Read Hatam NEHEI LEUSI 10 Bible Online

NEHEI LEUSI 10 - Hatam bible

NEHEI LEUSI 10

¹Lene TUHAN pai bak Musa “Aug ba, aya ei Firaun noho bei. Dibindei ba, noni kin yo di igya kui noni ingkek ndok bibor leu binhyepo dibon mindur nya ei ikieti.

²Lene apui sut notou diba mben Mesir bikek tug hon mindur dini yok bak amunggwom bat nya kin agnyon bat nya. Ba, jahagom mijikan tut bipia Dani ne TUHAN ri.”

³Gima rino Musa kin Harun yuug ngat Firaun bipai binoni “TUHAN di nok mben Ibrani ide Allah hig ser na di Andigpoi bipia apig bu api akes hon ba, akuk na biNoni bu i? Suar akes Nide limwa nya bimbut leu binhyepo ikuk yok biNoni.

⁴Gi bi lene Noni mibindei ba, hai ceng nya mikieng kep minu Mesir mem njap di hyep.

⁵Hai ceng dima yok sider-wap bigyon kep dihyei ninjek dip hagom. Leu api migyem njita kin mahai meng niken di jo bije po biget di mbras nok tig njep hwen bingwig leu je bigyo pima bitut baham tindurti cem.

⁶Hai ceng nya mingwig ei ade ig kin yo di igya kui na di Andigpoi kin ade limwa nya kin ide ig nya. Mindur dini buhun bibor dor njiriek mun di jidigup bat-jidigai bat nya ingat bou igyai him. Lene Musa ba ninghim bak Firaun bimbut leu.”

⁷Lene yo di igya kui Firaun ipai binoni “Apig bu api no dima mikes hon bibindei ba, mun di buhun micut igkep nye bu bi i? Na di Andigpoi e, asindui sut mben Israel bimbut leu binhyepo ikuk yok bak TUHAN di nok ide Allah hak ug. Jo nibreisi mem na di Andigpoi bipia minu Mesir hagom kinei bibor tu!”

⁸Lene Firaun sok nihyet mem Musa kin Harun bikwei hanyen lene pai biyok “Nna ba je juug ba, jikuk je bak TUHAN di nok jide Allah hak ug. Noro tou rimbut i?”

⁹Lene Musa buhup “Nahagom nimbut ri. Munggwom nya kin andigpoi nya cem. Minibuwak nyeni nipmot bat nya kin nipmisop bat nya ba, minijem nyende domba nya kin kambir nya kin sapi nya cem leu binhyepo nibibon midut nindig bibor ba, nibinggei sut TUHAN.”

¹⁰Lene Firaun pai “Bit bon disindui sut gima jibuwak sop nya kin jimunggwom bat nya bibit je kan bi! Lewo gima noyam kin gino jihig da bidingat nadi leu binhyepo TUHAN minjei mun di kei bak jeni. Jo nibreisi mem da bipia jahagom mijikiek jimig jou tut da ug ri.

¹¹Dice tut bi! Je di pinai jengkom he jimbut bijikuk je bak TUHAN gino jimpig bou kep jingon kanti dima!” Firaun pai nok leu api jji Musa kin Harun leu nide ig bei.

¹²Lene TUHAN cuk Musa bipai “Asu anda gau minu Mesir. Gi nok lene hai ceng nya mikieng kep njita kin mahai meng nikenti po biget di mbras nok tig njep hwen leu di jo pima bigyem.”

¹³Gima rino Musa krau nide tom bisu ninda tut apino TUHAN bindei ba, hou kui kwei leu mpia nipriti kikau mem njap dima kin mmun cem ei minu dima. Ug bipek njapti lene hai ceng nya ibit hou nimig kwei.

¹⁴ Hai ceng di isider-wap igyon kep minu Mesir nisurti-nipekti hagom. Mben Mesir hi ngat hai ceng mang bibor nok gima bou niyai him habiei kikau kwei bipek ammani kep bigyo sren.

¹⁵Hai ceng nya igyon kep dihyei ninjek dip dem kep nok ban nimmun ba, igyem njita kin mahai meng nikenti po biget di mbras nok tig njep hwen bi pima hagom bingwig bitut biei ngat hagom cem. Mun di ngun ei dihyei Mesir nisurti-nipekti nok biei ngat kin biei meng kin mahai meng kin njita hagom ngwig.

¹⁶Lene Firaun bipbur ba, hig Musa kin Harun kwei bipai biyok “Jo nibreisi bipia dibon mun tunggwei sut TUHAN di nok jide Allah ba, dibon mun tunggwei sut jeni cem.

¹⁷Ma jikos ser ditde sisar di dibon tunggwei sut je mbigom ngat ndini leu api jingat nadi bak TUHAN di nok jide Allah leu binhyepo Noni miyai hukum di bindei nimai dini leu da.”

¹⁸Lene Musa kes Firaun ei bingat nadi bak TUHAN.

¹⁹Lene TUHAN bindei ba, hou di cut leu mpia nipriti kwei ei minu dima ngkwei hanyen leu api hou di nimig ten bibor cut bu kwei leu mpia nicutti bimiep hai ceng nya hagom hanyen ug ei Muk Lipig.[5] Hai ceng ningat gom jo ei minu Mesir bu bi.

²⁰Noro TUHAN bindei ba, Firaun ningkek ndok tut mben Israel hanyen bu ba, sindui sut yok bimbut ug bi.

²¹Lene TUHAN cuk Musa bipai “Asu anda kui mpia-bbed him leu api nidinditi di dindi-kai minggai kep minu Mesir ug ri.”

²² Gima rino Musa su ninda kui mpia-bbed him leu api nidinditi di dindi-kai nggai kep minu Mesir nisurti-nipekti kikau mem mmun-njap ningai.

²³Bit bon mben Mesir ingat mun nyeng hi bou igyai him kan bi. Gima rino yahagom igwam hak ei ide ig bei nya. Noro mpia njap piga digai mben Israel ei ide ig bei nya bikwop njap.

²⁴Lene Firaun hig Musa kwei bu bipai binoni “Nna ba je juug ba, jibuwak sop nya kin munggwom nya cem bibit je leu binhyepo jikuk je bak TUHAN. Noro ma jijem jide domba nya kin kambir nya kin sapi nya au.”

²⁵Lene Musa buhup “Gi nok lene suar na di Andigpoi ayai ade mindhe-ndhe nya binye leu binhyepo nibibon midut nindig mindhe kep hum ei TUHAN di nok nyende Allah Noho bei.

²⁶Gi bi lene suar nijem nyende mindhe-ndhe nya hagom ba, nimbut tut. Minikes mindhe ningut gom ei bi. Leu api nyeni minindo igbit gi hi di dem mem gima nibikuk nye bak TUHAN di nok nyende Allah. Bit bon nikan tut gi hi di dem mem gima kan bi bibou nuug krau iggum ndigsi pima nipou ug e.”

²⁷Lene TUHAN bindei ba, Firaun ningkek ndok tut mben Israel bu ba, sindui sut yok bimbut bi.

²⁸Lene Firaun pai bak Musa “Aug bihigom leu doho bei! Gino dingat angat bou diyai him hanyen bu lene midiyai nimai bina!”

²⁹Lene Musa buhup “Bit leu nok na di Andigpoi apaisi dima. Lewo na di Andigpoi angat dingat bou ayai him bu bi sren.”