Read Hatam NEHEI LEUSI 24 Bible Online

NEHEI LEUSI 24 - Hatam bible

NEHEI LEUSI 24

¹Lene TUHAN pai bak Musa “Ma akui nungug dini kwei ba, angat Da lo, abuwak Harun kin Nadab kin Abihu kin nibou mben Israel ibou ningot muhwindacan cem kwei. Noro nipou tirigi jikwei dideu Da bigyo lene jahagom jikuk je bijinggei sut Da.

²Lene nangkom ambut kikau kwei dideu Da noro ma nindigsi nya yahagom ibit na kikau kwei au. Lene ade limwa di mben Israel ikwei bidideu nungug dini au.”

³Lene Musa ug tri tut TUHAN nicukti kin nikos tutti nya hagom bak nide limwa nya apino yahagom ibuhup nihyet nok gi gom bipai “Minibit leu nok TUHAN nicuk nyeti hagom hak ug.”

⁴Lene Musa pas kep Tuhan De nicuk noti nya hagom. Njap di hyep bu mem ha yausi lene noni dingug tig nibiyok ngon kep nindak simnaibrimigcan ei nok nimbar hum dok ei nungug dima nikiou. Bikwop tig dima hagom ndo tut mben Israel ide keret gom gom.

⁵Lene noni cuk pinai pilei nya ibou poi leu api igyai nibon midut nindig mindhe titut kep humti bak TUHAN. Lene ibui sapi nikre hi kin bu mem nibon midut nibiyai ningon kwes kin Allahti.

⁶Tirigi ibui mindhe-ndhe dima yok tu lene Musa hek mindhe-ndhe dima inggrom ba, kwas hacan buhuug inggrom nite hi ei bokorti leu api ba nite hi biprok nimbar hum dok nidip.

⁷Noni ug yai srat gi preu po noni pas kep TUHAN De nicuk noti nya hagom eisi pima lene ba nihyet nindig bitri tut bak mben Israel. Lene yahagom ibuhup “Minibit biniyai hagom bit leu nok TUHAN nicuk nyeti.”

⁸ Lene Musa ug yai bokor pima tut mindhe ninggrom nite hi di joti bibiprok mben Israel yahagom bipai biyok “Mindhe ninggrom dini tak buk kep gi preu di TUHAN kin jeni jipreu ei biyam tug hon Nide nicuk jeti pima yok ri.”

⁹Lene noni kin Harun kin Nadab kin Abihu kin nibou nya ibou ningot muhwindacan yahagom ikui ug ei nungug dip dima.

¹⁰Ba, ingat mben Israel ide Allah. Noni ya niyati ei mpia di sur yam di nok tig nilam nimma nindig bibor dip ba, dem kep nok mpia-bbed him mem mpia ngeisi.

¹¹Mbro nok gino nibou mben Israel pima yok yahagom ingat Allah tu lo, Noni kes nimai ei yok dip bi. Gima ngwig lene yahagom igyem njita bit yam.

¹²Lene TUHAN pai bak Musa “Ma akui kwei ei mbigdip dini lene midiyai tig mma can po dipas kep Ditde nicukti nya eisi pima bina. Diyai nicukti dini yok hagom bak mben Israel nok mun di bipingok ingonti.”

¹³Lene Musa kin nisut Yosua di ya kui noni itin ei ba, Musa nongkom kui nungug di TUHAN ningat rin eisi dima.

¹⁴Nipou tirigi noni kui nungug dima bigyo lene noni sok kep nibou mben Israel bipai “Ma jahagom jibong ser jide prak meng yati bijimem kep ser dikwei hanyenti. Harun kin Hur ingat rin bit je. Gino jide mun di srou je nonaha lene yoni igwam nok nikei mem je.”

¹⁵Lene Musa kui kikau ug ei Nungug Sinai leu api bumbuhui ttou gom nggai kep mbigdip dima.

¹⁶Lene TUHAN de nikei-kau-keisi juk bipiga mbigdip dima. Bumbuhui pima nggai kep nungug dima kikau mem mmun-njap muhwindagom. Lene TUHAN nihyet tibim kwei leu bumbuhui dima bihig Musa mem njap gi nimuhwindacan.

¹⁷Mben Israel ingat nipigati dima nok hum di yem mbigdip.

¹⁸ Lene Musa kui kikau ug ei mbigdip bicoi ug ei bumbuhuiti bibong ei sirima mem mmun-njap ningot bitai.