Read Hatam NEHEI LEUSI 33 Bible Online

NEHEI LEUSI 33 - Hatam bible

NEHEI LEUSI 33

¹ Lene TUHAN pai bak Musa “Suar nani kin yo di abuwak yok kwei leu minu Mesir pima jahagom jimbut leu mpia dini bijimbut kikau ug ei minu di dipreu ei mem Abraham kin Ishak kin Yakub kin ide nintun him yamti di bram yam nya tu.

²Midipinak malaikati gom bibie tut je leu api midijji mben Kanaan kin mben Amori kin mben Het kin mben Feris kin mben Hewi kin mben Yebus yahagom bingwig leu minu dima.

³Ma jimbut ug ei minu jep di bon ninnumti di kei bibor kei. Noro Dani midingat rin bit je bi leu binhyepo dicok tut je ei puig sinon bi. Lewo jingkek ndok bibor.”

⁴Tirigi mben Israel imiap TUHAN nihyet dima lene ingon buhun bibor dem kep nok yo di ingon ngguk tut nimai. Gima rino hi di ba mas kin mitingou him bimau no bi.

⁵Lewo TUHAN sok nihyet ei Musa dip mem yoni bipai “Jingkek ndok bibor. Nok gino dingat rin bit je jei bi lo, midicok tut je bijingwig. Gima rino ma jipas jide mun di jindei hagom leu api midikos tut dingon kanti mem je.”

⁶Gima rino tirigi mben Israel ijo leu Nungug Sinai lene indei ide mas kin mitingou him mas bu bi sren.

⁷Bikwop mpe dino mben Israel imbut ba, yohok ide prak meng yati hanyen bu lene Musa ug yai Prak Meng di noni piga ei pima bohok hanyen bijo minu ting leu nide limwa nya ide prak meng yati. Prak Meng dima ninyeng TUHAN De Prak Meng. Tungwa tou rino ningon kiowi tut TUHAN ningon kanti lene noni ug ei Prak Meng yati dima.

⁸Bikwop mpe dino Musa ug ndam Prak Meng dima lene nide limwa nya yahagom igya hak ei dimbou hui ei ide prak meng yati dima bitou kep noni nggilun bibou coi kikau ug ei ninsi dima ug e.

⁹Niabiati noni kimbas ug ei ninsi dima tu lene cou bumbuhui pima juk kwei biya kui dimbou hui ei TUHAN De Prak Meng nuhui leu api TUHAN mbrap pijum bit noni leu bumbuhui dima.

¹⁰Hammi tirigi mben Israel ingat cou bumbuhui di ya kui dimbou hui ei TUHAN De Prak Meng yati lene yahagom ikuk yok ei ide dimbou heisi nya biba ingwak bikik mpia.

¹¹TUHAN mbrap pijum bit Musa dem kep nok tungwagom mbrap bit nisut. Gima ngwig leu lene Musa ngkwei hanyen ug ei ide prak meng yati dima. Lene pinai pilei Yosua po nicig ninyeng Nun pima ya kui Musa bimpu noni. Noro noni kuk no nyahan ei TUHAN De Prak Meng nsi dima ba, hei sut Musa bi.

¹²Lene Musa pai bak TUHAN “TUHAN e, acuk da bipia suar dibuwak yo dini ug ei minu di apreu ei mem yok. Noro apai brei bida tut no dima apinak kwei mem gima mpu da bigyo. TUHAN e, apai bipia akan mungkun tut da ba, ajoi sut da nipou su.

¹³Gi nok lene handei kon ba, Na di TUHAN ando angon kanti bida leu binhyepo diyai kep Ade midyai nya bidibindei ba, ajoi sut da kikau. Ma ayok ngon kep bipia adimig yo dini ei ba, inok Ade limwa nya ba, anyeng tak kep yok tu.”

¹⁴Lene TUHAN buhup “Midinyohou nani leu binhyepo anyeng mitak kep minu po dipreu sut ei su pima.”

¹⁵Lene Musa pai “Gino abit nye kak nimbutti dini bi lene ma acuk nye binimbut leu mpia dini au.

¹⁶Gino abit nye bi lene ngkiai nya mikan tut gino ajoi sut dani kin ditde limwa dini yok bi. Gino angat rin ei nyeni nikieti lene yo dima mikan tut bipia nyeni ter leu mben nindigsi bidem dihyei nisurti-nipekti hagom.”

¹⁷Lene TUHAN pai bak Musa “Midiyai hagom bit leu nok ahara Da tut tu. Lewo dikan tut na mungkun ba, dijoi sut na.”

¹⁸Lene Musa hara Noni “TUHAN e, gi kei mem asindui sut da bidingat Ade nikei-kau-keisi bou diyai him ug e”

¹⁹ Lene TUHAN buhup “Midiba Ditde nikei-kau-keisi bimbut sin nati leu api midindat kep dinyeng di kwes-kwau leu binhyepo tibim ei atingou nsi. Dani ne TUHAN rin ba, dingondut tungwatu nya di didimig yok ei su nya bidisingat tut yok.

²⁰Noro midindo diimaisi brei ei ayai him kan bi lewo tungwa tou rino ngat diimaisi bou niyai him mimai hak ei niyati.

²¹Noro ma aya hak ei tig dip di jo simiak Da dini.

²²Tirigi Ditde nikei-kau-keisi mbut sin nati lene midikuk na nyahan ei tig mihyeti ba, ditak kep ser na bibou dinjiriek na ug e.

²³Lene midibrim dinda leu nani apino ma angat bei dinghim noro ma angat diimaisi bou ayai him bi.”