOHON MBEN ISRAEL GI NICAN 8 - Hatam bible

NIBOHON MBEN ISRAEL GI NICAN 8

¹Salomo ngot TUHAN De Ig kin nibou ndig de ig ei ninsi nijam ari bingwam nyatungwagom.

²Minu ndig ngot di Nibou Ndig Hiram kes binoni nya lene ninda jo kep biwin hagom hanyen. Leu api cuk mben Israel ba, ibong ser minu ndig ngot dima.

³Noni hwen yo di ibong ser hanjop Hamat kin Zoba leu lene yai minu cin dima biyati.

⁴Ba, bindei sindem minu ndig Tadmor di jo ei iggum ndigsi leu api win minu ndig hi nok nibousi mem ig gudan nya di inju mun di misuar ei nidipti nya di jo Hamat hagom hanyen eisi.

⁵Noni win minu ndig Bet-Horon-Gi-Nai kin Bet-Horon-Gi-Bijehei hanyen binok minu ndig mem tentara nibousi di igya coi ba, bon ngug tig di ngkiem bibor bitut dimbou pmem di bon biei nggam mbou di nindig bibor di ibahau yam ser ba,

⁶bitut minu ndig Baalat kin minu ndig hi nok nibousi mem ig gudan nya di inju mun di misuar ei nidipti bu nya hagom kin minu ndig hi nok nibousi mem kroba pran nya kin kuda nya. Noni bindei ba, mun nyeng hagom di tin ei ningon kanti tut di ngot ei minu ndig Yerusalem kin Libanon kin minu di win bidem ninyeng tak kepti nya hagom mbut bipek kep.

⁷Salomo ba mben Kanaan ide nintun him yamti di bram yam nya di mben Israel igiyai nimai biyok ei mpe di po icoi di igyai minu dima di igyati ei nimbie him pima bi nya bigyai midyai nibidip hukti nya. Yo dima rino mben Het kin Amori kin Feris kin Hewi kin Yebus. Lene yo di intun yok him nya inok awak kikau kwei bipek njap di ammani kep.

⁹Noni ba limwa mben Israel biyai midyai nibidip hukti bi. Noro kon yok bigyai midyai nok tentara nitu nya kin nibou tentara nya kin kiten kroba pran nya kin tentara di iba kuda di ibri nya bikon pran kan nya yahagom.

¹⁰Noni ta mindor nya ibou sratus can ningot muhwi ba, inok nibou mem yo di igyai midyai nibidip hukti mem niwin kepti nya pima hagom.

¹¹Salomo cuk nitnem gi hi di nibou ndig mben Mesir nipmisop ba, pri leu Daud De Minu Ndig ug ei ig di ngot pijum ei mem noni. Lewo Salomo kan “Sitnem ma bong ser Daud di nok nibou ndig mem mben Israel de ig nibou ndig au. Lewo mpia di nipou yo ikon Brua Gi Preu bikes eisi tu nya hagom nok mpia di kwes-kwau.”

¹²Salomo bui mindhe-ndhe nikwas bindig titut ei nimbar hum dokti di ngot ei TUHAN De Ig nuhui ba, bikuk no bak TUHAN.

¹³ Mindhe di noni kwas bindig kep hum ei nimbar hum dokti mem gima mben Israel ibikuk yok bak TUHAN dima bibit leu Nikos Tutti di tug hon Musa mem bikwop njap nindig nya. Nok Njap Nigwam Kep Ninghuisi kin Njap Ndig Nibon Midut Bed Jep kin midut ningat ningai di ibon bibikwop ari bingwam. Njap dima ne Njap Ndig Nibon Midut Roti Dwoi Bi kin Njap Ndig Nibon Midut Nike Gandum Kui Ig kin Njap Ndig Nibon Midut Ig Jibei Mpam Meng ri.

¹⁴Salomo nyohou dimig midyai di imam nya kin Lewi nya igyai kep bikwop njap ngwa hagom ba, suar ipai kep doia nya ba, ibikon TUHAN ninyeng cem impu imam nya tut gima ibindei mbut midut nikuk no bak Allah eisi nya. Salomo dimig midyai dini ba, bibit leu nicig Daud nicukti nya. Noni kwas yo di igya ser TUHAN De Ig ei nimpung poi mem gima igyok igyai kep dimbou pmem gom-gom dem igbit Allah de awak di Daud nicukti.

¹⁵Salomo nyohou bit Daud nicukti tut ig gudan nya kin midyai nindigsi nya cem hagom di imam nya kin Lewi nya inyeng tak kep bidem igbit hak.

¹⁶Leu api midyai nindig di Salomo tin ei mem gi mingot nya hagom put. Midyai nyeng di igyai hagom leu nikinyon ei niprion cou pmemti kikau ug bipek TUHAN De Ig niputti ne inda jo kep bigyai nok gi kei bibor.

¹⁷Gima leu api Salomo ug ei Ezion-Geber kin Elot ba, minu ndig cin dini ya muk pimat ei Muk Nuhuisi Akaba ei minu Edom.

¹⁸Lene Nibou Ndig Hiram pinak nide kibar minyei di nide kiten kibar nsi nya ikrau bitut timiei kibar dip nya kwei bak Salomo. Kibar dima mbut tut Hiram de timiei kibar dip nya kin Salomo de timiei kibar dip nya ug ei minu Ofir leu api iba kibar dima yok biyai mas kilo sribu simnaimuhwidip leu minu dima kwei bak Salomo.