Read Hatam ESTER 2 Bible Online

ESTER 2 - Hatam bible

ESTER 2

¹Njap poi ser lene nibou ndig gga bu bi lo, kan-kan nyen tut Sop Nibou Ndig Wasti niyai munti pima kin nikos tutti di noni bibon drek dip cem bijo kikau.

²Gima rino yo di igya kui noni di ipingok kep ningonti nya di noni jem nisut bit yok pima ibou poi ipai ingon kanti bak “Gikei mem anggok sop gwam nitta pilei di ubbu ngat kei nya mem Na Di Anyeng Jei a.

³Ma ata yo di igya kui nani bidem hanjop nsi hagom ei ade ninyeng tak kepti dini leu binhyepo inggok sop gwam nitta pilei di ubbu ngat kei nya leu api abindei ba, ibuwak yok kwei ei ade ig di abet pijum ei mem ade sop gwam nitta pilei nya nibousi ei minu ndig pmem Susan dini. Leu api Hegai di nok mindor di yai midyai pijum di nok nibou mem ig nibou ndig sop mpu yok binyohou yok tut ide nuubbuti.

⁴Leu api Na Di Anyeng Jei adimig sop gwam nitta pilei igom di ajoi sut bibor leu sop gwam nitta pilei dima yok ikieti ba, ata noni nok Sop Nibou Ndig di ya luei Wasti nohoti.” Lene nibou ndig joi sut ide nipingok noti dima biyai nibou tut.

⁵Mpe dima lene Mordekhai di mben Yahudi gom di Yair nipmot cem no bong ei minu ndig pmem Susan. No dini ntun keret Benyamin him ba, jem Kis kin Simei nok nidigup bat-nidigai bat nya.

⁶ Tirigi po Nebukadnezar di nok nibou ndig mem Babel bindei timek Yerusalem nipou pima lene kat Mordekhai kin Yoyakin di nibou ndig Yehuda kin imang bibor bu bikri yok ug ei ingkiaisi ei minu Babel.

⁷Lo bi lene Mordekhai bon nikwohop Ester di nitom sop gwam nitta pilei gom di niimaisi ubbu ngat kei di ningut cem kei bibor kei. Tungwatu nya iba nihyet Ibrani bijem ninyeng Hadasa. Mpe di po Ester de andigpoi ningat nya imai leu su pima ne Mordekhai nek Ester ba, nyohou nok nonti nipmisop ningat.

⁸Tirigi yo pima itri tut nibou ndig nicuk yokti bidem hanjop nsi hagom tu lene ibuwak sop gwam nitta pilei nya imang bibor ba, ikwei sut bidem yam ei minu ndig pmem Susan. Ester cem ningat rima ei ikieti ba, ibuwak noni cem kwei ei ig di nibou ndig bet pijum ei mem nide sop gwam nitta pilei nya nibousi bikes noni ei Hegai di nok nibou di yai midyai pijum mem ig nibou ndig sop nindati.

⁹Hegai nggap leu Ester bijoi sut noni cem. Gima rino noni bipbur ba, bon midut tut Ester nuubbuti ba, yai njita di bimpu tut nuubbuti binoni cem. Lene Noni buwak Ester leu sop nindigsi nya ikieti bikes ei nghim nsi di kei bibor di bon nimbumbati hagom dem kei mem noni ei nibousi mem nibou ndig de sop pima yok. Noni bipbur ba, ug dimig awak sop gwam nitta pilei di igyai midyai nuubbuti igkei ibou muhwindacan bibuwak yok kwei leu nibou ndig de ig leu binhyepo igya kui binyohou Ester.

¹⁰Mordekhai hwen kep Ester ningonti nipou su leu binhyepo noni mbot kep tut bipia noni ne sop mben Yahudi rin au.

¹¹Mordekhai mbut-mbut nyen ei nibousi mem nibou ndig de sop nya pima nikiou biya bei mpia di jo bas hak di iba ngug tig bikrop ttai bikwop njap-njap bihig ser Ester ningat kin mun di mipek kep mem noni.

¹²Bit leu nicukti di nibou ndig kos tut ei su ne suar awak nya impu sop gwam nitta pilei nya tut yuubbu ngatti kikau mem nijam ari bingwam nitindur gom. Iba mini di biei nggrai di ui-gwang kei srigsi bidip yok kikau mem ninsi bed muhwindagom. Lene iba mini di ui-gwang kei nindigsi nya di ibisrig yamti bidip yok kikau mem ninsi bed muhwindagom gi gwam dip bu. Ibidip yok bingwig leu lene bikwop sop gwam nitta pilei dima yok hi gom hi gom ug ya ei Nibou Ndig Ahasyweros noho bei sindam.

¹³Bikwop mpe di sop gwam nitta pilei gom coi biya ei nibou ndig noho bei lene su no mun di ningon kieti.

¹⁴Tungwagom ba mmun bibuwak sop dima ug ei nibou ndig de ig ba, njapti kui lene buwak noni hanyen kwei ei nibousi mem nibou ndig nitnem mien nya. Mindor Saasgas hati tut binyohou yok. Gino nibou ndig joi sut gima jem sop dima hanyen kwei bindat kep ninyeng lene isindui sut ba, noni ug ya ei nibou ndig noho bei hanyen bu. Gi bi lene gi mbun sop dima ug ngat nibou ndig hanyen kan bi.

¹⁵Tto bou dem lene Ester coi ndam nibou ndig biya ei noho bei. Ester ne Abihail nipmisop rin ba, nitom Mordekhai nek binyohou nok nonti nipmisop. Bikwop tungwagom-gom di ngat Ester bou niyai him nggap leu sut nuubbuti. Noni ug ngat nibou ndig bijuk sinsun bit leu Hegai di nok mindor mem sop gwam nitta pilei nibousi pima nindoti kin nipingok noti.

¹⁶Ibuwak Ester kwei ngat Nibou Ndig Ahasyweros ei nide ig nibou ndig mem ari bingwam gi nimuhwindacan ba, Bed Tebet di bed gi nisimnai di Ahasyweros ninyeng tak kep limwa nya.

¹⁷Ester nuubbu ngat keisi bipwoi nibou ndig ningon lene biyai ningon nggei-hi-nggei dor njiriek sop gwam nitta pilei nindigsi nya cem. Gima rino nibou ndig joi sut noni nindig bibor bikiju ba, kon topi ninyeng tak kepti bibijuk Ester nibou lene bikon Ester nok sop nibou ndig biya luei Wasti nohoti.

¹⁸Gima leu lene Ahasyweros bon pesta nindig bibor di bindo tut nijoi sut Esterti bikon ninyenga. Noni nduk yo di igya kui noni kin nibou di inyeng jei nya ba, yahagom idem yam ei pestati dima. Noni bitri tut njap dima bipia njap ndig di tungwatu nya igwam kep inghuisi[1] bidem ninyeng tak kepti nisurti-nipekti binjei mun di kei bibor bak nide limwa nya yahagom bit leu nok nibou ndig nya igyai kepti cem.

¹⁹Mpe dima nibou ndig kon Mordekhai binok no di ya kui noni ei hanjop dima.

²⁰Ba, Ester gipai sut nonti bipia noni ne sop Yahudi rin bigyo. Lewo Mordekhai hwen Ester ningonti tu leu binhyepo mbot kep tut bipia noni ne sop Mben Yahudi rin bi. Ester bit nipmum Mordekhai nihyet noyam kin gi bit nihyet mpe di po nimien yo po nyohou no pima.

²¹Mpe di gom bu tirigi Mordekhai yai midyai ei ig nibou ndig lene Bigtan kin Teres di igya ser nibou ndig de nghim nsi pijum nya igyok ingon gom leu dima igyai nimai bak Nibou Ndig Ahasyweros rin lewo ingon kinei sut noni nindig bibor.

²²Mordekhai kan tut ingon kanti dima lene bipbur ba, bakilak yok bak Ester. Lene Ester com nituti dima bi. Noro noni bipbur buug pai sut mun di Mordekhai miap tut dima bak nibou ndig.

²³Nikei nya ipigot bram munhyet dima lo, jo nibreisi bak nibou ndig bipia nibakilak yokti dima igbit tu. Gima rino ipindur cin dima ei cou dihim di itas ei suti. Lene nibou ndig pas kep munhyet nipek kepti dima ei Srat Nibohon Ahasyweros Ninyeng Tak Kepti.