Read Hatam NEHEMIA 8 Bible Online

NEHEMIA 8 - Hatam bible

NEHEMIA 8

¹Ug ei bed nimuhwindacan lene mben Israel yahagom ibong kei igwam kei bidem ide minu ndig nya hagom. Ug ei njap gi nigom ei bed dima ne yahagom induk yam kwei ei minu ndig Yerusalem bidem yam ei biyati di nindig gom ei Dimbou Pmem Minyei Su nite dima ug ba, yahara imam Ezra di ningon ki tut Nicukti di TUHAN yai bak mben Israel tug hon Musa leu binhyepo noni ug yai Srat Nicukti dima kwei.

²Gima rino noni ug yai srat dima bikwei sut ei biyati dima. Pinai nya kin sop nya kin munggwom nya di imbusyam ei mpia dima wer imahan ba, yahagom intin kimbo tu.

³Noni kiju biya ei dimbou heisi dima bou yahagom yoho bei bikwop Srat Nicukti leu njap bigyoti kikau bipek mpia huk pijum. Lene yahagom ingig itingou mem nihyet.

⁴Noni kui biya impek gom di tukan nya inen mem njap ndig dima. Matica kin Sema kin Anaya kin Uria kin Hilkia kin Maaseya yoni igya kui ninda com ba, Pedaya kin Misael kin Malkia kin Hasum kin Hasbadana kin Zakharia kin Mesulam yoni igya kui ninda prak.

⁵Tirigi Ezra kiju biya ei impek dima dip rino yahagom itou kep noni nggilun lo, tirigi noni mbrek leu Srat Nicukti rino yahagom ikiju bigya pijum.

⁶Lene Ezra pai “Jikwei ba, yahagom inggei sut TUHAN! Noni ne Allah di ninyeng jei bibor ri!” Lene nide limwa nya yahagom isu inda kui bibuhup “Igbit ri! Igbit ri!” Lene ikuk yok ba, iba ingwak bikik dihyei binggei sut Allah.

⁷Leu api yahagom ikiju hanyen bigya igyati lene Yesua kin Bani kin Serebya kin Yamin kin Akub kin Sabetai kin Hodia kin Maaseya kin Kelita kin Azarya kin Yozabad kin Hanan kin Pelaya di keret Lewi nya yahagom ingginau limwa nya tut Srat Nicukti dima.

⁸Yo dini ikiek nihyet Ibrani ei yuhui him bingginau ide limwa nya tut Allah De Nicukti[10] sindam leu binhyepo yahagom ingon dor niti.

⁹Tirigi Nicukti dima tibim ei yo dima itingou nsi lene ingon huk niti leu api ipim nggruet. Lene Nehemia di nok nibou hanjop dima kin imam Ezra di ningon ki tut Nicukti dima kin Lewi nya di ingginau Nicukti dima bak ide limwa nya yahagom ipai bak yo dima “Njap di ammani ne njap di ipigig sut ei mem TUHAN. Gima rino ma jingon ngguk ba, jipim au.

¹⁰Ma jingkwei hanyen ug ei jide ig leu binhyepo jibon pesta. Ma jiba jide njita kin anggur ngei bingondut jisut bat yo di yuhui mbum nya. Njap di ammani ne njap di ipigig sut ei mem ide Tuhan ri. Gima rino ma jingon kinei au. Ningon di llei bibor di TUHAN yai bije mibindei ba, jiyai nisindemti.”

¹¹Lene keret Lewi pima yok imbut srig ide limwa nyati bipai-hi-pai yokti leu binhyepo ingon buhun mem njap ndig dima bi.

¹²Gima rino yahagom ingkwei hanyen ug ei ide ig. Iba ingon di llei bibor bon pesta bidut anggur ningei cem leu api ibingondut yo di hiter lewo ingon dorti tut Srat Nicukti di tibim ei itingou nsi tu.

¹³Njap di hyep bu ne nibou mbier nya kin imam nya kin Lewi nya yahagom yuug ngat Ezra leu binhyepo ipikor ei nicuk yokti nya di jo ei Srat Nicukti.

¹⁴ Jo nibreisi mem yok bipia Srat Nicukti di TUHAN yai biyok tug hon Musa dima cuk mben Israel leu binhyepo yahagom ibong ser ig jibei mpam meng tirigi ibon Midut Njap Ndig Ig Jibei Mpam Meng.

¹⁵Gima rino itri tut nihyet bak timiei minu ndig Yerusalem kin yo di ibong bidem minu ndig kin minu mien nindigsi nya cem bipai “Ma jahagom jintek ug ei nungug tou dini kou bijitot biai kin biei zaitun kin biei mini kin dui kin biei nindigsi nya ninda-nda nya kwei leu binhyepo jibohok ig jibei mpam meng bit leu nok Srat Nicukti cuk nyeti.”

¹⁶Gima rino yahagom itot biei ninda nya kwei bibohok ig jibei nya ei ide ig bou ninjek dip kin ide ig him nya cem ei mpia di jo bas hak di iba ngug tig bikrop ttai simiak TUHAN De Ig cem ei biyati dideu Dimbou Pmem Minyei Su kin Dimbou Pmem Efraim.

¹⁷Limwa nya di ingkwei hanyen kwei leu ingkiaisi yahagom yohok ig jibei nya bibong ser. Nipou yo tirigi yohok ig jibei mpam meng mem nijam Yosua di Nun nipmot kikau kwei bipek ammani kep ne ingon prion ser midut dima lo, ikinyon eisi hanyen njap di ammani tu. Gima rino tungwatu nya yahagom ingon llei bibor cem ingon nggei-hi-nggei cem.

¹⁸Ibon pesta dima mem njap nitindur muhwindacan. Ezra kwop hanjop nsi gom leu Srat Nicukti dima ei yoho bei bikwop njap ngwa hagom. Ug ei njap gi nimuhwindaningai lene ibon midut gi ningwigsi gom bit leu nok Srat Nicukti dima nicuk yoti.