Read Hatam EZRA 3 Bible Online

EZRA 3 - Hatam bible

EZRA 3

¹Ug ei bed nimuhwindacan lene mben Israel yahagom ingot ide ig bibong ser itimieisi hanyen tu. Lene yahagom induk yam kwei ei minu ndig Yerusalem.

² Imam Yesua di Yozadak nipmot kin nisut bat imam nindigsi nya kin Zerubabel di Sealtiel nipmot bitut nide bat nya cem yahagom ikinding TUHAN di mben Israel ide Allah de nimbar hum dok hanyen leu binhyepo ibibon midut nya eisi bit leu nok Allah de awak di Musa pas ei nide Srat Nicukti.

³ Mbro nok gino ittin tut ngkiai nya di ibong ser itimieisi dima lo, ikinding nimbar hum dok dima ei nigkumti hanyen leu api ikinyon ei nibon midut nindig mindhe-ndhe nya kep humti mem njap bigyoti cem mem mmunti cem bit leu nok igyai kepti di nipou nya.

⁴ Lene ibon midut Njap Ndig Ig Jibei Mpam Meng kin nibon midut bikwop njap ngwa hagom cem bit leu nok nicukti nya di jo tu nicuk yoti,

⁵bitut nibon midut nindig mindhe titut kep humti kin nibon midut nindig mindhe-ndhe kep Njap Ndig Bed Jep kin nibon midut kep njap ndig nikuk no bak TUHANti nindigsi nya ba, hagom mbut sindam. Lene iba mun di ikwas tut TUHAN mikuisi cem ibikuk yok biNoni.

⁶Mbro nok gino ikinyon ei niwin TUHAN De Igti hanyen bigyo lo, ikinyon ei nibon midut nindig mindhe-ndhe nya kep humti bak TUHAN ei bed nimuhwindacan ba, njap gi nigom.

⁷Mben Israel iba ide mitiei bigo tukan tig kin tukan biei imuhup ba, imbus njita kin ba anggur ningei kin mini zaitun keyam bipinak hagom bak mben Tirus kin Sidon biluei buom Libanon nuut di tukan nya iwim birim ug ei muk pimat leu binhyepo itig minyei tut ug ei minu ndig Yafo. Kores di nibou ndig Persia sindui sut gima igyai kep ide midyai dini hagom.

⁸Ikinyon ei niwin TUHAN De Igti hanyen ei bed gi nican ba, ari bingwam gi nican niabiati ingkwei hanyen kwei ei minu ndig Yerusalem tu. Yo di igyai kep midyai dima inyeng Zerubabel kin Yesua kin isut bat mben Israel kin imam nya kin keret Lewi nya kin yo po ibong ingkiaisi pima yok yahagom. Keret Lewi nya di ide njap ug ei ari bingwam nyatungwagom nima kui inyeng tak kep yo di iwin TUHAN De Ig ba, ipingok ingonti tut.

⁹Gima rino Yesua di ntun keret Lewi him kin nipmot bat nya kin nide bat nya bitut Kadmiel di nimbier kim Hodawya kin nipmot bat nya yahagom igyok igyai kep midyai niwin TUHAN De Igti ba, keret Lewi ibou poi di imbier kim Henadad cem impu yok.

¹⁰ Tirigi tukan nya sindi ikinyon ei niwin TUHAN De Ig nikiouti rino imam nya ijuk ide sinsun nibon midut ba, ikrau ide pun mbrei lene yahagom idimig igyati. Leu api keret Lewi ibou poi di imbier kim Asaf cem idimig igyati bikrau yeng benga. Yahagom inggei sut TUHAN bit leu nok ningginausi nya di itri tut biyam ei nijam Nibou Ndig Daud.

¹¹ Iba doia binggei sut TUHAN bipai, “TUHAN kei-kau ba, ningon ngakei mben Israelti bijo ninno bijo kikau.” Tungwatu nya yahagom imbos-hi-mbos sindem bibor binggei sut TUHAN lewo tukan nya ikinyon ei midyai niwin TUHAN De Ig nikiouti hanyen tu.

¹²Mpe dima lene imam nya kin keret Lewi nya kin nibou mbier nya yahagom di iwer andig-ndau su lo, ingat TUHAN De Ig gi nitimiei bou igyai him tu isrig yo dima ikieti. Tirigi itou kep tukan nya di iwin TUHAN De Ig nikiou dini bu lene ipim ba, igyai nggwei kibor drek dip. Noro nindigsi di induk yam kwei yahagom imbos-hi-mbos lewo ingon llei bibor.

¹³Lene yo di ipim kin yo di imbos-hi-mbos yahagom ighyet kui yamti bibindei ba, limwa nya ingon kiowi tut nibimbiti lewo ighyet dima tibim kikau ug ei minu ting.