Read Hatam NEHEI LEUSI 18 Bible Online

NEHEI LEUSI 18 - Hatam bible

NEHEI LEUSI 18

¹Mpe hi bu lene Musa nipmang Yitro po nok imam mem mben Midian pima miap tut Musa ninghapti bipia Allah mpu noni kin mben Israel nindig bibor tirigi Noni buwak yok kwei bingwes ngun leu minu Mesir.

² Gima rino noni kwei ngat Musa bibuwak Musa nitnem Zipora po bit Musa ug ei minu Mesir bi pima.

³ Ba, buwak Musa nipmot bat cin di inyeng Gersom kin Eliezer kwei. Musa jem nipmot mighumbou ninyeng Gersom bitri tut “Sinok ngkiai ei minu dini.”

⁴Lene noni jem nipmot ndrim ninyeng Eliezer[7] bitri tut “Sicig de Allah mpu sa biteu sa bisingwes ngun leu Firaun di mitot sa pima.”

⁵Lene Yitro buwak Musa nitnem kin nipmot bat cin kwei ei iggum ndigsi bicem kep Musa tirigi noni bong ei nungug di kwes-kwau pima nikiou.

⁶Lo, Yitro sok nihyet bak Musa bibie tut nikweisi.

⁷Gima rino Musa hei leu nide prak meng bipigo yok. Lene noni kuk no ei Yitro nimig him leu api mei ningyoia. Lene ihig yam nyen tut igyaisi leu api icoi hanyen ug ei Musa de prak meng behei.

⁸Lene Musa pui kep hukum di mindur nya di TUHAN kes ei Firaun kin nide limwa nya dip tirigi po Noni buwak mben Israel bingwes ngun leu minu Mesir pima. Ba, pui sut mun po buhun tak yok kak puig sinon kin notou TUHAN teu yok bingwes ngun leu mun di cut igkep yok hagom pima.

⁹Tirigi Yitro miap tut mun dini yok hagom tu lene ningon llei bibor.

¹⁰Lene noni pai “Dinggei sut TUHAN di teu je bijingwes ngun leu Firaun kin nide limwa nya di imbuk tut je inda nsi! Dinggei sut TUHAN di teu Nide limwa nya leu awak ei minu Mesir!

¹¹Nogindini dikan tut bipia TUHAN sindem bibor dor njiriek kwar di ngkiai ikuk yok bak hagom lewo Noni yai mindur dima yok hammi tirigi mben Mesir iba ingon di jei bibor bico kep je di mben Israel.”

¹²Lene Yitro jem mindhe-ndhe nya kwei bindig bihi kep hum titut yam lene srat bihi hacan ei nimbar hum dokti bak Allah. Lene Harun kin nibou mben Israel nindigsi nya yahagom induk yam kwei bigyem njita bit Yitro bou Allah niyai him.

¹³Njap di hyep bu lene Musa gwam nok nikei mem mben Israel tut mun di srou yok mang bibor leu mpia tekti kikau ug bipek mpia jinjuisi kep.

¹⁴Tirigi Yitro ngat Musa di yai midyai nindig bibor nok gima bou niyai him lene noni hig ser Musa “Ayai midyai mindei yo rinindig bibor mem ade limwa dini yok i? Nggon rino nangkom ayai midyai nindig bibor dini i? Mei! Tungwatu ingwig ei sirini bimbot kep mun di srou yok sindam leu mpia tekti kikau ug bipek mpia jinjuisi kep.”

¹⁵Lene Musa buhup “Limwa dini yok yahagom ikwei ngat da leu binhyepo dimbot kep tut Allah ningon kanti biyok.

¹⁶Tirigi ibou can ingon kwes kin yam bi lene ikwei ngat da ba, dibingon nok nikei di kos tut no di bon mun tunggwei leu api ditri tut Allah nicuk yokti kin niggai sertti nya biyok.”

¹⁷Lene Yitro pai “Ayai midyai dima tug hon nisinati di igbit bi.

¹⁸Gino ayai midyai nok gima kikau lene abindei ba, anghuisi jet lene ade limwa nya cem minghuisi wei nindig bibor. Midyai dima buhun bibor mem gima nangkom ayai kep hagom.

¹⁹Ma angig atingou mem dipingok nati lene Allah mimpu na. Ningat ne gino aya hacan mem mben Israel ei Allah Noho bei ba, andat kep mun di srou yokti nya hagom bak Noni dima ne mun di igbit ri.

²⁰Suar angginau yok tut Allah nicuk yokti nya ba, apingok ingonti tut igyai munti di kei bibor cem di igbit cem.

²¹Noro ma ayai bit leu dingon kanti dini. Ma adimig pinai di ingon ki nya ibou poi leu api ata yok nok nibou mem ade limwa di imangti ibou sribu gom kin ibou sratus gom kin ibou ningot muhwi kin ibou ningot gom lene nok. Ma ata yo di ittin tut Allah bibit nihyet kin yo dino aba angon com yok kin yo di ingon ya mem gima tungwatu ingot kep yok bi cem.

²²Lene ata yok nok nikei mem ide nimpung nya bibikwop nok. Lene yoni ikwei ngat na bihig ser na tut mun di buhun bibor noro yonti migwam nok nikei nya ba, ikos tut mun di buhun lai-lai de. Nok gima lene ade midyai nok nikei minggan lewo yo dima yahati tut na.

²³Gino ayai kep midyai dini ba, abit leu nok Allah nicuk nati lene midyai di buhun pima mibuhun tak na bi. Leu api bikwop tungwatu ingon micut hon nikei nya ide nikos tutti nya lene iba ingon di nggan bingkwei hanyen ug ei ide prak meng yati.”

²⁴Lene Musa ce tut Yitro nipingok noti.

²⁵Ba, noni dimig pinai di ingon ki nya leu mben Israel ikieti ei bita yok nok nibou mem nimpung nya di imangti ibou sribu gom kin ibou sratus gom kin ibou ningot muhwi kin ibou ningot gom lene nok.

²⁶Nibou dini yok igyai inyeng nok nikei nya mem ide nimpung nya bibikwop nok. Lene ikwei ngat Musa bihig ser noni tut mun di buhun bibor he. Noro yonti rino ikos tut mun di buhun lai-lai de.

²⁷Jei bi lene Musa kes Yitro bipigo noni leu api Yitro ngkwei hanyen ug ei nitimieisi.