Read Hatam EZRA 1 Bible Online

EZRA 1 - Hatam bible

EZRA 1

¹ Mpe dino Nibou Ndig Kores sindi ninyeng tak kep mben Persia mem ari bingwam gom lene TUHAN bindei ba, nihyet po Nabi Yeremia tri tut gi nipou pima hagom dem igbit nipaisi. TUHAN pingok ei Kores ningonti leu binhyepo tri tut ningon kanti tug hon srat gom di nide limwa nya ikwop kep nyen bidem minu di Kores ninyeng tak kepti nya hagom. Noni pai biyok,

² “Da di Nibou Ndig Kores dinyeng tak kep mben Persia ba, ditri tut dicuk jeti. TUHAN di nok Allah di ninyeng tak kep gwamti bindei ba, dinyeng tak kep tungwatu bidem dihyeisi dini hagom. Noni cuk da leu binhyepo diwin Ig nibousi gom mem Noni ei minu ndig Yerusalem ei hanjop Yehuda.

³Handei kon ba, Allah ningat rin bit je di jinok Nide limwa nya. Suar jingkwei hanyen ug ei minu ndig Yerusalem leu binhyepo jiwin TUHAN De Ig hanyen. Noni ne mben Israel ide Allah di ikuk yok bak ei minu ndig Yerusalem ri.

⁴Gino Nide limwa nya di ibong ei ingkiaisi dini isuar mun di bahati tut yok kak imbutti lene suar ide ninttig-tta timiei Persia nya ikwas perak kin mas kin njita kin mindhe-ndhe mem ibikon ndigban eisi tut yok bitut mun di ibikuk yok bak TUHAN ei Nide Ig ei minu ndig Yerusalem dima cem.”

⁵Lene nibou di imbier kim nya di intun keret Yehuda kin Benyamin him kin imam nya kin keret Lewi nya kin bibikwop nindigsi di Allah pingok ingonti tu nya itin ei mem ingkwei hanyen ug ei minu ndig Yerusalem leu binhyepo iwin TUHAN De Ig hanyen.

⁶Ide ninttig-tta timiei pima yok yahati tut yok ba, ikwas ndigban perak kin mas kin njita kin mindhe-ndhe mem ibikon ndigban eisi kin ndigban di nibok kui nindigsi nya tut yok bitut mun di ibikuk yok bak TUHAN ei Nide Ig cem.

⁷Lene Nibou Ndig Kores tug bokor nya kin mok nya po Nibou Ndig Nebukadnezar pos leu TUHAN De Ig ei minu ndig Yerusalem bikon ei nide kwar nibousi pima hagom hanyen biyok.

⁸Noni kes midyai dini ei Mitredat nindati. No dini ne nibou kintror mem mitiei minu dima di ya kui nibou ndig ri. Noni kwop igbit mun di nibou ndig mitug hanyen biyok nimangti bikes hagom ei Sesbazar di nibou Yehuda gom nindati.

⁹Ndigban di iba mas bibon mem nibon midut nya nimangti ningot ningai. Ba, bokor di iba perak bibon mem nibon midut nya nimangti sribu gom. Lene bokor nindigsi nya nimangti nyatungwagom ba, muhwindatai.

¹⁰Mok di iba mas bibon nimangti ningot ningai. Mok di iba perak bibon nimangti sratus bitai ba, simnai. Mun di iba mas kin perak bibon nindigsi nya nimangti sribu gom.

¹¹Mok di iba mas kin perak bibon kin nimbumbati nindigsi nya hagom nimangti sribu muhwi ba, sratus bitai bitut ndigban nindigsi nya di Sesbazar kin nisut bat ipwoi bijo leu ingkiaisi ei minu Babel bingkwei hanyen tut ug ei minu ndig Yerusalem.