Read Hatam ESTER 4 Bible Online

ESTER 4 - Hatam bible

ESTER 4

¹Mpe di Mordekhai miap tut mun di buhun di tau kep yok dima lene rik nide sinsun di jo ningkekti rok him bijuk sinsun kron di bindo tut ningon di ngguk. Lene kam atriem bigimahap nibou leu api hwou ug ei minu ndig pmem Susan lene ningon ngguk bibor bipim kui jei sut,

²kikau buug biya hon dimbou pmem nuhui ei ig nibou ndig. Noro coi ig dima bi lewo harin dima yo di ijuk sinsun kron icoi ug ei ig nibou ndig a.

³Tirigi yo pima itri tut nibou ndig nicukti bidem hanjop nsi hagom tu lene mben Yahudi ipim nggruet bidem minu Persia kin Media nisurti-nipekti hagom. Lene ibiyem njita bi cem ipim kui jei sut cem iba nicot pai nyen cem ba, imang bibor ijuk sinsun kron ba, irim-rim nyen bibong atriemti cem.

⁴Tirigi awak sop gwam nitta pilei nya kin mindor nya di inyohou kep Sop Nibou Ndig Ester pijum nya ipai sut Mordekhai niyaisi dima bak Ester lene ningon ngguk bibor leu api pinak sinsun bak Mordekhai leu binhyepo juk biluei sinsun kron di juk dima noro Mordekhai kou sut.

⁵Lo bi lene Ester jem Hatah bikwei ngat no. No dini ne mindor gom di nyohou kep Ester pijum bit leu nibou ndig nicuk noti ri. Ester cuk Hatah ug bihig ser Mordekhai tut mun di cut igkep yok dima kin mun di bindei di noni yai nok gima.

⁶Hatah ug ei dimbou pmem nibicoi ug ei ig nibou ndig di bon biyati ei minu ndig pmem dima bitau kep Mordekhai.

⁷Lene Mordekhai nyohou pui sut mun di cut igkep no bak lene bipai sut mitiei perak nimangti di Haman preu sut ei mem nibou ndig tu dima bindei coi ei kintror mitiei nibousi pima cem gino timiei minu Persia nya icok tut mben Yahudi yahagom leu Ahasyweros ninyeng tak kepti nisurti-nipekti cem.

⁸Mordekhai biyai srat di tibim tut nibou ndig nicukti di tri tut bipia suar timiei pima yok icok tut mben Yahudi pima di nibou ndig bindei hei ei minu ndig pmem Susan nimeng gom bak Hatah lene cuk noni bipwoi srat dima biyai bak Ester lene bipai sut munhyet dima cem bak. Noni bahara mem Ester leu binhyepo ug ngat nibou ndig ba, hara noni leu binhyepo ngondut Ester de mben nya.

⁹Leu api Hatah ngkwei hanyen buug ngat Ester lene ndat kep Mordekhai nihyetti dima hagom bak.

¹⁰Ester cuk Hatah buug ngat Mordekhai hanyen bipai bak,

¹¹“Bikwop pinai kin sop di nibou ndig gijem bi lo, ug ngat nibou ndig ei ninsi di jo bas hak di iba ngug tig bikrop ttai ma kwei lene suar tug ndei nimai drek dip. Harin dima nibou nya kikau ug bipek limwa nya ei nibou ndig ninyeng tak kepti dini cem inggek nikos tutti dima a. Yahagom ingon hukti. Puig gom ngat di mibindei di no di ug ngat nibou ndig dima ningwes ngun leu hukum nimai rinok gini. Gino nibou ndig krau nide tom mas ei nindati bisu bak no dima lene ningwes ngun. Noro nibou ndig jem da biduug ngat noni bi ei bed nitindur gom tu.”

¹²Leu api Hatah ug ndat kep Ester nihyetti dima bak Mordekhai.

¹³Gima rino Mordekhai sok nihyet bak Ester bipai “Ma akan bipia ade nibong kei nigwam kei ei ig nibou ndig dimati mibindei ba, angwes ngun leu mun di buhun di micut igkep mben Yahudi nindigsi nya au.

¹⁴Ningat ne mben Yahudi miyuum puig hiter di bindei ba, ingwes ngun. Noro gino akimut ahui ba, agwam nyahan hak tirigi mun di buhun bibor dini cut igkep nye lene nanti cem mporo amai ba, hi mintun acig nide ig bei nsi nya him cem bu bi. Tou rikan tut i? Mpaba atug ndei anyeng sop nibou ndig pijum mem nituti di nok gini ug o!”

¹⁵Gima rino Ester sok nihyet hanyen bak Mordekhai bibuhup,

¹⁶“Anduk limwa Yahudi di ingat rin ei minu ndig pmem Susan dini yahagom bidem yam lene ma jingat nadi tindei da. Ma jiyem njita kin jidut ndia ngei bi ei ninsi njap nitindur ningai. Dani cem midiya tut ditde awak sop gwam nitta pilei di inyohou dani ba, niyem njita ba, nidut ndia ngei cem bi. Nyeni igyai nok gima nipou leu api duug ngat nibou ndig. Mbro nok gino ditunggwei sut nicuk nyeti pima lo, nna ug. Gino suar dimai drek dip ditunggweisi dima lene midimai hak ug.”

¹⁷Leu api Mordekhai ug bon igbit Ester nipingok noti nya hagom.