Read Hatam NEHEI LEUSI 1 Bible Online

NEHEI LEUSI 1 - Hatam bible

NEHEI LEUSI 1

¹ Yakub di ijem ninyeng hi Israel kin nipmot bat nya di ibit noni ug ei minu Mesir kin itnem bat imunggwom bat nya inyeng rino,

²Ruben kin Simeon kin Lewi kin Yehuda,

³kin Isakhar kin Zebulon kin Benyamin,

⁴kin Dan kin Naftali kin Gad kin Asyer.

⁵Yo di intun Yakub him dima yahagom imangti ibou ningot muhwindacan. Noro nipmot Yusuf bie buug ei minu Mesir nipou su.

⁶Mimbrek-mimbrek bu lene Yusuf kin nikindig bat nya kin nikinjoi kin nide bat nya di ikui sur noni yahagom imai bingwig.

⁷ Noro yo di intun yoni him inyeng rino mben Israel ba, idigek kep mpia bibon imunggwom bat nya imang ndig ba, ide nintun him yamti di bram yam nya ikieng kep minu Mesir nisurti-nipekti hagom.

⁸ Mpe dima lene Firaun di nijep bu ya luei Firaun nitimiei nohoti ei minu Mesir noro noni kan tut Yusuf niyai munti nya bi.

⁹Lene noni pai bak nide limwa nya “Buhun bibor mem nye tut mben Israel. Lewo imang bibor ba, isindem bibor dor njiriek nye cem.

¹⁰ Leu ma nyeni ide siceu nya mikon pran bit nye lene hi rino mben Israel minjei siceu bit yo dima bikon pran bit nye leu api minang leu[1] ide minu dini e? Jikwei ba, inggok puig di kei mem leu binhyepo yoni idigek kep mpia bu bi.”

¹¹Gima rino yo di igya kui Firaun ita mindor nya di iba imbuk co kep mben Israel bikes midyai di buhun bibor ei inghat dip. Suar mben Israel ingot ig gudan bousi nindig bibor ei minu ndig Pitom kin Raamses cem leu binhyepo Firaun minju ndigban ninyeng hagom eisi.

¹²Mbro nok gino mben Mesir ico kep mben Israel nindig bibor bikum eisi bu lo, mben Israel imangti kum eisi kikau bikieng kep minu Mesir nisurti-nipekti hagom dor njiriek bu. Gima rino mben Mesir ittin tut yok.

¹³Lene iba imbuk co kep yok bihwen bit yok nindig bibor.

¹⁴Apino mben Israel igyaijoti buhun bibor. Suar igyai midyai dino ingot ig proyek nya ba, igyai miai nya cem lo, mben Mesir ingondut yok kan bi.

¹⁵Lene Firaun kes nihyet bak Sifra kin Pua. Sop cin dini impu sop Ibrani nya mpe dino igwam tut munggwom.

¹⁶Noni pai biyok “Gino jimpu sop mben Ibrani ba, tirigi igwam tut munggwom pinai lene suar jikos hak ug. Ne gino igwam tut munggwom sop lene jisindui sut yok ba, igyaijo.”

¹⁷Noro sop cin dini ne sop di ikuk yok bak Allah bibit nihyet ri. Gima rino ibit Firaun nihyet bi ba, isindui sut munggwom pinai nya cem ba, igyaisi jo.

¹⁸Gima rino Firaun hig sop cin pima kwei bihig ser yok “Nggon rino jisindui sut munggwom pinai nya di igyaijo i?”

¹⁹Lene ibuhup “Sop mben Ibrani kin sop mben Mesir noyam bi. Lewo tirigi sop mben Ibrani inghim dut jei bi lene igwam tut munggwom haninyai nipou tirigi nyeni nuug mpu yok bigyo.”

²⁰Gima rino Allah joi sut sop cin dima leu api mben Israel idigek bibor ba, imangti kum eisi bu.

²¹Lene Allah bindei ba, sop cin dima ibon imunggwom bat nya lewo yahacem ikuk yok biNoni bibit nihyet.

²² Nok gima kikau bibou Firaun kes nihyet bak nide limwa nya yahagom bipai biyok “Suar jicom mben Ibrani imunggwom bat nya ningwoi-ngwoi nipinai nya tut igyaijo ug ei Minyei Nil bimai ug. Noro ma jisindui sut munggwom ngwoi-ngwoi nisop nya ba, igyaijo.”