Read Hatam NEHEMIA 1 Bible Online

NEHEMIA 1 - Hatam bible

NEHEMIA 1

¹Srat dini tut Nehemia di Hakhalya nipmot de midyai nya. Ei Bed Kislew tirigi nibou ndig Artahsasta ninyeng tak kep mben Persia mem ari bingwam nyatungwagom tu lene da di Nehemia dingat rin ei minu ndig Susan di nok nibousi mem minu Persia.

²Mpe dima lene dide bat di Hanani bitut pinai nya nimpung gom sindi ikwei leu Yehuda ninyeng tak kepti leu api dihig ser yok tut minu ndig Yerusalem kin disut bat mben Israel di ingkwei leu ingkiaisi[1] ei minu Babel biyuug ei itimieisi hanyen tu.

³Lene ibuhup dihyet bipai sut mun di nggruk bibor di cut igkep yo di ingwes ngun di ingkwei hanyen ug ei itimieisi[2] drek dip ngkiai nya di ibong timiei ei minu dima di ingwes pri gau yok. Ipai bida bipia hi kinding ngug tig di bikrop ttai minu ndig Yerusalem di nggek sinsiou kin dimbou pmem di itu ei ngug tig dima bigyo. Hum yem hagom bingwig bikinei kikau kwei bipek ammani kep.

⁴Tirigi dimiap ibuhupti dima ne dikuk da bidipim ba, diyai nggwei kibor. Dingon ngguk bibor bidisindui njita ei mmun-njap poi leu api dingat nadi bak Allah,

⁵bidipai “TUHAN Allah di anyeng jei ei gwamti e, anyeng di jei bibor bindei ba, nittin tut Na tirigi nikuk nye ei Aho bei. Angon gom cem ayai hagom bit leu nok apreu ei mem yo di ingon ngakei Nani bibit ahyet cem.

⁶TUHAN e, ma angig ayai kep da ba, angig atingou mem dihyet tirigi dingat nadi tindei Ade limwa di mben Israel bikwop mmun-njap. Dipai jit bipia nye di mben Israel nibon sisar tu. Dani kin didigup bat-didigai bat nya nahagom nibon sisar tu.

⁷Naham nimbuk kep Na di TUHAN binibit ahyet bi cem. Nibit niggai serti di ayai binye tug hon Ade awak Musa pima bi.

⁸ Nogindini ma akan kep ahyet po atri tut bak Musa pima di dindat kep bipia gino mben Israel ingon gom tut Na bi lene ma ajji yok ug ei ingkiaisi.

⁹ Ne gino jikiek je bijitti kin Da hanyen bu bijibit dicuk jeti nya ne mbro nok gino dijji je ug ei minu nohon keti lo, midibuwak je hanyen kwei ei minu di didimig ei mem tungwatu nya ikuk yok biDa eisi.

¹⁰TUHAN e, nyeni ne Ade awak kin Ade limwa nya ri. Nipou ne ateu nye biningwes ngun tug hon Ade nisindemti di nindig bibor di nok mindur bibor cem.

¹¹Ma angig atingou mem dihyet kin Ade awak nindigsi nya di ikon anyeng yahagom ighyet. Ampu da leu binhyepo dibindei ba, nibou ndig ngondut da tirigi dihug ba anggur ningei ei mokti bak noni mem njap di ammani lewo dani ne Ade awak ri.”