Read Hatam NEHEI LEUSI 12 Bible Online

NEHEI LEUSI 12 - Hatam bible

NEHEI LEUSI 12

¹ Mpe dima ne TUHAN pai bak Musa kin Harun tirigi ingat rin ei minu Mesir,

²“Bed dini minok bed gi nimbie him leu bed nindigsi nya mem je ba, minok bed gi nigom mem je bikwop ari bingwam.

³Disok dihyet ei je dip bak mben Israel yahagom ba, jipai biyok bipia ug ei njap gi nisimnai mem bed jep dini lene suar nibou ig bei nsi nya yahagom idimig domba mien ningut gom bibui mem ide ig bei nsi nya.

⁴Gino ig bei nsi nya ibou poi he ba, igyem mindhe ningut gom titut yam kan bi lene nibou ig dima kin nisut gom bitut nide ig bei nsi nya yahagom ibicom yam nok gom ba, igyem mindhe mien dima lo, suar ikwas ba, dem igbit yo di igyem nya.

⁵Lene suar jidimig domba di nide njap ug ei ari bingwam gom tu di bon nibokti kin nikruakti bi.

⁶Suar jikes mindhe dima biya bibou ug ei njap gi nisimnaibrimigtai ug e. Lene mben Israel yahagom ibui ide mindhe-ndhe dima yok sur yam ei njap dima mem mmunti.

⁷Suar yahagom igyai mindhe-ndhe dima yok inggrom poi bibijos ig hyei cin ei dimbou hui kin biei njiti di jo nai dimbou hui ei ig bei di igyem mikwau dima eisi.

⁸Suar yahagom ibam mikwau dima mem mmun dima bigyem kin simeng di mpo kin roti di dwoi bi.

⁹Suar indip domba dima titut yam bitut nibou kin nimig kin ninghop ba, igyem domba di indip dima lene ma igyem ngun au lene ikwen ei yengti cem au.

¹⁰Ma jibet mikwau dima ndrim hi mem gima jiyem ei njap bigyokti au. Gino niken jo lene jindig hagom kep hum hak.

¹¹Tirigi jiyem mikwau dima lene jijuk sinsun bijo jingkek kin jijuk srop ei jimig kin jikrau jide tom ei jindati ba, jiyem mikwau dima haninyai. Lewo nibon midut dini ne Njap Ndig Paskah nitriti rin ba, jiba gima binggei sut Da di TUHAN.

¹²Lewo midiya bidem minu Mesir nisurti-nipekti mem mmun dima bidiyai nimai bak munggwom pinai mighumbou nya bidem ide ig bei hagom kin mindhe-ndhe nipmot bou nya hagom. Ba, midikes hukum ei mben Mesir ide kwar nya hagom dip tug hon nisinati dima. Lewo Dani ne TUHAN ri.

¹³Domba nggrom di jo dimbou hui minok mun di bindo tut jide ig di jibong ser nya. Gino dingat domba nggrom dima lene dinjiriek ig dima bidiyai nimai bak jide munggwom pinai mighumbou nya noyam kin munggwom pinai mighumbou di mben Mesir ide di diyai nimai biyok nya bi.

¹⁴ Ma jiyok ngon kep njap ndig tut nibon midut dini nok mun di pus jingonti tut mun di Da di TUHAN dibibon mem je. Suar jiyok ngon kep njap ndig dini bikwop ari bingwam hagom bijo ninno bijo kikau.”

¹⁵Lene TUHAN pai “Ma jiyem roti di dwoi kikau mem njap muhwindacan dima au. Ma jicom roti ninjep leu jide ig bei nya mem njap gi nigom. Leu gino tungwagom yem kep roti di dwoi ei ninsi njap muhwindacan pima lene Noni minok Ditde limwa bu bi.

¹⁶Ma jidem yam ei mem jikuk je biDa mem njap gi nigom kin njap gi nimuhwindacan. Suar jikes jinda tut jide midyai nya mem njap dini yok lo, tut njita di jingei mem jenti lene dipai ser bi.

¹⁷Midibuwak je di mben Israel leu minu Mesir mem njap ndig dima. Gima rino ma jiyok ngon kep njap ndig dima lene jibon kep midut dini ba, jiyok ngon kep kikau bikwop ari bingwam.

¹⁸Ei jide ari bingwam nijep dini mem bed gi nigom ba, njap gi nisimnaibrimigtai mem mmunti lene jiyem roti di dwoi kikau ei mmun-njap muhwindacan ug bipek njap gi ningot can ba, gom ei mpia mmunti au.

¹⁹Ma jicom jide roti ninjep leu jide ig bei nya ei mmun-njap nitindur muhwindacan pima. Gino jigom yem roti di dwoi lene noni minok Ditde limwa bu bi. Dicuk jeti dini mem je di timiei minu Israel kin ngkiai di ibong timiei bit je nya cem.

²⁰Ma jiyem mun di roti ninjep joti au. Noro ma jahagom jiyem kep roti di dwoi bi bikwop ei jide ig bei nsi hagom.”

²¹Lene Musa nduk nibou mben Israel yahagom kwei bipai biyok “Jahagom juug ba, jijem domba pmot ningut gom kwei mem jide ig bei nsi nya leu binhyepo jitin ei mem nibon midut Njap Ndig Paskah.

²²Lene juug yai minta hisop ningot gom kwei bijitur ei domba ninggrom di jo ei bokorti. Lene jibijos ig hyei cin ei jide dimbou hui kin biei njiti di jo nai dimbou hui dima cem. Lene ma jibihi hei ug ei nisai mem mmun dima bipek njap bigyokti au.

²³ Tirigi TUHAN ya bidem minu Mesir nisurti-nipekti biyai nimai bak mben Mesir lene Noni mingat domba dima ninggrom ei jide ighyei cin kin dimbou hui kin biei njiti di jo nai dimbou hui bou niyai him apino minjiriek jide ig dima yok. Noni misindui sut Malaikati Di Bindei Nimai coi ug ei jide ig dima biyai nimai bije bi.

²⁴Suar jeni kin jimunggwom bat nya jibit TUHAN nicuk jeti dini hagom bijo ninno bijo kikau.

²⁵Gino juug krau minu di TUHAN preu ei mem je tu lene jibon midut dini ei sirima cem.

²⁶Gino jimunggwom bat nya ihig ser je tut nibon midut dini nuug ndamti,

²⁷lene jibuhup bipia nibon midut dima ne mun di ibui kep Njap Ndig Paskah rin ba, ibinggei sut TUHAN. Lewo Noni njiriek mben Israel ide ig ei minu Mesir tirigi po Noni yai nimai bak mben Mesir pima leu api nyeni ingwes ngun.” Lene mben Israel pima yok yahagom ikuk yok ba, inggei sut TUHAN.

²⁸Lene yahagom intek gimahap bigyai hagom bit leu nok TUHAN nicuk yokti tug hon Musa kin Harun pima.

²⁹ Mmun mau rino TUHAN yai nimai bak munggwom pinai mighumbou ei minu Mesir yahagom bitut Firaun nipmot mighumbou kikau ug bipek no di sima ei ig bui nsi nipmot mighumbou cem. Bitut mindhe-ndhe nipmot bou nya hagom imai bingwig.

³⁰Mpe dima lene Firaun kin yo di igya kui noni kin nide limwa nya yahagom idrui sut bikiju leu api yahagom ipim kui jei sut nimai nya. Lewo munggwom pinai mighumbou gom mai kep yok bikwop ei mben Mesir ide ig hagom.

³¹Mmun dima cem Firaun sok nihyet mem Musa kin Harun ikwei ngat noni bicuk yok bipai “Suar jeni kin jide limwa nya jahagom juug bihigom hak! Jikes ditde minu dini ei bijimbut leu! Leu binhyepo jikuk je bak jide Allah bit leu jingon kanti!

³²Jijem jide sapi nya kin domba nya kin kambir nya hagom bijimbut tut bihigom! Lene jingat nadi tindei da.”

³³Lene timiei minu Mesir nya cem ibidip huk mben Israel leu binhyepo ibipbur bimbut bihigom leu minu Mesir. Ipai biyok “Gino jimbut leu nye bi lene nahagom minimai ningwig ug ri!”

³⁴Gima rino mben Israel ikon bokor tut ide roti di dwoi bi di inon bigyo nya lene iba minyahas binggai kep hagom bikon ei inghat dip.

³⁵ Lene igyai hagom bit leu nok Musa nicuk yokti ba, yahara mben Mesir tut mas kin perak di indei kin sinsun cem leu binhyepo ikwas tut yok mikuisi.

³⁶TUHAN bindei ba, mben Mesir ingon kei sut mben Israel apino injei mun di ima nya hagom bak yoni mikuisi bit leu ingon kanti. Gima rino mben Israel imbut tut mun di mben Mesir inyeng tut nya hagom.

³⁷Lene mben Israel ijo leu Raamses bimbut imig ug ei Sukot. Pinai nya imangti ibou sribu sratus muhwindagom noro ikwop sop nya kin munggwom nya imangti bi.

³⁸Lene ijem ide sapi nya kin domba nya kin kambir nya mang bibor bimbut tut. Lene ngkiai di itti kin mben Israel di ibit yok nya cem imang ndig.

³⁹Yuug krau Sukot tu lene inon ide roti di dwoi bi di ikon kwei leu minu Mesir. Lewo Firaun jji yok kros leu minu Mesir apino bon nituti mem ingei njita kin roti mem yonti bi.

⁴⁰ Nibohon rinok gini. Mben Israel ibong ei minu Mesir mem ari bingwam sratus bitai ningot ningai su.

⁴¹Hammi tirigi ari bingwam sratus bitai ningot ningai dima ngwig leu su rino TUHAN de limwa nya bikwop ide mben yahagom imbut bihigom leu minu Mesir.

⁴²Mmun mau dima TUHAN ngkiem ser yok leu binhyepo buwak yok leu minu Mesir. Gima rino mben Israel igyok ngon kep njap dima kikau ba, yoni cem igyai ngkiem mem mmun dima leu binhyepo ibigyok ngon kep notou TUHAN teu yok.

⁴³Lene TUHAN pai bak Musa kin Harun “Ditri tut nicukti tut Njap Ndig Paskah nok gini. Harin dima ngkiai di ibit je igyem domba nghui di jibui bijindig kep hum mem Njap Ndig Paskah a.

⁴⁴Noro disindui sut jide awak nya di jiba mitiei biwim yok nya bigyem kep mikwau dima bit je gino jiyai nibon midut sunat biyok tu.

⁴⁵Noro ngkiai di icem kep je nya e, he yo di igyai midyai mikui-kausi mem je nya e, yo dini ne harin dima igyem mikwau dima a.

⁴⁶ Tirigi jiyem mikwau dima lene jiyem hagom ei ig bei di jibam domba eisi dima lene ma jehei sut ndrim hi ug ei nisai au. Lene jidahat ninjum hi cem au.

⁴⁷Suar mben Israel yahagom ikon Paskah binok njap nindig.

⁴⁸Noro harin dima no di bit midut sunat bi hi yem kep mikwau dima a. Gino no di tti kin je bibong bit je joi sut kon njap dima bit je bibinggei sut Da di TUHAN lene jiyai nibon midut sunat bak noni kin pinai nindigsi nya ei nide ig bei nipou ug e. Gima ngwig lene jibisrip tut noni noyam kin timiei minu Israel ba, jisindui sut noni biyem kep domba pima ninghuigya.

⁴⁹Suar je di timiei minu Israel kin ngkiai nya di itti kin je ba, ibong bit je jahagom jibit nicukti dini yok noyam.”

⁵⁰Lene mben Israel yahagom ibit nicukti di TUHAN tri tut bak Musa kin Harun.

⁵¹Ei njap dima ne TUHAN buwak mben Israel yahagom bingwes ngun leu minu Mesir.