Read Hatam NEHEI LEUSI 14 Bible Online

NEHEI LEUSI 14 - Hatam bible

NEHEI LEUSI 14

¹Lene TUHAN pai bak Musa,

²“Ma acuk mben Israel bingkwei hanyen ba, yohok ide prak meng yati bibirok kik Pi-Hahirot ei Migdol kin Muk Lipig ikieti dideu Baal-Zefon.

³Gi nok lene Firaun mikan bigya mben Israel imbut-mbut wai ei minu dini ba, israwir ei iggum ndigsi.

⁴Mpe dima lene midibindei ba, Firaun ningkek ndok bibor bu leu api noni muhuk bram je. Noro midindo Ditde nisindemti brei binoni kin nide tentara tirigi dibindei timek yok. Leu binhyepo yoni mikan tut bipia Dani ne TUHAN ri.” Lene mben Israel igyai hagom bit leu nok TUHAN nicuk yoti.

⁵Tirigi Firaun miap tut mben Israel inghapti bipia yahagom inang bingwes ngun leu su lene noni kin yo di igya kui noni yahagom iluei ingonti bihig yam “Igyai mun di tunggwei nindig bibor ba, ikes mben Israel bimbut ba, ingwes ngun leu nye apino ibon ide awak nya hi bu bi!”

⁶Gima rino Firaun tin ei nide kroba pran kin nide tentara nya.

⁷Lene noni kin nide nibou pran nya yahagom imbut tut ide kroba pran nitu nya bitut kroba pran di mipbor ngat ningat sratus muhwindagom cem.

⁸Mpe dima lene TUHAN bindei ba, Firaun ningkek ndok apino noni huk bram mben Israel di ingwes ngun leu minu Mesir noro TUHAN nyohou yok nok Nide limwa nya.

⁹Lene nimpung tentara Mesir bitut ide kuda nya kin kroba pran nya kin yo di ibri bikrau kroba pran nya yahagom yuhuk bram mben Israel ba, yahatap yok ei mpia di yohok ide prak meng yati eisi ei muk nintig dip dideu Pi-Hahirot pima.

¹⁰Tirigi mben Israel ingat Firaun kin nide nimpung tentara di ittau kwei su lene ingon digit tut nindig bibor ba, iba ighyet nindig bibor biyahara TUHAN leu binhyepo Noni mikwei mpu yok.

¹¹Lene ipai bak Musa “Minu Mesir pima bon jui dip di kei mang bibor mem nye. Nggon rino abuwak nye kwei binimai ei iggum ndigsi dini i? Angat i! Gi po abuwak nye leu minu Mesir pima bie ndam nimai mem nye ug ri.

¹²Nipai bina nipou su bipia mun di nok gini micut igkep nye. Nipai bina bipia ma asindui sut nye bininok awak mem mben Mesir kikau hak ug. Gi kei rino ninok awak ei minu Mesir leu gima nyeni yahagom imai ei iggum ndigsi dini.”

¹³Lene Musa buhup “Jidigit tut au! Ma jingon nddong hak ug! Mbigom mijingat notou TUHAN miteu je bijingwes ngun bou jiyai him ug ri. Nogindini jingat mben Mesir dima noro jei bi ne mijingat yok bu bi sren.

¹⁴TUHAN mibrim ningkek mem je. Noro ma jahagom jiya jiyati dima bijikimut juhuigya.”

¹⁵Lene TUHAN hig ser Musa “Nggon rino ahara Da mem gima dimpu na i? Acuk mben Israel bimbut kikau.

¹⁶Ma akon ade tom bijo nai minyei ngwa dip apino minyei mikwas hacan bibon ninggati nok gi dem mem mben Israel yahagom imbut kak muk tti leusi.

¹⁷Midibindei ba, mben Mesir ingkek ndok bibor apino yoni miyuhuk bram je di mben Israel kak muk tti leusi. Leu api midindo Ditde nisindemti brei bak Firaun kin nide tentara nya kin nide kroba pran nya kin nide yo di ibri bikrau nya.

¹⁸Midibindei timek yok apino yoni mikan tut bipia Dani ne TUHAN ri.”

¹⁹Lene Allah de malaikati di bie tut mben Israel ngkwei biya abia kep yok. Gima ne cou bumbuhui pima ngkwei biya abia kep yok bu.

²⁰Cou bumbuhui dima jo hacan ei mben Mesir kin mben Israel ikieti bibindei ba, nidinditi nggai kep mben Mesir lo, nipigati piga digai mben Israel. Gima rino bit bon idideu yam mem mmun dima kikau binjap kep kan bi.

²¹Lene Musa su ninda bijo nai minyei ngwa dip leu api TUHAN bindei ba, hou di nimig ten bibor cut leu mpia nipriti apino minyei ngwa dip ngkwei mem mmun kikau binjap kep bibon ninggati ei minyei jou.

²² Lene minyei kwas hacan. Tirigi mben Israel isigon lene imbut imig ei minyei jou di pingge leu su ba, minyei di tti kui nai tti butnap kui biwer tring sir yok.

²³Lene mben Mesir bitut ide kuda nya kin kroba pran nya kin yo di ikrau nya yahagom ikinyon ei minyei nipingge leusi ba, yuhuk bram yok.

²⁴Lo bi lene TUHAN po gwam nai cou hum kin cou bumbuhui dip pima cap tentara Mesir nya ei gimu mem itangganti bibindei ba, yahagom ingon tai-tai bou sut mun di micut igkep yok.

²⁵Lewo Noni bindei ba, igkrop kat ide kroba pran nimig apino bit bon imbut sindem kan bi. Gima rino mben Mesir isimbot dat bipai “TUHAN ya tut mben Israel bikon pran bit nye. Jikwei ba, inang bihigom leu yok!”

²⁶Lene TUHAN cuk Musa bu bipai “Ma asu anda bijo nai minyei ngwa dip hanyen bu leu binhyepo minyei tti hanyen biprioi kep mben Mesir bitut ide kroba pran nya kin yo di ibri bikrau nya hagom.”

²⁷Gima rino Musa su ninda bijo nai minyei ngwa dip leu api minyei hagom sur yam hanyen mem njap tekti. Mben Mesir ibingon mem gima ingwes ngun leu minyei di kot yok noro yahagom isar ei minyei jou.

²⁸Minyei hagom biam hanyen ba, sur yam ser kroba pran nya kin yo di ibri bikrau nya kin tentara nya yahagom di yuhuk mben Israel kikau ug ei minyei nipingge leusi apino yahagom imai bingwig.

²⁹Noro mben Israel imbut imig ei minyei ninggimau di ngga kei lo, minyei hagom tti kui nai tti butnap biwer tring sir yok.

³⁰Njap dima ne TUHAN teu mben Israel leu mben Mesir indati leu api ingat nimbiam mben Mesir nya yahagom ingut di kwei piar ei minyei nipimat.

³¹Tirigi mben Israel ingat TUHAN de nisindemti di nindig bibor di bindei ba, mben Mesir yahagom imai bingwig bou igyai him lene inga leu tut nindig bibor bittin tut Noni. Apino iba ingon com Noni kin Nide awak di Musa cem.