Read Hatam NEHEI LEUSI 32 Bible Online

NEHEI LEUSI 32 - Hatam bible

NEHEI LEUSI 32

¹ Tirigi mben Israel ingat lo, Musa ug binyen ninno ei mbigdip dima bijuk haninyai kwei bi lene yahagom induk yam bingwig ttai Harun bipai binoni “Ikan tut mun di pek kep mem no po ninyeng Musa di buwak nye kwei leu minu Mesir pima bi. Gima rino ma abon kwar di nikuk nye bak di mibie tut nye bou anda him bak nyeni hak ug.”

²Lene Harun pai biyok “Jiyai jitnem bat kin jimunggwom bat nya ide mitingou him mas kwei bida.”

³Gima rino yahagom ipas ide mitingou him mas nya hagom kwei bak Harun.

⁴ Lene noni mbus hagom biba hum bibindei jet leu api siber ei tig ningwakti di noni bon noyam kin sapi nikre di nehen pap ningut. Lene nide limwa nya yahagom ipai biyam “Mben Israel jen, gini ne ide mun di ikuk nye bak di buwak nye kwei leu minu Mesir pima ri!”

⁵Lene Harun bon nimbar hum dok bikes ei sapi nikre di noni ba mas bibon noho bei bipai biyok “Njap di hyep lene yahagom ibon pesta di ibinggei sut TUHAN.”

⁶ Njap di hyep lene mben Israel ijem ide mindhe-ndhe ningut poi kwei ba, indig bihi kep hum lene ibam bihi di bindo bipia ingon kwes kin Allah ei nimbar hum dokti. Lene yahagom ikuk yok bigyem njita ba, idut mun di pu yok bindei yok leu api ikiju kui bigya ba, igyai nillei cem.

⁷Lene TUHAN pai bak Musa “Abipbur ba, ajuk hanyen ndam ade limwa di abuwak yok kwei leu minu Mesir ug lewo icut ei sisarti ba, ingon mpo tut Da tu.

⁸Yoni ikriek leu puig di dindo biyok tu ba, iba mas di jet bibon sapi nikre di nehen pap leu api ikuk yok bak ba, ibui mindhe-ndhe bindig kep hum bak cem tu. Isimbot dat bipia sapi dima ne ide kwar po buwak yok kwei leu minu Mesir pima ri.

⁹Jo nibreisi mem Da bipia yo dima ingkek ndok bibor.

¹⁰Ma abigen ser dingon kanti gom dini au. Dingon sibui sut yok nindig bibor ba, mbigom midicok tut yahagom bingwig hak ug. Lene midibindei ba, nani kin ade nintun him yamti di bram yam nya jahagom mijinok mben nindig bibor biluei yohoti bu.”

¹¹ Noro Musa hara bak TUHAN di nok nide Allah bipai “TUHAN e, nggon rino angon sibui sut Ade limwa nya bibor i? Lewo ateu yok bingwes ngun leu minu Mesir tug hon Ade nisindemti di nindig bibor tu.

¹²Gino acok tut yok lene mben Mesir misimbot kep biyam bipia abuwak yok kwei leu minu Mesir leu binhyepo acok tut yok bingwig ei nungug him dini. TUHAN e, ma angon sibui sut yok au. Noro anggek tut angon kanti leu binhyepo mun di buhun bibor dima micut igkep yok bi.

¹³ Ayok ngon kep Ade awak di Abraham kin Ishak kin Yakub nya. Ayok ngon kep bipia apreu ei mem yok tug hon neheng bipia ide nintun him yamti di bram yam nya imangti midem ham mpia-bbed him. Lene apreu ei mem yok tut ide dihyei hanjop nsi bipia apek dihyei dima biyok leu binhyepo inyeng mitak kep hagom bijo ninno bijo kikau.”

¹⁴Lene TUHAN ningonti nggek ba, Noni kes mun di buhun bibor pima bicut igkep Nide limwa nya bit leu nok nipaisi pima bi.

¹⁵Lene Musa ngkwei hanyen bijuk leu mbigdip bittei tig mma can di Allah pas kep Nide nicukti nya ei nite hi nite hi.

¹⁶Allah Nonti rino pai tes tig mma can dima leu api pas kep Nide nicukti nya eisi.

¹⁷Tirigi Musa juk kwei leu mbigdip dima lene Yosua miap mben Israel ighyet di kui yam lene pai bak Musa “Dimiap ade limwa nya ighyet di kui yam nok yo di ikon mbrap.”

¹⁸Lene Musa pai “Ighyet dima noyam kin yo di yoom kep ide siceu nya kin yo di icut bak ide siceu nya ighyet bi. Lewo ighyet dima noyam kin yo di ipai doia.”

¹⁹Tirigi Musa juk kwei biya puig sinon bidideu ide prak meng yati dima lene ngat sapi di iba mas bibon kin nide limwa nya di ibihim kep cem lene ningon sibui sut yok nindig bibor leu api com tig mma can po ttei kwei su pima ug ei dihyeisi mu ei nungug dima nikiou apino tig mma dima hacem ki kukiau.

²⁰Lene noni ug yai kwar di nide limwa nya iba mas bibon noyam kin sapi pima bindig kep hum ba, jet bingwig. Api tirigi hem tu lene noni dram hagom bindung-ndiem leu api ba minyei biwir lene cuk mben Israel yahagom bidut minyei dima.

²¹Lene noni hig ser Harun “Yo dini inggon ndei nani bitig dino asindui sut yok ba, ibon sisar nindig dini yok i?”

²²Lene Harun buhup “Ma angon sibui sut da au. Akan tut bipia yo dini ita ibou ei nibon sisarti.

²³Ipai bida bipia ikan tut mun di pek kep mem no po ninyeng Musa di buwak yok kwei leu minu Mesir pima bi. Lene icuk da bipia suar dibon kwar di mibie tut yok bou dinda him.

²⁴Gima rino dicuk yok bittei ide mitingou him mas kwei. Lene yo di indei mitingou him mas yahagom ipas ide mitingou him nya bigyai bida. Leu api dicom hagom ug ei humti leu api nok sapi dini!”

²⁵Lene jo nibreisi mem Musa bipia Harun nyohou yo dima mungkun bi apino iba ingkek di ndok bibon mun dima tu. Nok gima lene ibindei ba, ide siceu nya di ingat mun dima yok hagom bou igyai him ipa ndip yok cem.

²⁶Gima rino noni ug ya ei dimbou heisi ei ide prak meng yati dima lene ba nihyet nindig bibor bipai biyok “Suar je dino jitti kin TUHAN jahagom jikwei o!” Leu api keret Lewi yahagom induk yam bingwig ttai noni.

²⁷Lene Musa pai biyok “TUHAN di nok mben Israel ide Allah cuk je bipia ma jihit jide simeda leu api jimbut bidem prak meng yati dima nisurti-nipekti lene bikwop jahagom jiyai nimai bak jide bat nya kin jisut bat nya kin yo di imbier kim je nya.”

²⁸Lene keret Lewi nya yahagom ibit Musa nicuk yokti apino igyai nimai bak tungwatu nya ibou sribu ningai ei njap gom dima.

²⁹Lene Musa pai bak keret Lewi nya “Jidimig jenti ei mem gima jiyai kep midyai imam mem TUHAN njap di ammani tug hon gi jiyai nimai bak jimunggwom bat nya kin jide bat nya. Gima rino TUHAN minjei mun di kei bak jeni.”

³⁰Njap di hyep bu lene Musa pai bak mben Israel “Jibon sisar nindig bibor tu noro nogindini midikui nungug dini hanyen ug ei TUHAN Noho bei. Midibrim dingkek kep Noni leu binhyepo mpaba Noni mikos ser jide sisar.”

³¹Lene Musa kui nungug buug ya ei TUHAN Noho bei bipai biNoni “Yo dima ibon sisar nindig bibor tu. Iba mas bibon ide kwar bikuk yok bak.

³² Ma aom angon tut yok ba, akos ser ide sisar. Gi bi lene adip tut dinyeng leu Ade daptar di apas kep Ade limwa nya inyeng eisi hak ug.”

³³Lene TUHAN buhup “Mididip tut yo di ibon sisar tut Da yongkom he inyeng leu Ditde daptar.

³⁴Suar aug ba, abuwak mben Israel ug ei minu po dipreu ei mem yok tu. Ditde malaikati mibie tut je. Noro ei nidipti bu lene tto bou midem mem gima dikes hukum ei mben Israel dip drek dip ide sisar.”

³⁵Lene TUHAN bindei ba, nsuwer di buhun bibor hwen mben Israel drek dip gi po icuk Harun biba mas bibon kwar di nok sapi pima.