Read Hatam EZRA 8 Bible Online

EZRA 8 - Hatam bible

EZRA 8

¹Mpe di Kaisar Artahsasta kui bigwam nok nibou ndig ba, ninyeng tak kep limwa nya lene nibou mem insi de nya di inok awak ei minu Babel ingkwei hanyen kwei ei minu ndig Yerusalem bit da di Ezra. Yo dima ne,

²Gersom di leu Pinehas ninsi de kin Daniel leu Itamar ninsi de kin Hatus di Sekhanya nipmot leu Daud ninsi de kin Zakharia leu Paros ninsi de bitut pinai nya ibou sratus gom ningot muhwi leu nonti ninsi de nya (nipas kep tut pung di intun him gom no jo yo) kin Elyoenai di Zerahya nipmot leu Pahat-Moab ninsi de njei sut pinai nya ibou sratus can kin Sekhanya di Yahaziel nipmot leu Zatu ninsi de njei sut pinai nya ibou sratus ningai kin Ebed di Yonatan nipmot leu Adin ninsi de njei sut pinai nya ibou ningot muhwindacan kin Zebaja di Mikhael nipmot leu Sefaca njei sut pinai nya ibou ningot muhwindaningai kin Obaja di Yehiel nipmot leu Yoab ninsi de njei sut pinai nya ibou sratus can simnaimuhwidip brimigtehiningai kin Selomit di Yosifya nipmot leu Bani ninsi de njei sut pinai nya ibou sratus gom ningot muhwindagom kin Zakharia di Bebai nipmot leu Bebai ninsi de njei sut pinai nya ibou ningot can ba, muhwindaningai, kin Yohanan di Hakatan nipmot leu Azgad ninsi de njei sut pinai nya ibou sratus gom simnai kin(...)

¹⁵Diba nimpung dima bicom yam ei minyei di biam ug ei minu ndig Ahawa nipimat. Leu api nohok prak meng ba, nibong njap ningai ei mpia dima. Tirigi diyok diyai kep yok lene dingat lo, imam nya hi ingat rima ei ikieti noro dingat hi di ntun Lewi him bi sren.

¹⁶Leu api dinduk nibou nya ibou muhwindatai leu yo dima ikieti kwei. Nibou dima yok inyeng rino Eliezer kin Ariel kin Semaya kin Elnatan kin Yarib kin Elnatan kin Natan kin Zakharia kin Mesulam kin guru ibou can di inyeng rino Yoyarib kin Elnatan.

¹⁷Dicuk yo dini ba, yuug ngat Ido di nok nibou mem limwa nya ei Kasifya ba, dipai sut daharati dima bak noni kin nisut bat timiei di igyai kep midyai ei TUHAN De Ig nya leu binhyepo ipinak tungwatu nya hi kwei binye mem gima igyai midyai ei TUHAN De Ig diniti bu.

¹⁸TUHAN singat tut nye bibindei ba, ipinak Serebya leu Mahli ninsi de nya kwei. Serebya ntun keret Lewi him ba, ningon ki bibor. Kwei dima lene kwei sut nimunggwom bat nya kin nide adig-ajoi nya di imangti ibou simnaimuhwidip brimigtehiningai.

¹⁹Lene ipinak Hasabya kin Yesaya leu Merari ninsi de nya kin ibou nyatungwagom kwei binye,

²⁰bitut yo di igyai midyai mem TUHAN igkei nya di inyeng tibim kin daptar cem ibou sratus can ningot can. Nipou yo lene Nibou Ndig Daud kin nibou di igya kui noni ei ninyeng tak kepti mem nijam dima idimig yo dini idigup bat-idigai bat nya mem gima yahati tut Lewi nya kikau.

²¹Mpe dima lene ditri tut bipia suar yo di idem yam ei minyei pimat dima yahagom igyem njita bi mem nituti poi ba, yoom yonti ei Allah Noho bei bingat nadi leu binhyepo Allah bie tut nye cem nyohou nyeni kin nimunggwom bat nya kin ndigban nyende nya hagom cem kak nimbutti dima.

²²Dikan bipia bibou dahara nibou ndig bikes nide tentara di iba kuda di ibri nya bikon pran kan nya bihi ba, igya ser nye leu siceu nya kak puig sinon dima noro dimmai sut. Lewo dipai binoni nipou su bipia bikwop tungwa tou rino ba ningon com nyende Allah lene Noni minjei mun di kei bak no dima. Noro Allah ningon mpo tut bikwop tungwa tou rino ba ningon di gom bikuk no bak Noni bi leu api mikes hukum ei no dima dip.

²³Gima rino niyem njita bi mem nituti poi ba, nibingat nadi bak Allah ba, nahara leu binhyepo Noni minyohou nyeni apino Noni buhup nadi di ningat dima.

²⁴Didimig ibou simnaibrimigcan leu imam di inyeng jei nya ikieti. Ba, yoni inyeng rino Serebya kin Hasabya kin ibou simnai bu.

²⁵Leu api dibakilo perak kin mas kin nimbumbati nindigsi nya di nibou ndig nonti kin yo di igya kui noni kin nibou di inyeng jei nya kin limwa Israel yahagom ikwas tut imam nya pima ba, dikes hagom ei yo dima indati ba,

²⁶perak nibuhunti kilo ningot can ba, can kin nimbumbati di iba perak bibon sratus gom ba, nibuhunti kilo ningot muhwindacan kin mas nibuhunti kilo sribu ningai sratus bitai kin bokor di iba mas bibon cem ningot can ba, nibuhunti kilo muhwindaningai biniken kin bokor di iba ngkimom-tembaga bibon di kei-bibor-kei di nikeisi noyam kin bokor di iba mas bibon cem ningat can.

²⁸Lene dipai bak imam dima yok “Tut jeni ne nyeni nidimig jeni pijum ei mem TUHAN Allah po idigup bat-idigai bat nya pima ikuk yok bak. Niyai nok gima cem tut nimbumbati ngot di iba perak kin mas bibon di ikwas dini ba, nikwas pijum ei tut TUHAN.

²⁹Ma jinyohou ndigban dima yok mungkun kei kikau bibou juug krau TUHAN De Ig kep ug e. Juug krau su lene suar jibakilo mun dima yok hagom nibuhunti hanyen bu leu api jikes hagom bak nibou imam nya kin nibou Lewi nya kin nibou mben Israel yahagom di ibong ei minu ndig Yerusalem.”

³⁰Gima rino imam kin Lewi nya isu inda mem perak kin mas kin nimbumbati nindigsi dima ba, ipwoi bittei hagom ug ei TUHAN De Ig ei minu ndig Yerusalem.

³¹Nikiju binimbut leu Minyei Ahawa nipimat ba, nuug ndam Yerusalem ei njap gi nisimnaibrimigcan mem bed gi nigom. Nyende Allah nyohou nye leu yo di imbuk di micut igkep nye bigyon ser nye cem kak puig sinon.

³²Tirigi nuug krau Yerusalem tu lene nibong kep ninghuisi mem njap nitindur ningai.

³³Njap gi nibitai lene nuug ei TUHAN De Ig lene nibakilo perak kin mas kin nimbumbati nindigsi di nibiang pima yok nibuhunti hanyen lene nikes hagom bak Imam Meremot di Uria nipmot mighumbou. Yo di ingat nibon midut dini bou igyai him inyeng Eleazar di Pinehas nipmot kin Lewi cin. Yoni ne Yozabad di Yesua nipmot kin Noaja di Binui nipmot ri.

³⁴Ikwop ndigban dima yok hagom nimangti bidem ba, ibakilo nibuhunti leu api ipas kep hagom ei daptarti.

³⁵Yo di ingkwei hanyen leu ingkiasi dima yahagom ibon midut nindig mindhe-ndhe titut ei nimbar hum dokti bak mben Israel ide Allah ei njap dima cem. Ibui sapi nikre ningut simnaibrimigcan bindig ei nimbar hum dokti bak TUHAN gau limwa mben Israel yahagom. Lene ibui domba nikre ningut ningot muhwindatai ba, muhwindagom kin domba pmot ningut ningot muhwindacan ba, muhwindacan bu. Ter leu gima bu lene iba kambir ningut simnaibrimigcan bibon midut nibiyai nikos ser sisarti gau yonti. Indig mindhe-ndhe dima yok hagom ei nimbar hum dokti nok mun di ibui di ibikuk yok bak TUHAN.

³⁶Leu api igyai srat nisindem di nibou ndig pas di kes ei indati bak nibou di ninyeng jei pima kin yo di igya kui noni ei hanjop nsi Efrat-Bei-Mpia-Nikimbasti. Yo di igya kui nibou di ninyeng jei dima yok iba munkwas bimpu timiei mben Israel leu binhyepo imati dem mem gima ibikuk yok bak TUHAN ei Nide Ig.