Read Hatam NEHEI LEUSI 15 Bible Online

NEHEI LEUSI 15 - Hatam bible

NEHEI LEUSI 15

¹ Lene Musa kin mben Israel ikon doia bibinggei sut Tuhan bipai, “Dipai doia mem TUHAN lewo Noni bindei timek mben Mesir bihigom tu. Noni com kuda nya kin yo di ibri kuda nya yahagom ug ei minyeiti tu.

² TUHAN di ya srak ko hagau da sindem bibor ba, Noni rino teu da bidingwes ngun. Noni nok ditde Allah. Dikuk da bidinggei sut Noni. Noni ne didigup bat-didigai bat nya ide Allah ri. Gima rino dikon ninyeng di jei.

³TUHAN ne tentara ngat rin ba, ninyeng rino TUHAN.

⁴Noni com nimpung tentara Mesir bitut ide kroba pran nya ug ei minyeisi tu. Nibou pran di inyeng jei nya yahagom isar ningwig ei Muk Lipigti tu.

⁵Minyei ngwa dip krup tut yok bisar ei minyei jou dem kep nok tigya.

⁶TUHAN e, Ade nisindemti di nindig bibor bindei ba, nahagom ninga leu sut bijo ninno. Lewo atam Ade siceu nya binnir-wap tug hon Ade nisindemti tu.

⁷Acok tut Ade siceu nya yahagom tug hon Ade nikei-kau-keisi tu. Angon di sibui sut yok dem kep nok hum di sror ba, yem yahagom dem kep nok hum yem gandum nintam.

⁸Amiep minyei ngwa dip apino abindei hagom tti kui nai tti butnap biya pijum dem kep nok tring. Abindei ba, minyei jou dem kep nok ninggati di ngkiem bibor.

⁹Siceu nya igyok ingon gom mem gima yuhuk bram nye bikat nye lene mihit ide simeda bicok tut nye. Leu api mipos nyende ndigban hagom bingwig leu nye apino mikwas hagom tut yam ba, inggei ngwig sut.

¹⁰Noro Na di TUHAN ahi annei mbigom ngat he apino minyei kot mben Mesir yahagom bimai bingwig. Yahagom isar ei minyei jou dem kep nok leben dicut ug ei minyei di su biborti.

¹¹Bit bon ibinai sut Nani kin kwar di tungwatu nya ikuk yok bak nya kan bi. Lewo Nangkom rino TUHAN Di Kei Bibor Kei ba, Nangkom Akwes-Kwau Kei. Tou risindem mem gima bon mindur kin bindo nya noyam kin gi TUHAN bon pima i?

¹²Lewo asu anda com apino dihyei hap niji bipinde nyende siceu nya yahagom tu.

¹³Abie tut Ade limwa nya di ateu yok bingwes ngun pima bit leu nok apreu ei mem yok tu. Anyohou yok tug hon Ade nisindemti leu api abie tut yok ug ei minu di kwes kei di apreu ei mem yok tu.

¹⁴Mben nindigsi nya imiap anghapti tut apino inghuisi mpig sut. Mben Filistin kin nibou mben Edom nya ingon tai-tai bou.

¹⁵Mben Moab di inyeng jei nya yahagom ittin nindig bibor ba, timiei minu Kanaan nya yahagom ingon cut leu su.

¹⁶Yahagom ittin ba, ingon nde bibor lewo ingat Na di TUHAN Ade nisindemti bou igyai him tu. Yahagom inghuisi jet ba, ittin bibor bibou Ade limwa nya di akwek yok leu awak pima imbut sin yokti binjiriek yok ug e.

¹⁷Abie tut mben Israel ug ei gumihyep dino apek hanjop eisi mem gima abong bit yok. Ata yok ei Ade nungug di kwes-kwau keiti ba, ei Ade Ig di angot ei su cem.

¹⁸Nani ne TUHAN cem Nibou Ndig cem rin ba, anyeng mitak kep Ade limwa nya bijo ninno bijo kikau.”

¹⁹Mben Israel imbut imig ei minyei jou di bon ninggati ei minyei ninggimau. Noro TUHAN bindei ba, minyei biam hanyen bisur yam ser mben Mesir tirigi ide kroba pran nya kin kuda nya kin yo di ibri bikrau nya yuhuk bram yok.

²⁰Lene Miryam di nok nabi sop di Harun nikwohop pima ug yai nide mun di nggileng ba, nisut bat sop nindigsi nya yahagom impig ide mun di nggileng nya bit noni bipri-pri nyen.

²¹Lene Miryam kon doia mem yahagom imiap bipai, “Jikwei ba, yahagom ipai doia bibinggei sut TUHAN lewo Noni bindei timek mben Mesir bihigom tu. Noni com kuda nya kin yo di ibri kuda nya yahagom ug ei minyeiti tu.”

²²Lene Musa bie tut mben Israel ba, ijo leu Muk Lipig biyuug ndam iggum ndigsi Syur. Imbut ei iggum ndigsi kikau mem mmun-njap ningai noro ingat minyei su hi bi.

²³Leu api yuug krau mpia ttou nsi gom di ninyeng Mara noro minyei di biam ei sirima mpo bibor ba, bit bon idut kan bi. Gima rino ijem mpia dima ninyeng “Mara” ba, iba ninyeng dima bindat pia “Mpo Bibor”.

²⁴Lene tungwatu nya inso tut bak Musa bihig ser noni “Idut minyei ei sirigitou i?”

²⁵Lene Musa ba ningon di gom bingat nadi bak TUHAN leu api TUHAN ndo biei ttou gom binoni. Gima rino Musa com biei ttou dima ei minyei di mpo dimati apino minyei dima nok minyei su di kei mem gima idut. Lene TUHAN tri tut Nide nicukti nya biyok ba, bingon yok ei sirima cem.

²⁶Bipai biyok “Gino jiba jingon di gom bibit dihyet lene jiyai munti nya hagom sren kei bou diyai him leu api jiyok ngon kep dicuk jeti nya hagom lene midikes hukum ninggwen di buhun nya po di kes ei mben Mesir dip pima ei je dip bi. Dani ne TUHAN di bindei ba, jikei hanyen ri.”

²⁷Gima ngwig lene yahagom yuug krau mpia ttou nsi Elim. Mpia dima bon minyei bousi ningat simnaibrimigcan kin dui sraba ninjem ningot muhwindacan cem leu api mben Israel yohok ide prak meng yati bibong dideu minyei bousi dima yok.