Read Hatam EZRA 7 Bible Online

EZRA 7 - Hatam bible

EZRA 7

¹Ari bingwam mang bibor ser ba, tirigi Kaisar Artahsasta ninyeng tak kep mben Persia ne Ezra no rinaha. No dini kwop kep nidigup bat-nidigai bat nya inyeng kan kikau ug bipek Harun po Imam Nibou Ndig pima. Ezra nicig ne Azarya rin ba, Azarya ntun Hilkia him ba, Hilkia ntun Salum him ba, Salum ntun Zadok him ba, Zadok ntun Ahitub him ba, Ahitub ntun Amarya him ba, Amarya ntun Azarya him ba, Azarya ntun Merayot him ba, Merayot ntun Zerahya him ba, Zerahya ntun Uzi him ba, Uzi ntun Buki him ba, Buki ntun Abisua him ba, Abisua ntun Pinehas him ba, Pinehas ntun Eleazar him ba, Eleazar ntun Imam Nibou Ndig Harun him.

⁶Mpe dima lene Ezra jo leu minu Babel bimbut ug ei minu ndig Yerusalem. Noni coi pikor wer ninno tu apino ningon ki ba, kan bidem TUHAN di mben Israel ide Allah nicukti nya di tug hon Musa cem. Ezra kuk no bak TUHAN apino Allah njei mun di kei bak noni bisindem tut noni nindig bibor. Gima rino nibou ndig Persia kwas mun di Ezra suar nya tut noni bit leu Ezra ningon kanti.

⁷Tirigi Kaisar Artahsasta ninyeng tak kep mben Persia mem ari bingwam muhwindacan tu lene Ezra jo leu minu Babel bimbut ug ei minu ndig Yerusalem bit mben Israel nimpung gom. Yo dini ne imam kin Lewi nya kin yo di ipai doia ei TUHAN De Ig igkei nya kin yo di igya ser dimbou pmem ei TUHAN De Ig kin tukan nya yahagom ri.

⁸Ikwei krau Yerusalem mem bed gi nimuhwi tirigi nibou ndig Persia ninyeng tak kep mem ari bingwam muhwindacan tu.

⁹Imbut ei njap gi nigom mem bed gi nigom lene ikwei krau ei njap gi nigom mem bed gi nimuhwi lewo Allah sindem tut yok.

¹⁰Ezra dimig nide njap ei mem gima kwop-kwop nyen TUHAN de nicukti nya bibindei mbut nicukti dima cem ngginau yok tut cem leu nipou kwei bipek ammani kep tu.

¹¹Mpe dima lene Imam Ezra di ningon ki tut Nicukti nya di TUHAN yai bak mben Israel dima pwoi srat nisindem gom di Kaisar Artahsasta yai binoni ba, srat dima nibimbiti pai,

¹²“Srat nisindem dini leu da di Kaisar Artahsasta ba, dikes srat dini ei Imam Ezra nindati lewo ningon ki tut Nicukti nya di kwei leu Allah di ninyeng jei ei gwamti.

¹³Ditri tut ditde nicukti nya bipia suar nibou nya bidem minu di dinyeng tak kep nya isindui sut mben Israel di ijoi sut ingkwei hanyen nya bitut imam kin Lewi nya ba, iba yok bikum na di Andigpoi Ezra tirigi angkwei hanyen ug ei minu ndig Yerusalem.

¹⁴Da di nibou ndig bitut yo di ipingok kep dingonti ibou muhwindacan nahagom nicuk na di Andigpoi ba, suar aug hanyen ei minu ndig Yerusalem kin hanjop Yehuda leu binhyepo ayok ayai kep minu dima ba, anggok tut notou timiei minu dima ibit Allah de Nicukti di Noni ba ningon com na di Andigpoi tut cem.

¹⁵Suar apwoi mas kin perak di dani kin yo di ipingok kep dingonti pima niyai mikuisi bak mben Israel ide Allah di ningat rin bit yok ei minu ndig Yerusalem.

¹⁶Apwoi perak kin mas di timiei minu Babel nya ikwas tut na di Andigpoi kin mun di mben Israel kin ide imam nya ikwas tut na cem hagom ba, aug sut ug ei minu ndig Yerusalem mem TUHAN De Ig di nok ig di ibikuk yok bak ide Allah eisi.

¹⁷Anyohou ba mitiei dima bipek sapi nikre nya kin domba nikre nya kin domba mien nya kin gandum kin ba anggur ngei leu binhyepo abibon midut ei nimbar hum dokti ei TUHAN De Ig ei minu ndig Yerusalem.

¹⁸Gino perak kin mas niken jo lene ma abipek ndiyok bit leu na di Andigpoi kin asut bat nya jingon kanti cem ade Allah ningon kanti cem.

¹⁹Ma ayai mun di imam nya ikrau kep tirigi ibon midut ei TUHAN De Ig po nitug hanyen bina di Andigpoi pima hagom bak Allah ei minu ndig Yerusalem.

²⁰Gino asuar mitiei hi kin bu mem gima iwin TUHAN De Ig hanyen bu lene ma ahara da tut leu api midibindei hei mitiei dima leu mitiei nibousi ei ditde kintrorti.

²¹Ditri tut nicukti dini bak nibou kintror mitiei nibousi bidem hanjop Efrat-Ei-Mpia-Nikimbasti hagom leu binhyepo ibipbur ba, ikwas mitiei tut Imam Ezra di ningon ki tut Allah di ninyeng jei ei gwamti Nicukti nya dima bit leu nok nahara yok tutti.

²²Ma ikwas perak nimangti tut noni bidem kilo sribu ningai sratus bitai kin gandum kilo sribu simnai kin ba anggur ngei nimangti liter sribu can kin mini zaitun nimangti liter sribu can cem lo, njiriek nimangti dima au. Ne ma ikwas nsim nimangti tut noni bit leu nisuarti.

²³Suar anyohou tin ei mun di Allah ei gwamti suar mem Nide Igya. Tug hon nisinati dima ne abindei ba, Allah ningon sibui sut da kin yo di intun dani him bigya luei dohoti ei nidipti bu bi sren.

²⁴Ma jiya tindei belasten bijiyem imam nya kin Lewi nya kin yo di ipai doia igkei nya kin yo di igya ser dimbou pmem nya kin tukan nya yahagom di igyai midyai ei TUHAN De Ig dima imuhup au.

²⁵Na di Andigpoi Ezra e, suar aba ningon di ki di Allah yai bina bita nibou hanjop nya kin nikei nya leu binhyepo inyeng tak kep ide limwa nya di ibong ei hanjop Efrat-Ei-Mpia-Nikimbasti di igyai munti nya bit leu nok ade Allah nicuk yokti hagom. Ne gino bihi ingon mbum tut nicukti dima lene suar na di Andigpoi angginau yok tut.

²⁶Bikwop tungwa tou rino bit ade Allah niggai serti kin nibou ndig Persia niggai serti bi lene suar jikes hukum ei no dima dip kros. Suar bihi tug ndei hukum nimai lene bihi tug ndei hukum nicom ug ei ningkiaisi ba, bihi tug ndei hukum nipos mun di nyeng tut nya bingwig leu no ba, bihi tug ndei hukum nisima ei ig bui nsi lene nok.”

²⁷Lene Ezra pai “Jikwei ba, inggei sut TUHAN di nok idigup bat-idigai bat nya ide Allah! Lewo Noni bindei ba, nibou ndig dima yok ngon kep TUHAN De Ig ei minu ndig Yerusalem binyohou nok gi kei.

²⁸Allah mpu da bibindei ba, nibou ndig dima kin yo di ipingok kep ningonti kin nibou di isindem di igya kui noni yahagom ijoi sut da. Ditde TUHAN Allah win kep dingonti bibindei ba, dibidip huk nibou mbier mben Israel imang bibor ingkwei hanyen kwei ei minu ndig Yerusalem bit da tu.”