Read Hatam NEHEI LEUSI 27 Bible Online

NEHEI LEUSI 27 - Hatam bible

NEHEI LEUSI 27

¹“Ma aba biei meng dia nisra bibon nimbar hum dok di nijeisi kin ninyanti meter can biniken ba, hacem noyam. Lene abon nanaisi meter gom biniken.

²Ma abon ninggai hammi nuhuisi bitai ndam nidip ba, nimbar hum dok kin ninggai nya hagom rap yam nok gom. Lene aba ngkimom-tembaga di dile binggai kep titut yam.

³Lene aba ngkimom-tembaga bibon bokor kin sikop kin mok kin hot nggram kin srier nya hagom mem hum mbom.

⁴Ma aba ngkimom-tembaga bibon kawanggai di sindem bibor lene abon srak ningat bitai bindun nuhuisi bitai him.

⁵Lene akes kawanggai dima bijo hacan ei nimbar hum dok ninsi ba, abisrou kin nitta bei ninsi bijo sur yam.

⁶Ma aba biei meng dia bibon ug ningat can di abikon nimbar hum dok lene aba ngkimom-tembaga di dile binggai kep hagom.

⁷Lene acim ug nya ei srak di bicim nimbar hum dok nitta him nyati mem gima abikon hagom titut yam bimbut tut.

⁸Ma aba biei nisra bibon nimbar hum dok ba, bon ninyem ba, ningat bon nijou kin nibeng di joti nya bi bit leu nok dicuk nati ei mbigdip dini.”

⁹“Ma aba minyahas linen di dia-diau kei bisar ser Ditde Prak Meng. Ma aba linen binap nititut yam gom di nijeisi meter ningot bitai ba, bitai mem sar di jo nite bei mpia nibiho.

¹⁰Ma aba ngkimom-tembaga bibon cou ningot can kin nikiou nya cem. Lene aba perak bibon nikoisi nya kin mun di buhum kin yam leu binhyepo abuhum nititut yam dima kin cou nya hagom kin yam.

¹¹Ma ayai hagom nok gima mem sar di jo nite bei mpia nijjai cem.

¹²Ma anap nititut yam gom di nijeisi meter ningot can ba, can lene abon cou simnai kin nikiou simnai mem sar dini ei nite bei mpia nikimbasti cem.

¹³Lene sar di jo nite bei mpia nipriti mibon dimbou hui ba, sar dima cem nijeisi meter ningot can ba, can.

¹⁴Ma anap nititut yam gom di nijeisi meter muhwindagom biniken ba, abon cou ningai di ata ei nikiou ningai mem dimbou huig nite hi.

¹⁵Lene anap nititut yam gom bu di nijeisi meter muhwindagom biniken ba, abon cou ningai di ata ei nikiou ningai mem dimbou hui nite hi bu.

¹⁶Lene anap ninghas gom di nijeisi meter muhwindatai mem gima ndun ser dimbou huigya. Ma aba minyahas linen di dia-diau kei binap ninghas dini ba, abien mong wol nimmun kin nghei nta kin gi ningwoi eisi. Lene akes ninghas dini bindun cou bitai di ata ei nikiou bitai him.

¹⁷Ma aba bot di aba perak bibon binut cou ninggrupti nya kikau sar nijeisi hagom. Nok gima ma aba perak bibon nikoisi nya cem. Lene aba ngkimom-tembaga bibon cou nikiou nya bu.

¹⁸Ba, biyati dima kin nide sar nijeisi meter ningot bitai ba, bitai lene ninyanti meter ningot can ba, can lene nanaisi meter can biniken. Ma aba minyahas linen di dia-diau kei binap nititut yam dima ba, aba ngkimom-tembaga bibon nikiou nya bu.

¹⁹Lene aba ngkimom-tembaga bibon nimbumbati nya mem Ditde Prak Meng hagom bitut keu di sren nya mem ig hyei kin sar dima cem.”

²⁰“Ma acuk mben Israel bipia ipot mini zaitun di pimbai kei kwei bina mem mini njeng leu binhyepo atin mini njeng dima binjeng kikau.

²¹Ma Harun kin nipmot bat nya itin mini njeng dima mem mmunti binjeng kikau ug bipek njap bigyoti ei Prak Meng di dittau kep je eisi. Ma ikes mini njeng nidihim dima bijo bei ban mbrawin nisai ba, Brua Gi Preu cem jo ei sirima ei ban mbrawin nite dima kwei. Suar mben Israel kin ide nintun him yamti di bram yam nya yahagom igyai bit leu nok dicuk nati dini bijo ninno bijo kikau.”