Read Hatam ESTER 5 Bible Online

ESTER 5 - Hatam bible

ESTER 5

¹Ug ei njap gi niningai ei njap di niyem njita ba, nidut ndia ngei bi pima rino Ester juk nide sinsun sop nibou ndig leu api ug ngat nibou ndig ei ninsi di jo bas hak di iba ngug tig bikrop ttai ma kwei. Mpe dima lene nibou ndig no gwam kui nide banggo mbrei di birok kik dimbou hui.

²Tirigi noni ngat Sop Nibou Ndig Ester di kwei ya nisai ma kwei lene ngondut noni bisu nide tom mas bak. Leu api Ester brim ningkek buug ngget tom mas dima niyenti.

³Leu api nibou ndig hig ser “Sop Nibou Ndig na e, akwei sut mindei i? Ahara da tut mindei i? Mbro nok gino ahara da tut gima anyeng tak kep dinyeng tak kepti dini nite hi rin lo, apai hak bida ug leu api midikes bina.”

⁴Lene Ester buhup “Gino Na Di Anyeng Jei ajoi sut da lene ma Na Di Anyeng Jei kin Haman jeni jihwou yem njita di dingei ei mem Na Di Anyeng Jei ei mmun di ammani.”

⁵Lene nibou ndig jem Haman bikwei haninyai leu binhyepo yo cin yuug bit Ester nijem yokti pima. Leu api yo cin ikwei bit pesta di Ester tin ei mem nibou ndig dima.

⁶Ei nituti di idut ba anggur ngei lene nibou ndig hig ser Ester “Akwei sut mindei ngan i? Ahara da tut mindei i? Mbro nok gino ajoi sut anyeng tak kep dinyeng tak kepti dini nite hi rin lo, apai hak bida ug leu api midikes bina.”

⁷Lene Ester buhup,

⁸“Gino Na Di Anyeng Jei ajoi sut abuhup dihyet tut mun di ade awak di dani dahara nani tut lene ma Na Di Anyeng Jei kin Haman jeni jikwei yem njita di dingei ei mem je hanyen bu mem mmun di hyep bu. Mpe dima lene ade awak di dani midipai mun di dahara Na Di Anyeng Jei tut bina tirigi igyem pesta bit yam.”

⁹Lene Haman ba ningon di nggei-hi-nggei bijo leu pesta dima. Noro tirigi ug krau dimbou hui ei ig nibou ndig de bingat Mordekhai di kiju mem gima kuk no ba, nibou cut bak bi lene ningon sibui sut noni nindig bibor.

¹⁰Noro om kep ningonti leu ba, ngkwei hanyen ug ei nide ig. Ug krau su rino jem nisut bat nya ba, ikwei ngat. Noni pai bak nitnem Zeres cem ba, kwei gwam-gwam nyen bit yok.

¹¹Leu api Haman nggap leu nonti biyok binggei sut nonti tut gi nyeng tut ndigban nya cem tut gi nipmot bat nya imang cem tut gi yai ninyeng di jei dor njiriek nibou di inyeng jei nindigsi nya cem.

¹²Lene bisum nihyet eisi bu bipai “Gima he bi lewo Sop Nibou Ndig Ester jem nindigsi nya bi noro jem dani kin nibou ndig nyengkom he ba, nibit pesta di noni bon mem nyeni tu. Ba, noni jem nyeni hanyen bu mem mmun di hyep cem ba, nuug bit nide pesta dima bu.

¹³Noro gino dingat kep Mordekhai di mben Yahudi pima tirigi gwam kui dimbou pmem nuhui ei ig nibou ndig de dima ne mun di dinggap leu sut pima hagom bon ninyeng mem da bi.”

¹⁴Nitnem kin nisut bat nya imiap gima lene ipai ingon kanti bak “Abindei ba, tungwatu nya itas cou di ipindur kep tungwatu ingut eisi nidihim gom di nijeisi dem meter nyatungwagom ba, can mem no dima. Leu api njap di hyep ma ahara nibou ndig mem njap tekti leu binhyepo sindui sut ba, apindur Mordekhai ei cou di jei ndig dimati. Apino aba angon di nggan-triot bibit pesta.” Haman binai ighyet nghwak him dima bikan lo gi, kei bibor ri. Gima rino cuk tungwatu nya itas cou jei ndig nidihim gom mem ipindur tungwatu eisi.